Tasheni Yehova “mu Kati ka Cilonganino”

UKULONGANA kwa Bwina Kristu kwapekanishiwa na Yehova ku kukosha abantu bakwe lwa ku mupashi. Ukupitila mu kusangwa lyonse mu kulongana, tulalanga ukuti tulatasha pa kupayanya kwa kwa Yehova. Kabili, kulatwafwa ‘ukutontonkanye fya kucincisha [bamunyinefwe] ku kutemwa kabili ku kubombe milimo isuma,’ ne co caba ni nshila yacindama iya kulanga ifyo twatemwana. (AbaHebere 10:24; Yohane 13:35) Lelo ni shani fintu twingacincisha bamunyina pa kulongana?

Muleilandila pa Cintubwingi

Imfumu David yalembele ukuti: “Nkalumbule shina lyenu kuli bamunyinane; mu kati ka [cilonganino, NW] e mo nkamutashisha. Lwafuma kuli imwe ulwimbo lwandi ulwa kutasha mu lukuta lukalamba” “Nkamutootela mu [cilonganino cikalamba, NW]; nkamutashisha mu bantu abengi.” “Nimbile mbila nsuma ya bulungami mu lukuta lukalamba; moneni, imilomo yandi nshaikaanya.”—Amalumbo 22:22, 25; 35:18; 40:9.

Mu nshiku sha mutumwa Paulo ilintu Abena Kristu balelongana ku kupepa, nabo bene balelanda pa fyo bacetekele Yehova na pa bukata bwakwe. Muli yi nshila balekoseleshanya no kucincishanya ku kutemwa na ku kubombe milimo iisuma. Ilelo, imyaka iingi pa  numa ya kwa Davidi na Paulo, icine cine ‘tulemona ubushiku [bwa kwa Yehova] bulepalama.’ (AbaHebere 10:24, 25) Ubwikashi bwa kwa Satana bulepungaila ukuya ku bonaushi, kabili amafya yaletwalilila ukufulilako. Ino e nshita, ‘tulekabila ukushipikisha sana’ ukucila kale. (AbaHebere 10:36) Ni bani bengalinga ukutukoselesha ukucila pali bamunyina?

Pali lelo, nga fintu cali na mu kubangilila, abasumina umo umo baliba ne shuko lya kulanda pa citetekelo cabo ‘mu kati ka cilonganino.’ Ishuko bonse bakwata kwasuka ifipusho ifipushiwa kwi bumba pa kulongana kwa cilonganino. Mwisuula ubunonshi ubwaba mu kwasuka. Ku ca kumwenako, ifyasuko ifilanga ifya kucimfya nangu ukutaluka ku mafya filakosha umupampamina wa bamunyinefwe uwa kukonka ifishinte fya Baibolo. Ifyasuko pa Malembo ayalimo lelo ayashambwilwe nangu ayakwete ifyebo ififumine mu kusokota kwa pa lwesu kuti fyakoselesha bambi ukuwamyako imisambilile yabo.

Ukwishiba ukuti ifwe na bambi tukamwenamo nga twayasuka pa kulongana kucincisha Inte sha kwa Yehova bonse ukucimfya umwenso. Ukucilisha calicindama kuli baeluda na babomfi batumikila ukulayasuka pa kulongana, apantu benekelwa ukutungulula mu kwasuka e lyo no kusangwa ku kulongana. Lelo, ni shani umo engawamyako nga amona ukuti uyu mulimo wa Bwina Kristu uwa kwasuka ulemukosela?

Imitubululo ya Kwafwilisha Ukuwamyako

Ibukisheni ukuti ukwasuka lubali lwa kupepa Yehova. Nkashi Umwina Kristu uwikala mu Germany alondolola ifyo amona ifyasuko fyakwe. Atila: “Fyaba kwasuka kwa pa lwandi ku mesho ya kwa Satana aya kulesha abantu ba kwa Lesa ukulanda pa citetekelo cabo.” Munyina uwabatishiwe nomba line uubishanya ne cilonganino cimo cine atila: “Pa kwasuka, ndapepa no mukoosha.”

