Ilyashi Lya Bakabilisha ba Bufumu

“Baleumfwa” Ubukombe bwa Bufumu mu Brazil

PA KUTI babilishe imbila nsuma iya Bufumu mu bwikashi bwa Bankomamatwi, Inte sha kwa Yehova abengi mu Brazil balisumina ukucita icintu cayafya ica kusambilila Ululimi lwa Bankomamatwi Ulwa Cina Brazil. Ukubombesha kwabo kuletumbukamo ifisuma, nge fyo ifyakukumanya fyakonkapo filelanga.

Eva, * nkomamatwi umwanakashi mu São Paulo, atendeke ukusambilila ululimi lwa bankomamatwi pa numa wena na bana bakwe batatu batendeke ukwikala no mwaume nkomamatwi. Pa mashitolo, Eva no munankwe umwaume bakumenye ibumba lya Nte bankomamatwi ababalaalike ku kulongana pa Ng’anda ya Bufumu. Balisumine, apo batontonkenye ukuti kwali no kuba kubungana kwa kwangalila capamo.

Eva taumfwikishe ifyalelandwa ku kulongana pantu taishibishe ululimi lwa bankomamatwi. Pa numa, baNte abengi bamulaalike ku ng’anda ku mwabo ku kulya utwa kulya twayanguka. Ukubomfya ifikope muli broshuwa wa Ipakishe Ubumi pe Sonde kuli Pe na Pe!, balondolwele ubulayo bwa kwa Lesa ubwa paradise wa pe sonde uwa ku ntanshi. Eva alitemenwe ifyo asambilile kabili atendeke ukusangwa ku kulongana lyonse.

Tapakokwele sana, Eva alekele ukwikala na cibusa wakwe umwaume pa kuti ekalile ku fipimo fya Baibolo. Te mulandu no kukaanya kwakaluka ku ba mu lupwa lwakwe, alitwalilile ukulunduluka lwa ku mupashi kabili abatishiwe mu 1995. Pa numa ya myeshi 6, Eva alembeshe ukuba painiya, nelyo kabilisha wa Bufumu uwa nshita yonse. Ukutule lyo alyafwilisha bankomamatwi bane ukufika ku kuipeela no lubatisho.

Carlos afyelwe nkomamatwi. Ukufuma ku bwaice aitumpile mu miti ikola, bucisenene, no bupuupu. Lintu asanshilwe ku bali mwi bumba limbi ilya bamukukulu, abutukile ku São Paulo kabili aikele na João pa nshita inono. Ukupala Carlos, João ali ni nkomamatwi kabili aleikala imikalile ya bucisenene.

Ilyo papitile imyaka, Carlos asambilile ubukombe bwa Bufumu, ubwamulengele ukuwamya imikalile yakwe no kulembesha icupo cakwe mwi funde. Pa numa ya kukumanisha ififwaikwa fya mu Malembo, Carlos alibatishiwe ku kulangisha ukuipeela kwakwe kuli Yehova. Pali iyi ine nshita, Carlos taishibe ukuti João na o alyumfwile imbila nsuma, no kuti na o alyalwike nga nshi mu mikalile yakwe. Lintu asambilile ukuti Yehova tasuminisha ukubomfya ifipasho, João apoosele ifipasho fyakwe fyonse ifya “batakatifu.” Pa numa alekele imikalile ya kale, João na o alibatishiwe.

Mwandini Carlos na João bali ne nsansa ishingi ilyo bakumene pa Ng’anda ya Bufumu no kumona ifyo bonse bayalwike! Bonse babili pali lelo mitwe ya ndupwa iyashintililwapo kabili balebomba nga bakabila ba Bufumu abapimpa.

Mu Brazil, pali nomba mwaba ifilonganino fya lulimi lwa bankomamatwi 30 na mabumba 154, umwaba bakasabankanya ukucila 2,500, pali aba 1,500 ni bankomamatwi. Pe Bungano lya Citungu mu Brazil ilya mu 2001 ilyaleti “Bakasambilisha wa Cebo ca kwa Lesa” ilya bankomamatwi, ukucila pali 3,000 balisangilweko, kabili 36 e babatishiwe. Pa mulandu we paalo lya kwa Yehova, tuleenekela ukuti bankomamatwi na bambi abengi bakomfwo bukombe bwa Bufumu.

[Futunoti]