Ico Ifyuni Fingatusambilisha

“LOLEKESHENI ifyuni fya mu muulu, pantu tafitanda imbuto nelyo kuseepa nelyo kututila mu matala; na lyo line Shinwe wa mu muulu alafiliisha. Bushe tamwaficila ukucindama?” (Mateo 6:26) Yesu Kristu alandile aya mashiwi mu lyashi lyalumbuka ilyalandilwe ku mbali ya lupili mupepi na Bemba wa Galili. Abakutikeko te bakonshi bakwe fye iyo. Ibumba likalamba ilya bantu bali na maka ya kuba basambi bakwe ukufuma konse konse balisangilweko. Ubwingi bwa aba bantu baali bapiina abaleteele Yesu abalwele ukuti abondape.—Mateo 4:23–5:2; Luka 6:17-20.

Pa numa ya kuundapa abalwele bonse, Yesu atendeke ukubomba umulimo wacindama uwa fya ku mupashi. Pa masambililo asambilishe, pali isambililo lilandilwepo kale pa kutendeka.

Ifyuni fya mu muulu fyabako ukutula na kale. Fimo filya ifishishi, fimbi filya ifisabo ne nseke. Nga ca kuti Lesa alapekanishisha ifyuni ifya kulya fyafule fi, kanshi kuti aafwa ababomfi wakwe abantunse ukusanga ifya kulya cila bushiku. Kuti nalimo acita ci ukupitila mu kubafwa ukusanga incito pa kuti bakwate indalama sha kuliilamo. Nelyo limbi kuti abalenga ukutunguluka ukulima ifya kulya. Kumfwa mu nshita ya kubulisha, Lesa kuti alenga abena mupalamano ba cikuku ne fibusa ukwakana ifya kulya na bashikwete.

Fingi twingasambilila nga twalolekesha pa fyo ubwikalo bwa fyuni bwaba. Lesa abumba ifyuni na mano ya cifyalilwa aya kupapusha aya kupanga ifisansala umo fingasungila abana. Moneni imisango ibili iya fisansala. Icikope cili ku kuso cisansala ca kamimbi. Kapangila icisansala pa muulu we bwe nelyo ku cibumba ca ng’anda. Umutenge wa fisansala ifi cilibwe caba nge cintelelwe nelyo, nge fi cilangililwe mu cikope, mwi samba ya malata ya ng’anda. Pa nshi ya cisansala kamasapo amatipa na matipa yabumbwa ayapala kapu. Fyonse fibili akalume na kakota filabombesha ukuleta amatipa no yu mulimo kuti nalimo wapoosa ukucila pa mweshi umo. Lyene icisansala cilabikwamo icani na masako ya fyuni. Wishi na nyina balaletelako utwana ifya kulya. Icikope cili pe samba cisansala ca cisokopela. Aka koni kabombesha aka mu Africa kapanga icisansala ukubomfya icani nelyo ifimenwa fimbi. Kuti kapwisha icisansala mu bushiku bumo kabili limbi kuti kapanga ifisansala ukucila pali 30 mu ciputulwa cimo ica nshita ya mwaka!

Cinshi twingasambililako? Nga ca kuti Lesa alapeela ifyuni ukulamuka kwaba ngo ku ne fisolobelo fya kupangila ifisansala ifingi, cine cine kuti aafwa ababomfi bakwe abantunse ukukwata ing’anda. Nangu cibe fyo, Yesu alandile ukuti kwaba na cimbi icikabilwa nga tulefwaya Yehova Lesa atwafwe kusanga ifyo tukabila lwa ku mubili. Yesu alaile ati: “E ico, mulefwaya intanshi ubufumu no bulungami bwakwe, na fyonse ifi fimbi fikalundwako kuli imwe.” (Mateo 6:33) Napamo kuti mwaipusha amuti ‘Nga kanshi ukufwaya Ubufumu bwa kwa Lesa intanshi calola mwi?’ Inte sha kwa Yehova, abananya uyu magazini, kuti batemwa ukwasuka ico cipusho.