Ukupekanya bwino. Nga mwafilwa ukubelengela kabela ifyo mulesambilila, cikamukosela ukulandapo kabili ifyasuko fyenu tafyakabe fisuma. Imitubululo pa fya kwasuka pa kulongana kwa cilonganino yaba mu lupapulo lwa Nonkelenimo mu Masambililo ya Isukulu lya Butumikishi Ilya Bulesa, ibula 70. *

Ibikileni ubuyo bwa kwasuka napamo umuku umo pa kulongana konse. Ici cilepilibula ukupekanya ifyasuko fyafulilako, pantu nga mwaimya ukuboko pa miku yafulilako, ishuko lya kumusonta kuli munyina aletungulula kuti lyabako. Limbi kuti mwamwishibisha mu kubangilila ifipusho mupekenye ukwasukapo. Ici cilafwa maka maka nga e lyo mwatendeka. Apo kuti mwashimunuka ukwimya ukuboko mu “lukuta lukalamba,” ukwishiba ukuti ni paragrafu wenu no kuti abaletungulula ukulongana bakalalolekesha  ukumona ukuboko kwenu cikamukoselesha ukwasuka.

Asukenipo mu kubangilila. Umulimo uwakosa tawanguka nga kuli ukushingashinga. Ukwasuka pa kulongana mu kubangilila kuti kwayafwa. Mukapapa ukumona ifyo canguka ukwasukapo libili nangu litatu nga mwacimfya ubwafya bwaba mu kwasukapo umuku wa kubalilapo.

Saleni icipuna calinga. Bamo balasanga ukuti cilanguka ukwasuka nga baikala ku fipuna ifya ku ntanshi mu Ng’anda ya Bufumu. Ukupumfyanishiwa kulacepa, kabili uuletungulula alamona bwangu abemishe amaboko. Nga mwacite ci, mukaleibukisha ukwimyako ishiwi pa kuti uuli onse engomfwa, ukucilisha nge cilonganino tacibomfya ifisoselo fya kwasukilamo abali mwi bumba.

Mulekutikisha. Ici cikamwafwa ukukanabwekeshapo ifyo bambi balandile. Kabili, ifyasuko fya bambi kuti fyamucinkulako ilembo nangu icishinka ica kulunda pa fyo balandile. Limo limo, ukushimika icacitike mu kwipifya kulangilila icishinka balelandapo. Ukulandapo kwa musango yu kulafwa sana.

Sambilileni ukwasuka mu mashiwi yenu. Ukubelenga icasuko ukufuma mu citabo mulesambilila kulanga ukuti namusange casuko calungama, kabili kuti caba kutendeka kusuma mu kwasuka. Lelo ukulunduluka ukufika ku kwasuka mu mashiwi yenu kulanga ifyo namumfwa icishinka. Tacifwaikwa ukwambula ishiwi limo na limo mu mpapulo shesu. Inte sha kwa Yehova tababwekeshapo fye cintu impapulo shabo shisosa.

Asukeni ifikumine ifyebo mulelandapo. Ifyasuko nga tafilingene ne fyebo nangu nga fyapusana ne fishinka fikalamba mulelandapo tafilinga. Ici calola mu kuti ifyasuko fyenu filingile ukumfwana ne co mulelandapo. Lyena fikalenga ukulanshanya ukuba ukwa kukoselesha lwa ku mupashi pa mutwe mulesambilila.

Kwateni ubuyo bwa kukoselesha. Apo umulandu ukalamba uwa kwasukila waba wa kukoselesha bambi, tulingile ukutaluka ku kulanda ifyebo ifingabafuupula. Kabili, tatufwile ukulanda sana pali paragrafu ica kuti kwashala fye ifinono nelyo twakaana ukushako ifyo bambi bengalandapo. Ifyasuko nga fyalepa nangu fyapikana filafisa cintu mulelandapo. Ifyasuko ifipi mu mashiwi ayanono filabomba bwino, kabili filakoselesha abapya ukwasuka ifyasuko ifipi ifyo bapekenye.

Umulimo wa Batungulula Ukulongana

Pa kukoselesha bambi, uutungulula ukulongana e wakwata umulimo ukalamba. Alapoosa amano ku casuko conse pa kukutikisha no kulalolesha uulepeela icasuko mucinshi mucinshi ukucila ukwangwa fye kuli fimbi. Fintu cingalubana nga uuletungulula talekutikisha ne co calenga alabwekeshapo ifyo bambi balandile nangu ukwipusha icipusho baswike kale!

