“Iyi E Nshila. E Mo Mwende”

Ilyashi Lya Ba Emilia Pederson

Abashimika ni ba Ruth E. Pappas

BAMAYO ba Emilia Pederson, bafyelwe mu 1878. Nangu ca kuti baishileba bakafundisha, ico balefwaisha kubomba umulimo wa kwafwa abantu ukupalama kuli Lesa. Bamayo balikwete icibokoshi icikalamba ica malata mu ng’anda yesu mwi tauni linono ilya Jasper, ku Minnesota ku America. Ici cali bushininkisho bwa kuti balefwaya ukwafwa abantu ukupalama kuli Lesa. Pantu ici cibokoshi e co balefwaya ukusendelamo ifipe fyabo ukuya ku calo ca China, uko balefwaya ukuyaba bamishonari. Lelo, ilyo banyinabo bafwile, ifyo balepanga ukucita tafyacitike, basalilepo ukwikala pa ng’anda no kulasunga abaice babo. Mu 1907 baupilwe kuli ba Theodore Holien. Nafyelwe pa 2 December, 1925. Nine nali kasuli kabili bonse pamo fwe bana twali 7.

Bamayo balikwete sana amepusho pa fya mu Baibolo kabili balefwaya amasuko. Icipusho cimo cali pa cisambilisho ca kuti ababi balaya mu kupya mu mulilo. Baipwishe umukalamba we calici lya Lutheran uwaishile nga kuti basanga apo Baibolo yalanda pa kupya mu mulilo. Pa kwasuka, cali kwati nalimo aleti te mulandu ne fyo Baibolo isosa, tufwile fye ukutwalilila ukusambilisha abantu ukuti bakayapya kwa Lesa.

Bamayo Basuka Basambilila Icine

Pa numa fye ya mwaka wa 1900, Bamayo mwaice ba Emma, baliile ku musumba wa Northfield, ku Minnesota, mu kusambilila pa nyimbo. Baleikala na bakafundisha wabo ba Milius Christianson kabili ba muka ba Christianson bali Basambi ba Baibolo, ifyo baleita Inte sha kwa Yehova kale. Ba Emma balandile abati balikwata umukalamba wabo umwanakashi uwatemwa sana ukubelenga Baibolo. Tapakokwele, ba muka ba Christianson balilembeele Bamayo kalata no kubasuka amepusho yonse ayo bakwete pa fya mu Baibolo.

Bushiku bumo, ba Lora Oathout balishile ne shitima ukufuma ku Sioux Falls, ku South Dakota. Aba ba Lora bali Basambi ba Baibolo kabili baishile mu kushimikila mu Jasper. Bamayo batampile ukubelenga impapulo shilanda pali Baibolo isho bapokeleko, kabili mu 1915, batampile ukulashimikilako bambi ifyo balesambilila, no kulabapeelako impapulo isho balefumya kuli ba Lora.

Mu 1916, Bamayo baumfwile ukuti ba Charles Taze Russell bali no kusangwa ku kulongana kwa citungu ku musumba wa Sioux City, ku Iowa. Balefwaya ukuyasangwako. Pali iyi nshita, Bamayo bali na bana basano, kabili umwaice pali bonse ali ni Marvin, ali fye ne myeshi isano. Nangu ca kutila Bamayo bali na bana umulongo, ba-endele amakilomita 160 mwi shitima pa kuya ku kulongana kwa citungu ukwabelele mu musumba wa Sioux City. Balileumfwa amalyashi ya kwa Munyinefwe Russell, balitambileko ubunkolanya bwa “Photo-Drama of Creation,” kabili no kubatishiwa balibatishiwe. Ilyo babweleleko, balilembele icipande calelanda pali uku kulongana mu nyunshipepala ya Jasper Journal.

Mu 1922, Bamayo na bo balisangilweko ku kulongana kwa citungu ukwa pa Cedar Point, Ohio, ukwasangilwe abantu 18,000. Pa numa ya uku  kulongana, tabatalile abaleka ukusabankanya ilyashi pa Bufumu bwa kwa Lesa. Ifyo balebomba e fyalengele ukuti na ifwe tukonke ukukonkomesha kwa kuti: “Iyi e nshila. E mo mwende.”—Esa. 30:21.

