Ifipusho Ukufuma ku Babelenga

Yehova alisuminishe ukuupe mpali ku babomfi bakwe aba ku kale, abena Israele, pali lelo tasuminisha. Bushe ifipimo fyakwe filaluka-aluka?

Yehova taaluka mu fyo atontonkanya pa kuupe mpali. (Amalumbo 19:7; Malaki 3:6) Te fyo Lesa alefwaya ku muntu ukufuma fye pa kutendeka, kabili na nomba line te fyo afwaya. Ilyo abumbile Efa muka Adamu, Yehova atile icipimo cakwe ca kuti umukashi umo kukwata umulume umo. “Ni pali ici umwaume alekela wishi na nyina, alambatila na ku mukashi wakwe, na bo babo mubili umo.”—Ukutendeka 2:24.

Ilyo Yesu Kristu aali pe sonde, alandile cimo cine ilyo aleasuka abaleipusha pa kulekana no kuupa cipya cipya. Atile: “Bushe tamwabelengo kuti uwababumbile ukufuma pa kutendeka ababumbile umwaume no mwanakashi, kabili atile, ‘E mulandu wine umwaume akashiila wishi na nyina no kulambatila ku mukashi wakwe, kabili aba babili bakaba umubili umo’? E ico tabali babili kabili iyo, lelo bali umubili umo. “ Yesu kabili atile: “Onse uwaleka umukashi wakwe, kano pa mulandu wa bulalelale, no kuupa umbi, acita ubucende.” (Mateo 19:4-6, 9) Ifi fyalandwa fyalanga ukuti ukukwatilapo abakashi na bambi bucende na bo bwine.

Lelo mulandu nshi impali shasuminishiwe ku kale? Ibukisheni ukuti Yehova te watile kube mpali. Uwabalilapo kulumbulwa mu Baibolo ukuti akwete abakashi abengi ni Lameke, intuntuko ya kwa Kaini. (Ukutendeka 4:19-24) Ilyo Yehova aletele Ilyeshi mu nshiku sha kwa Noa, Noa na bana bakwe batatu bonse bakwete fye umukashi umo umo. Bonse abaupile mpali balyonawilwe mu Lyeshi.

Imyaka iingi pa numa ilyo Yehova asalile uluko lwa bena Israele ukuba bantu bakwe, ninshi kale kale baloopa impali, nelyo cimoneka kwati icaseekele sana kukwata fye umukashi umo. Lesa talefwaya indupwa sha mpali ukupaswa. Lelo, apeele amafunde ya kulama uyu musango.—Ukufuma 21:10, 11; Amalango 21:15-17.

Ifyalandile Yesu ne fyalandile umutumwa Paulo uwapuutilwemo no mupashi wa mushilo pa bufwayo bwa kwa Yehova ubwa pa kubala pa cupo filangilila ukuti ukuupa impali kwalekelelwe fye pa kashita. Umutumwa Paulo atile: “Umwaume onse abe no mukashi wakwe wine kabili umwanakashi onse abe no mulume wakwe wine.” (1 Abena Korinti 7:2) Paulo alipuutilwemo na pa kulemba ukuti uwasontwa ukuba kangalila nelyo umubomfi utumikila mu cilonganino ca Bwina Kristu afwile ukuba “umulume wa mukashi umo.”—1 Timote 3:2, 12; Tito 1:6.

E ico ukulekelela kwa kwa Yehova ukwa kuupe mpali kwapwile ilyo icilonganino ca Bwina Kristu capangilwe imyaka 2,000 iyapitapo. Pali ilya nshita, icipimo ca cupo caishileba filya fine cali pa kabala ntanshi ilyo Lesa abumbile umwaume no mwanakashi: umulume umo, umukashi umo. Ici e cipimo ca bantu ba kwa Lesa mwi sonde lyonse lelo.—Marko 10:11, 12; 1 Abena Korinti 6:9, 10.