“Palameni Kuli Lesa, Na o Akapalama Kuli Imwe”

Ubumi pa Ntanshi na pa Numa ya Kusambilila Baibolo—Ubumi Bwakwe Bwalyalwike Umupwilapo

MWANDI imikalile ya kwa Matsepang yalibipile kabili yali iyabulamo akantu! Uyu mukashana aleikala mu Lesotho, icalo cabela pa kati ka calo ca South Afrika. Matsepang akuliile mu Katolika. Ukucila ukumwafwa ukupalama kuli Lesa, pa myaka iingi abashimbe banakashi aba fya mapepo balemucenda. Balemupeela indalama pa kumubeleleka ukucita ifya bupulumushi.

E ico, imipepele yafishishe Matsepang ku mutima kabili tasumine ukuti kwaliba Kalenga wa kutemwa uusakamana bwino ifibumbwa fyakwe ifya buntunse. Pa mulandu wa fyo alekeleshiwe no kucendwa, Matsepang alelunguluka icine cine kabili aleyumfwa uushacindama. Alekula uwa lukakaala kabili umukali. Ici camulengele ukuba ntalamisoka.

Mu kuya kwa nshita, Matsepang aipoosele mwi bumba lya bamukukulu baleibila abantu mu mashitima. Balimwikete no kumupoosa mu cifungo ca mu South Afrika. Kuli pele pele, bamutwele ku calo cakwe, ku Lesotho, uko ailekonkanyapo na buntalamisoka, bucakolwa, ulukakaala, na bucisenene.

Ilyo apopomenwe sana, Matsepang alipepele sana kuli Lesa ukuti amwafwe. Alaile ukuti, “mwe Lesa, nga napusuka, nkamubombela na maka yandi yonse.”

Tapakokwele, bamishonari baNte sha kwa Yehova babili balimutandalile. Bamwebele ukusambilila nao Baibolo. Ifyo alesambilila fyamulengele ukukutuluka ukuti Lesa taba uushayangwako kabili uushisakamana. Na kuba ailwike ukuti Satana, “wishi wa bufi,” abomfya imicenjelo ne nshila sha kufutika ku kulenga bamo ukuyumfwa ukuti tabacindama no kubalenga ukusumina ukuti Yehova te kuti abatemwe.—Yohane 8:44; Abena Efese 6:11.

Ukupusanako na fintu aishibe, Matsepang alisansamushiwe ilyo asambilile ukuti kuti twacindikwa nga twalapila imembu shesu isha kale, twalomba Lesa ukutwelela, no kubombesha pa kuti tumusekeshe! Alyafwiwe ukumfwikisha ukuti “Lesa mukalamba ukucila imitima yesu” kabili ifyo atumona fyalipusana ne fyo tuimona fwe bene.—1 Yohane 3:19, 20.

Matsepang alitemenwe sana pa kubelenga amashiwi ya kwa kemba wa malumbo, Davidi, ayatila: “Yehova aba mupepi na ku baputuke misana, kabili abafunshike mitima alabapususha.” (Amalumbo 34:18) Apo na o ali pa bantu “abaputuke misana,” akutulwike ukuti Yehova talekelesha ababomfi bakwe, nangu line bamo balapopomenwa nelyo ukuyumfwa abashacindama. Alitemenwe sana pa kuumfwa ukuti Lesa alasakamana impaanga shakwe shonse kabili alashipuupuutula  mu nshita sha mafya. (Amalumbo 55:22; 1 Petro 5:6, 7) Amashiwi yamufikile pa mutima sana ya kuti: “Palameni kuli Lesa, na o akapalama kuli imwe.”—Yakobo 4:8.

Amaka Icebo ca kwa Lesa, Baibolo, cakwata, mu kwangufyanya yatendeke ukumonekela mu mikalile ya kwa Matsepang. Ayambile ukusangwa ku kulongana kwa Bwina Kristu lyonse kabili alekele ifyo alecita ifishumfwana na malembo. Cinshi catumbwikemo? Tayumfwa nomba ukuti tawaminwa ukutemwa no kusenamina kwa kwa Lesa. Ukutula apo abatishiwilwa no kuba Inte ya kwa Yehova, alibomba imintapendwa ya maawala mu butumikishi bwa Bwina Kristu nga kasabankanya wa mbila nsuma iya Bufumu. Te mulandu ne fyo alelunguluka kale, Matsepang nomba ali ne nsansa kabili imikalile yakwe yaliwama. Mwandi ubu bushininkisho bwa kuti Baibolo yalikwata amaka ya kuwamya imikalile!—AbaHebere 4:12.

[Amashiwi pe bula 9]

“Mwe Lesa, nga napusuka, nkamubombela na maka yandi yonse”

[Akabokoshi pe bula 9]

Ifishinte fya mu Baibolo Filabomba

Ifishinte fya mu Baibolo fimo ifyalenga abacendelwe ukusansamuka ni fi:

“Pa kuba ayengi muli ine amatontonkanyo ya kunsakamika, ifya kusansamusha fyenu [ifya kwa Lesa] finengo kupekwa.” (Amalumbo 94:19) “Ifya kusansamusha” fya kwa Yehova ifisangwa mu Cebo cakwe e ntulo ya cisansamushi cine cine. Ukutontonkanya pali fyene ilyo muleetetula no kupepa kulaafwa ukufumyapo amatontonkanyo yasakamika no kukosha icitetekelo muli Lesa nga Cibusa uutumfwikisha.

“[Yehova] E uposha abafunike misana, kabili e ukaka pa filonda fyabo.” (Amalumbo 147:3) Nga tulatasha pa luse lwa kwa Yehova ne fyo ateyanya pa kuti afimbe pa membu ukupitila mwi lambo lya cilubula ilya kwa Yesu, kuti twacetekela pa kulanda na Lesa ukwabula ukuyumfwa aba mulandu mu mutima. Ici kuti caleta insansa shapulamo no kukanasakamikwa.

“Takuli uwingesa kuli ine [Yesu Kristu] kano Tata uwantumine, amukula; kabili nkamubuusha mu bushiku bwa kupelelekesha.” (Yohane 6:44) Ukupitila mu mupashi wakwe uwa mushilo no mulimo wa kushimikila pa lwa Bufumu, Yehova umwine alatukulila ku Mwana wakwe no kutupeela isubilo lya mweo wa muyayaya.