Ifyafumine mu Kushimikila pa Bufumu

Ku kutampa kwa myaka ya ba 1920, abafyashi bandi bakuukile ku ng’anda imbi ku nse ya musumba wa Jasper. Ubukwebo bwa batata bwaleya pa ntanshi no lupwa lwa kusunga na lo lwali ulukulu. Batata bena tabalesambilila Baibolo sana nga filya Bamayo balecita, lelo baletungilila umulimo wa kushimikila no mweo onse kabili balepokelela na bamunyinefwe abali mu mulimo wa kwenda. Ilingi line, bamunyinefwe ababa mu mulimo wa kwenda balelanda ilyashi mu ng’anda mu mwesu, kabili abantu abengi, ukufika fye na kuli 100 baleisa no kwikala mu miputule yonse pamo na ku kati.

Ilyo nali ne myaka 7, Bamayo mwaice ba Lettie balitumine foni ukuti abena mupalamano babo, ba Ed Larson na bena mwabo, balefwaya ukusambilila Baibolo. Balitetekele icine caba mu Baibolo kabili na bo baitileko abena mupalamano babo, ba Martha Van Daalen, abali na bana 8, ukuti na bo balesambililako Baibolo. Aba ba Martha na bana babo bonse baishileba Abasambi ba Baibolo. *

Pali ilya nshita, kwali umulumendo uwaleikala lwa mupepi no ko twaleikala uwatampile ukubombela pamo na Batata, ishina lyakwe ni Gordon Kammerud. Uyu Gordon balimusokele abati: “Ukacenjele na bana banakashi ba ulya muntu ubombako. Icalici bapepako talyawama.” Lelo, Gordon atampile ukusambilila Baibolo kabili bwangu bwangu alishininkishe ukuti alisangile icine. Pa numa fye ya myeshi itatu, alibatishiwe. Abafyashi bakwe na bo balishile mu cine, kabili ishi ndupwa shonse, e kutila ulwa ba Holien, ulwa ba Kammerud, e lyo no lwa ba Van Daalen, shalitemwanene sana.

Ukulongana kwa Citungu Kwatukosha

Ukulongana kwa citungu ukwa pa Cedar Point kwalikoseleshe sana Bamayo ica kuti nomba tabalefwaya ukulapuswa ku kulongana kwa citungu. Kanshi ifyo njibukisha sana ku bwaice, ni nyendo twale-enda ukuya ku kulongana kukalamba. Ukulongana kwali mu Columbus, ku Ohio mu 1931 kwali kwa lulumbi icine cine pantu e po babilishe ukuti nomba tuli Inte sha kwa Yehova. (Esa. 43:10-12) Ndebukisha no kulongana kwa citungu ukwali mu Washington, D.C. mu 1935, umo ilyashi likalamba lyalondolwele bwino “ibumba likalamba” ilyalandwapo mu Ukusokolola. (Ukus. 7:9) Pa babatishiwe abacilile impendwa 800 pali na ba nkashi nandi Lilian na Eunice.

Ulupwa lwesu lwaliile ku kulongana kwa cintu ukwa mu Columbus, Ohio, mu 1937; ukwa mu Seattle, ku Washington, mu 1938; no kwa mu New York City mu 1939. Twaendeele pamo no lupwa lwa ba Van Daalen no lwa ba Kammerud e lyo na bamunyinefwe bambi, kabili twaleya tuletuusha no kusendama mu nshila. Eunice aupilwe kuli Leo, mwana ba Van Daalen mu 1940, kabili batampile  bupainiya. Muli ulya wine mwaka, Lillian aupilwe kuli Gordon Kammerud, kabili na bo bene batampile bupainiya.

Ukulongana kwa citungu ukwa mu 1941 ukwabelele ku St. Louis, ku Missouri, kwali ukwaibela. Pali kulya kulongana, abaice abengi nga nshi balipokeleko icitabo citila Children (Mwe Bana). Kulya kulongana kwalengele na-aluka. Pa numa fye ya uku kulongana, pa 1, September 1941, ine na ndume yandi Marvin no mwina mwakwe Joyce, twatampile bupainiya. Nali fye ne myaka 15.

