Amepusho Ukufuma ku Babelenga

Bushe icilonganino ca Bena Kristu cimona shani ubuliili?

Icebo ca kwa Lesa calikaanya abantu ababombela Lesa ukukolwa no kuba aba buliili. E ico, icilonganino ca Bena Kristu cimona uwa buliili nga filya fine cimona cakolwa. Cakolwa no muliili teti babe mu cilonganino ca Bena Kristu.

Amapinda 23:20, 21 yatila: “Wiba pa banwensho mwangashi, pa bafunukile nama; pantu umunwi no mubuuke bafika ku kubulwa, no kushinshila kufwiko muntu indelemba.” Pa Amalango 21:20, tubelengapo ulwa muntu “umuumankonso kabili icintala,” uwalingile ukwipaiwa ukulingana ne Funde lya kwa Mose. Ukulingana ne ci cikomo, uyu muntu icintala, uushilapila aali na kabili ‘umubuuke, kabili umunwi.’ Kanshi, mu Israele wa ku kale, ubuliili bwali cintu cishalinga ku balefwaya ukubombela Lesa.

Lelo, calola mwi ukuba umuliili, kabili cinshi cintu Amalembo ya ciGriki aya Bwina Kristu yalanda pali ili lyashi? Umuntu uwa buliili muntu “umubuuke uwa bufunushi uufwaya fye ukulya no kunwa lyonse.” E co, kanshi, ubuliili bufunushi, kabili Icebo ca kwa Lesa citweba ukuti “abafunushi” tabakengile mu Bufumu bwa kwa Lesa. (1 Abena Korinti 6:9, 10; Abena Filipi 3:18, 19; 1 Petro 4:3) Na kabili, ilyo umutumwa Paulo asokele Abena  Kristu ukukanacitako “imilimo ya bumubili,” alandile na pa “kukolwakolwa, iciwowo, ne fyapale fi.” (Abena Galatia 5:19-21) Ukuliisha kwalyampana sana no kukolwakolwa ne ciwowo. Kabinge, ubuliili ukwabula no kutwishika bwalisanshiwa mu “fyapale fi” ifyo Paulo alandilepo. Nga fintu fye cingaba ku muntu uucita “imilimo imbi iya bumubili,” Umwina Kristu uwaishibikwa ukuti muliili kabili uushifwaya ukwalula imibele yakwe iya bufunushi afwile ukufumishiwa mu cilonganino.—1 Abena Korinti 5:11, 13. *

Nangu ca kuti Icebo ca kwa Lesa citila cakolwa aba fye cimo cine no muliili, calyanguka ukwishiba cakolwa ukucila umuliili. Ifya kwishibilako cakolwa filamoneka. Lelo, ukwishiba ukuti nomba umuntu nasanguka umuliili kwalyafya sana pantu te kuti eshibikilwe ku mimonekele ya ku nse. Kanshi, baeluda ba mu cilonganino balakabila ukusakamana sana e lyo no kucenjela ilyo balebombela pali uyu mulandu.

Ku ca kumwenako, ukwina sana kuti kwaba cilangililo ca buliili, lelo te lyonse cabe fi. Bamo baliina sana pa mulandu wa bulwele. Bambi na bo ca pa lupwa. Na kabili tufwile ukulaibukisho kuti ukwina sana tukumwena fye ku mubili, lelo ubuliili tabumoneka. Ukwina sana kwalondololwa ati “kufulisha kwa mafuta ya mu mubili,” lelo ubuliili “bufunushi atemwa ukufwaya ifyacilamo.” Kanshi, ubuliili tabwishibikilwa ku fyo umuntu amoneka lelo ku fyo atemwisha ukulya. Umuntu kuti aba no mubili uwalinga fye napamo kuti aba fye no waonda lelo kuti aba umuliili. Na kabili, ifyo abantu batontonkanya pa kwina kwalinga na pa mimonekele ya mubili wa muntu fyalipusanapusana mu fyalo.

Bushe umuliili kuti aishibikwa shani? Uwa buliili tailama mu miliile yakwe, kabili alalya ica kuti atendeka no kumfwa ububi nelyo fye ukulwala. Ukukanailama kwakwe kulanga ukuti ta-angwako ku museebanya uo aleta pali Yehova na pa bantu Bakwe. (1 Abena Korinti 10:31) Lubali lumbi, umuntu uulisha mu nshita mu nshita te kuti apo pene fye etwe ati “umufunushi.” (Abena Efese 5:5) Na lyo line, ukulingana na Abena Galatia 6:1, Umwina Kristu wa musango yo kuti akabila ukwafwiwa. Paulo alondolola ukuti: “Mwe bamunyinane, umuntu nga alufyanya ukwabula ukwibukila, aba muli imwe aba bumupashi esheni ukulungika uwa musango yo ne mitima yafuuka.”

Mulandu nshi ukufunda kwa mu Baibolo ukwa kukanaliisha kucindamine maka maka muno nshiku? Pantu Yesu asokele pa nshiku tuleikalamo ati: “Muyangwe mwe bene epali imitima yenu yafinininwa ku buliili no kukolwakolwa na masakamika ya mikalile, no bushiku bulya bwaisa pali imwe no kupumikisha kwati citeyo.” (Luka 21:34, 35) Ukusengauka ubuliili ni nshila imo iyacindama iya kutaluka ku mikalile yonaula bumupashi.

Ukulinga, mibele ya Bwina Kristu. (1 Timote 3:2, 11) E co ukwabula no kutwishika, Yehova akaafwa bonse abapampamina pa kufwaya ukubomba ukulingana no kufunda kwa mu Baibolo ukwa kulya no kunwa mu kulinga.—AbaHebere 4:16.

[Futunoti]