Kabili kuti cilefuupula nga uuletungulula lyonse alebwekeshapo mu mashiwi yambi ifyo balandile, kwati alebalanga ukuti ifyo  baswike tafikumanine. Lubali lumbi, fintu cibe ca kukoselesha nge fyasuko filelundako ukulanshanya pa cishinka cikalamba. ‘Kuti twabomfya shani ifi fyebo mu cilonganino cesu?’ atemwa, ‘lilembo nshi ilili mu paragrafu ililekuma ifyo balandile?’ e musango wa fipusho fikoselesha ifyasuko fisuma, ifilenga isambililo ukuwama.

Kwena, abapya nangu aba mwenso no kucilisha balingile ukutashiwa nga bayasukapo. Ici kuti cacitwa nga bali fye babili no yo muntu pa numa ye sambililo pa kuti tomfwile insoni na pa kuti katungulula akwate ishuko lya kulanda pa mitubululo ingakabilwa.

Mu kulanshanya kwa lyonse, umuntu uwatemwa ukuti e ulelanda fye eka nga balelanshanya takoselesha kulanshanya. Bakakutika tabafumya ifili ku mukoshi. Nga balakutika no kukutika ninshi tabakutika no mutima onse. Cimo cine kuti cacitika kuli katungulula nga pa kulanshanya konse alelandapo libili libili. Lelo, uuletungulula ukulongana kuti ayafwe bumba ukutontonkanya pe sambililo nga aleipusha ifipusho fyalundwapo. Ifipusho fya uyo musango fifwile fye fyaba mu nshita mu nshita.

Uuletungulula tafwile fye ukusonta uwabalilapo ukwimya ukuboko. Ici kuti calenga balya abafwaya nshita inono ya kusanga ifyasuko ukufuupulwa. Nga apembelela panono, kuti asonta umbi uushaswikepo. Kabili akabomfya umucetekanya pa kukanasonta abacaice ukwasuka ifipusho ifilelanda pe sambililo bashingomfwikisha.

Lelo ni shani nga umo ayasuka icasuko calubana? Uuletungulula alingile ukutaluka ku kulenga uwaswike ukumfwa insoni. Ifyasuko nangu nafilubana, ilingi filabamo na mashiwi yamo aya cine. Mu mucenjelo nga uuletungulula asalamo amashiwi ayalungama, no kwipushisha mumbi icipusho, nangu ukwipusha icipusho cimbi, kuti alungike casuko ukwabulo kulenge insoni.

Pa kukoselesha ibumba ukwasuka, uuletungulula ukulongana alingile ukutaluka ku kwipusha ifipusho fyaseeka, pamo nge fi, ‘Bushe kuli bambi abakwete ifya kulundapo?’ Icipusho ca kuti, ‘Ni bani abashilayasukapo? Uno e muku wa kulekelesha!’ napamo cipushiwa ukuti bakoseleshe ukwasuka, lelo tacikoselesha umo ukuilandila. Bamunyina tabalingile ukulengwa ukuyumfwa aba mulandu pa kukanayasukapo pa kutendeka kwe sambililo. Lelo balingile ukukoseleshiwa ukulandapo ifyo baishiba pantu ukwasuka caba kulangisha ukutemwa. Mu kulundapo, nga uuletungulula asonta umo ukulandapo, te kuti cibe cisuma ukusosa ati, “Pa numa yakwe, twalakutika na kuli Munyina kantwa e lyo na Nkashi kantwa.” Uuletungulula afwile ukulakutika ku fyo baleyasuka intanshi pa kuti engeshiba nge fyasuko fimbi filekabilwa.

Ukwasuka Caba Lishuko

Ukusangwa ku kulongana kwa Bwina Kristu cintu icikabilwa lwa ku mupashi; ukwasukapo caba lishuko. Nga tulelumbanya Yehova “mu kati ka cilonganino” muli iyi nshila yaibela, e lyo tukonka ica kumwenako ca kwa Davidi no kumfwila ukufunda kwa kwa Paulo. Ukwasuka pa kulongana kulanga ukuti twalitemwa bamunyina kabili twaba mu cilonganino cikalamba ica kwa Yehova. Ni kwi kumbi mwingatemwa ukuba ilyo “mulemono bushiku bulya bulepalama”?—AbaHebere 10:25.

[Futunoti]

[Ifikope pe bula 20]

Ukukutika no kwasuka pa kulongana kwa Bwina Kristu kwalicindama

[Icikope pe bula 21]

Uuletungulula alangwako ku casuko conse fye