Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Nga mwali-ipakishe, moneni nga kuti mwayasuka amepusho yakonkapo:

• Bushe umwana uulekula mwi fumo nga afwa ilyo talafyalwa kuti aisabuuka?

Ubumi butendeka ilyo umuntu aimitwa fye. Yehova kuti abuusha umuntu te mulandu na pafikile ubumi bwakwe pantu “Lesa kuti acita ifintu fyonse.” (Marko 10:27) Lelo Baibolo tailanda mu kulungatika nga ca kuti akabuusha abana abafwila mwi fumo.—4/15, amabula 12, 13.

• Kuti twanonkelamo shani mu kulolekesha ububenshi, bapati, makanta, na mulinso?

Ifi fintu fine fyalikwata amano ya cifyalilwa. Kanshi filanga ukuti Lesa alikwata sana amano. (Amapi. 30:24-28)—4/15, amabula 16-19.

• Cintu nshi icacindama ku Nte sha kwa Yehova icacitike imyaka 100 iyapitapo?

Mu 1909 amaofeshi yakalamba aya Watch Tower Bible and Tract Society, akabungwe ka mwi funde ako Inte sha kwa Yehova shibomfya mu kupulinta impapulo, baliyakuushishe ukufuma ku Pittsburgh, ku Pennsylvania, ukuyatwala ku Brooklyn, mu New York, uko yaba ukufika na lelo.—5/1, amabula 22-24.

• Mulandu nshi Baibolo isosela ukuti ukwikala tondola kusuma?

Ilanda ukuti ukwikala tondolo cilangililo ca kuti umuntu ali-icindika, kuti kwayafwa umuntu ukutontonkanya sana, kabili bushininkisho bwa kushilimuka no mucetekanya. (Amalu. 37:7; 63:6; Amapi. 11:12)—5/15, amabula 3-5.

• Cinshi John Wycliffe, William Tyndale, Robert Morrison, na Adoniram Judson bonse bacitile?

Bonse balitemenwe Icebo ca kwa Lesa kabili balicipilibwilile mu ndimi isho abantu abengi bengomfwa. Wycliffe na Tyndale bapilibwilile mu ciNgeleshi, Morrison mu ciChinese, e lyo Judson mu ciBurmese (ica ku Myanmar).—6/1, amabula 8-11.

• Ni mfumu shinga isha kwa Yuda ishatemenwe sana ing’anda ya kwa Lesa?

Imfumu 19 e shatekele pa bufumu bwa ku kapinda ka ku kulyo ubwa Yuda, lelo ishamfumu fye shine e shatemenwe ing’anda ya kwa Lesa—Asa, Yehoshafati, Hesekia, na Yoshia.—6/15, amabula 7-11.

• Bushe Abena Kristu basubwa bonse pano isonde balapekanyako ifya kulya fya ku mupashi?

Iyo. Bonse abasubwa no mupashi wa kwa Lesa baba mwi bumba lya musha wa cishinka kabili uwashilimuka, lelo ababa mwi Bumba Litungulula e bangalila umulimo wa kupekanya ifya kulya fya ku mupashi.—6/15, amabula 22-24.

• Mulandu nshi abashilika abena Roma bakumbilwe sana ilaya lya mu kati ilya kwa Yesu?

Pa numa ya kwipaya Yesu abashilika tabalepwile ilaya lya kwa Yesu tupimfya tupimfya. Ilingi line amalaya ya musango yo baleyabila pa kulundanya insalu shibili, lelo ilaya lya kwa Yesu talyakwete umulundo, kabili ici e calengele ukuti balitemwe sana.—7/1, ibula 22.

• Mulandu nshi twingasosela ukuti ukutemwa e kwalekenye sana inshila Yesu abombelemo na bantu ne fyo bashimapepo balecita?

Ukucila ukutemwa abantu yaweyawe, balya bashimapepo bena balebasuula. Ukulundapo, tabatemenwe Lesa. Lelo Yesu alitemenwe Wishi kabili aleumfwila abantu uluse. (Mat. 9:36) Aali ne cililishi, uluse, ne cikuuku kuli bena.—7/15, ibula 15.

• Cinshi cingalenga abaupana ukupusanina pa ndalama, kabili cinshi cingabafwa ukupwisha ubu bwafya?

Icilenga ukupusanina pa ndalama ilingi line kukanacetekelana no kutiina ukuti imikalile kuti yabipa, kabili abaupana limo balapusana inkulilo. Ifintu fine ifingamwafwa ukupwisha ubwafya ni ifi: Muletekanya ilyo mulelanda pa ndalama, mulelanshanya ifyo mufwile ukulamona indalama mukwata, lembeni ifyo mulefwaya ukubomfya indalama ngo lupwa, kabili akaneni ifya kucita.—8/1, amabula 10-12.