Incende twaleikalako yali ya mafarmu, kanshi caleafya sana kuli bamunyinefwe ukusangwa ku kulongana kwa citungu pantu kwalecitwa pa nshita ya kusombola. Kanshi ukulongana nga kwapita, kwaleba kupituluka mu kulongana, twalelonganina mu lubansa lwa pa mwesu ku numa ya ng’anda pa kuti na bashasangilweko banonkelemo. Ukupituluka mu kulongana kwalewama nga nshi.

Ukuya ku Gileadi no Kuyabombela mu Fyalo Fimbi

Mu February 1943, Isukulu lya Gileadi lyalitendeke ku kusambilisha bapainiya pa kuti bengabomba bumishonari. Mwi kalasi lya kubalilapo mwali 6 aba mu lupwa lwa ba Van Daalen. Aba mu ng’anda imo ni ba Emil, ba Arthur, ba Homer, na ba Leo; munyinabo uwa mu ng’anda imbi Donald; na Eunice nkashi nandi uwaupilwe kuli ba Leo. Twalilayene na bo ninshi natumfwa ubulanda ne nsansa, pantu tatwaishibe ilyo twali no kumonana na bo na kabili. Ilyo bapwile isukulu, bonse 6 babatumine ku calo ca Puerto Rico, ukwali baNte abanono, tabafikile na kuli 12.

Ilyo papitile umwaka umo, Lillian na ba Gordon pamo na ba Marvin na Joyce balisangilwe kwi sukulu lyalenga butatu ilya Gileadi. Na bo bene babatumine ku Puerto Rico. Lyena, mu September 1944, na ine nalisangilwe kwi sukulu lyalenga bune ilya Gileadi ninshi ndi ne myaka 18. Ilyo napwile isukulu mu February 1945, na ine bantumine ku Puerto Rico ku kubombela pamo na bamunyinane ne nkashi. Ala ubu bwali bwikalo ubupya kuli ine! Nangu ca kuti calikosele ukusambilila ululimi lwa ciSpanish, bamo pali ifwe bwangu bwangu twaletungulula amasambililo ukucila pali 20 cila muntu. Yehova alipaalile umulimo. Pali ino nshita mu Puerto Rico mwaba baNte ukufika 25,000!

Amasanso mu Lupwa

Ba Leo na Eunice batwalilile ukwikala mu Puerto Rico ilyo umwana wabo umwaume uo bainike ati Mark afyelwe mu 1950. Mu 1952 bapangene ukuya pa cuti ku kutandalilako balupwa ku America. Pa 11 April, balimine ne ndeke, lelo ku ca bulanda, pa numa fye indeke yaimine, yaileponena muli bemba. Ba Leo na Eunice balifwile. Lelo Mark uwali fye ne myaka ibili bamusangile ale-elela pali bemba. Balimubulile kuli umbi uwapuswike no kutampa ukumupuupuutula mpaka aba na bwino. *

Ilyo papitile imyaka isano, pa 7 March, 1957, Bamayo na Batata bali muli motoka baleya ku Ng’anda ya Bufumu kabili iwilo lyalipompolweke. Ilyo Batata bali mu mbali ya musebo balewamya iwilo, motoka iyalepita yalibapunkile no kufwa bafwilile fye apo pene. Abasangilwe ku lyashi lya cililo balifikile ku 600, kabili ici cali bunte busuma mu ncende twaleikala umo Batata bacindikwe sana.

Ukuyabombela Kumbi

Ilyo fye Batata tabalafwa, naebelwe ukuyabombela ku Argentina. Mu August 1957, nalifikile mu musumba wa Mendoza mwi samba lya mpili sha Andes. Mu 1958, ba George Pappas, abasangilwe kwi kalasi lyalenga 30 ilye sukulu lya Gileadi, na bo balibatumine ku Argentina. Twalitemwanene na  ba George, kabili mu April 1960, twalyupene. Mu 1961, Bamayo balifwile ilyo bali ne myaka 83. Bali aba cishinka mu kupepa kwa cine kabili balyafwile abengi nga nshi ukuba ne cishinka.

