666—Te Bwile Fye

“Umuntu nangu umo eshita nelyo ukushitisha kano fye uuli ne cishibilo, ishina lya ciswango nelyo inambala ye shina lya ciko. Pano e palekabilwa amano: Uwacenjela lekeni apende impendwa ya ciswango, pantu ni nambala ya muntu; ne nambala ya ciko myanda mutanda na makumi mutanda na mutanda (666).”—Ukusokolola 13:17, 18.

UKUSESEMA pa lwa cishibilo ca nkama, nelyo ishina, lya “ciswango”—e kutila inambala 666 kwaba pa malyashi ya mu Baibolo ayanono ayo abantu bapoosako sana amano kabili ayasakamika. Pa televishoni na pa intaneti, mu mafilimu, mu fitabo, na muli bamagazini, icishibilo ca ciswango caba e lyashi bashaishiba umo lyalola.

Bamo basumino kuti inambala 666 cishibilo ca kwa mukaanyakristu wa mu Baibolo. Bambi basoso kuti ilosha ku cishibilo ico uuli onse afwile akwata, pamo ngo lulembo nelyo inambala iyashutikwa mu mubili wa muntu iya kumwishibisha ukuti mubomfi wa ciswango. Bambi na bo basumino kuti iyi inambala 666 cishibilo ca ba papa baba Katolika. Ukupyanikishapo amanambala ya ciRoma pa filembo fyaba mwi lumbo lya ba papa, Vicarius Filii Dei (Uwaba pe punda lya mwana wa kwa Lesa), no kwalulako amanambala panono, batila e cipanga inambala ya bupapa 666. Kabili, abantu batila inambala imo ine kuti yapangwa ukufuma kwi shina lya ciLatin ilya kwa Kateka wa ciRoma Diocletian na kwi shina lya kwa Nero Caesar mu ciHebere. *

Lelo, ubu bulondoloshi bwa kwelenganya bwalipusana nga nshi na fintu Baibolo isosa pa cishibilo ca ciswango, nge fyo twalamona mu cipande cikonkelepo. Baibolo isoso kuti bonse abakwata icishibilo ca ciswango bakakandwa kuli Lesa ilyo akaleta impela ku bwikashi buno. (Ukusokolola 14:9-11; 19:20) E ico, ukumfwikisha umwalola 666 kwalicila pa kupikulula fye ubwile. Ca kutasha ukuti, Yehova Lesa uwaba ca kumwenako capulamo ica kutemwa kabili Intulo ya lubuuto lwa ku mupashi, taleka ababomfi bakwe ukukaanaishiba uyu mulandu wacindama.—2 Timote 3:16; 1 Yohane 1:5; 4:8.

[Futunoti]