Icisansamushi ku Balekuuta Mutuule

BAIBOLO te citabo cilanda pa butuntulu bwa muntontonkanya. Lelo, ilatusansamusha kabili ilatwafwa ukuipakisha ubumi nangu tuli na mafya. Ukwabula ukulamba, Amalembo yatila: “Umuntu uwafyalwa ku mwanakashi wa nshiku shinono, kabili uwaisulamo ukutenkana.” (Yobo 14:1) Ukukanapwililika kwesu kulalenga tulekwata amafya yamo. Lelo bushe nani sana sana uwalenga abantu ukucula?

Baibolo ita uyo muntu ukuti mupashi ubifi uwitwa Kaseebanya kabili Satana. ‘Alufya aba pano isonde bonse’ kabili e ulenga amafya ayengi ayaponena abantu. Lelo, Baibolo itweba no kuti inshita yakwe ileya ilepwa. (Ukusokolola 12:9, 12) Nomba line amafya yonse ayo Satana aleta pa bekashi ba mu calo yakapwa ilyo Lesa akanyantukilamo. Nga fintu Baibolo ilanda, ukucula kukapwa mu calo cipya ica bulungami ico Lesa alaya.—2 Petro 3:13.

Mwandi cilasansamusha ukwishiba ukuti ukucula kwa bantunse kwa pa kashita fye akanono! Ilyo Ubufumu bwa mu muulu ubwa kwa Lesa bukalateka, ubukalatungululwa na Yesu Kristu, ulufyengo no kucula fikapwa. Ukulanda pa Mfumu yasontwa iya kwa Lesa, Amalembo yasoso kuti: “Pantu ipokololo mubusu uwakuuta, no mulanda, no ushikwete wa kumwafwa; ilililo bulanda umulanda no mubusu, ne myeo ya babusu ilapususha: ilubule myeo yabo mu kunyanyantilwa na mu kufyengwa; no mulopa wabo walifinisha mu menso ya iko.”—Amalu. 72:12-14.

Inshita aya mashiwi ya kusesema yakafikilishiwa naipalama nga nshi. Tukaipakisha ubumi bwa muyayaya mwi sonde lya paradise umo ifintu fikawama. (Luka 23:43; Yohane 17:3) Ukwishiba aya malayo yashaiwamina aya mu Malembo kupeela isubilo ne cisansamushi ku balekuuta mutuule.

[Abatusuminishe Ukubomfya Icikope pe bula 32]

Umukashana wapopomenwa: Icikope ca ba ILO/J. Maillard