Pa myaka 10, ine na ba George twabombeele capamo na bamishonari bambi abalekanalekana. Lyena pa myaka 7, twali mu mulimo wa kwenda uwa kulabombela imuputule. Mu 1975 twalibwelelemo ku America ku kwafwilishako balupwa wesu abalelwala. Mu 1980, abena mwandi balibetile ku kubombela ifilonganino fyali mu muputule wa ciSpanish. Pali ilya nshita, ifilonganino fya ciSpanish mu America fyali nalimo 600. Pa myaka 26, twalitandalile ifilonganino ifingi kabili twalimona uko impendwa ya filonganino yakula ukucila pali 3,000.

Balyenda mu “Nshila”

Bamayo balitemenwe ukumonako uko abana kukula mu lupwa lwabo batampile umulimo wa nshita yonse. Ku ca kumwenako, Carol, umwana wa bakalamba ba Bamayo ba Ester, atampile bupainiya mu 1953. Aupilwe kuli ba Dennis Trumbore, kabili babomba umulimo wa nshita yonse ukutula apo baupanina. Umwana umbi uwa Bamayo mukalamba ba Ester, Lois aupilwe kuli ba Wendell Jensen. Basangilwe kwi kalasi lyalenga 41 ilye sukulu lya Gileadi kabili bailebombapo ku Nigeria pa myaka 15. Mark, ulya abafyashi bakwe bafwile mu ndeke, balimusendele no kumukusha kuli bankashi ya ba Leo, ba Ruth La Londe na bena mwabo ba Curtiss. Mark no mwina mwakwe Lavonne, bali bapainiya pa myaka iingi kabili balikushisha abana babo bane mu “nshila.”—Esa. 30:21.

Pa bantu twafyelwe na bo ing’anda imo, uucilipo fye ni Orlen, kabili ali ne myaka ukucila pali 90. Acili alebombela Yehova ne cishinka. Ine na bena mwandi ba George tucili mu mulimo wa nshita yonse.

Ifya Cishale Ifya Bamayo

Pali ino nshita nalikwata cimo pa fyo Bamayo batemenwe sana. Ici cintu litebulo ilyo batata babapeele pa bwinga bwabo. Ili tebulo lyalikwata umo babika ifintu kabili nasangilemo akabuuku balelembamo amakalata ne fipande ifyo baletuma ku balemba inyunshipepala kabili fyalebomba bwino ukushimikila pa Bufumu. Fimo ifi bafilembele mu myaka ya ba 1900. Muli ili tebulo mwaba na makalata ayo Bamayo balebatumina ku bana babo abali muli bumishonari. Ndatemwa sana ukubelenga libili libili amakalata ayo balelemba! Kabili amakalata baletutumina yaletukoselesha icine cine. Bamayo balifililwe ukubomba bumishonari ubo balefwaisha. Lelo ukufwaisha ukubomba bumishonari e kwalengele aba mu nkulo shakonkelepo ukubomba bwino. Ala ndafwaisha sana ukwisamonana na balupwa bonse na Bamayo na Batata mu paradise pano isonde!—Ukus. 21:3, 4.

[Amafutunoti]

[Icikope pe bula 17]

Ba Emilia Pederson

[Icikope pe bula 18]

1916: Bamayo, Batata (uyu bali nankwe ni Marvin); pe samba, ukufuma ku kuso ukuya ku kulyo ni, Orlen, Ester, Lilian, na Mildred

[Icikope pe bula 19]

Leo na Eunice, ilyo tabalafwa

[Icikope pe bula 20]

1950: Ukufuma ku kuso ukuya ku kulyo, pa muulu pali: Ester, Mildred, Lilian, Eunice, na Ruth; pe samba pali: Orlen, Bamayo, Batata, na Marvin

[Icikope pe bula 20]

George na Ruth Pappas ilyo bali mu muputule, 2001