Bakasambilisha wa Cebo ca kwa Lesa Bacincishiwa Ukufikilisha Umulimo Bapeelwa

IMINTAPENDWA ya bakasambilisha babungene ku kusambilishiwa muli iyi myeshi yafumako. Ukutendeka mu mweshi wa May mu 2001, balongene pa Mabungano ya Citungu aya Nte sha kwa Yehova ayali mwi sonde lyonse ayakwete umutwe waleti “Bakasambilisha wa Cebo ca kwa Lesa.” Abasangilwe pali aya mabungano bacincishiwe ukuisambilisha, ukuba abafikapo ukusambilisha, no kufishapo umulimo wabo uwa bukasambilisha.

Bushe e ko mwali kuli uku kulongana? Nga e ko mwali, ukwabula no kutwishika mwalitashishe nga nshi pa ca kulya ca ku mupashi icishaiwamina icapeelwe pali uku kulongana apabungene abantu ku kupepa Lesa wa cine, Yehova. Mukwai mutukonke nga pa lwendo ilyo twalatendeka ukupituluka muli programu wa kusambilisha uwali pali aya mabungano.

Ubushiku bwa Kubalilapo—Amalembo Yapuutwamo ya Mulimo ku Kusambilisha

Ceyamani we bungano alisansamwike pa kusengela abaishile kwi bungano ilyo alandile ilyashi lyaleti “Mwe Bakasambilisha wa Cebo ca kwa Lesa, Sambilileni.” Icalengele ukuti Yesu Kristu abe Kasambilisha Mukalamba ni co asambilile kuli Yehova, “Kasambilisha Wapulamo.” (Esaya 30:20, NW; Mateo 19:16) Nga tuli no kulunduluka ukuba bakasambilisha wa Cebo ca kwa Lesa, ne fwe bene tufwile ukusambilila kuli Yehova.

Pakonkele ilyashi na limbi ilyaleti “Ukusambilisha Bambi pa lwa Bufumu Kulaleta Ifisabo Fisuma.”  Insansa na mapaalo ifyaba mu kupanga abasambi fyalikomailwepo ilyo kwali ukulanshanya kwa kwipusha na bakasambilisha ba Cebo ca kwa Lesa babelesha.

Pakonkele lyashi lya kulenga ukuti wacitapo cimo ilyo walyumfwa ilyaleti “Ukucincishiwa ku ‘Fikalamba fya kwa Lesa.’” Mu mwanda wa myaka uwa kubalilapo, “ifikalamba” fya Bufumu bwa kwa Lesa fyalengele abantu ukucitapo cimo. (Imilimo 2:11) Ne fwe bene kuti twalenga abantu ukucitapo cimo ilyo tulebilisha “ifikalamba” pamo nge fisambilisho fya mu Malembo pa lwa cilubula, ukubuushiwa, na pa cipingo cipya.

Ilyashi lyakonkelepo lyakoseleshe bonse ati “Bekelweni Ubulungami bwa kwa Yehova.” (Amalumbo 35:27) Tulafwiwa ukukonkelela ubulungami pa kusambilila ukutemwa icalungama no kupata icabipa, pa kusambilila Baibolo, pa kutukuta ukucincintila ifingonaula bumupashi bwesu, na pa kulundulula ukuicefya. Ukucite fi kuti kwatwafwa ukuicingilila ku kubishanya kubi, ku kufwaisha ifya pano isonde, na ku fyakusekesha ifishasanguluka kabili ifya lukaakala.

Ilyashi likalamba ilyaleti, “Abateyanishiwa nga Bakasambilisha wa Cebo ca kwa Lesa,” lyatucinkwileko kuti Yehova alatulenga twafikapo ukuba abatumikishi bakwe ukupitila mu Cebo cakwe, mu mupashi wakwe uwa mushilo, na mu kuteyanya kwakwe ukwa pe sonde. Nga ni ku kubomfya Icebo ca kwa Lesa, kalanda atucincishe ati: “Ubuyo bwesu bwa kufumya ubukombe bwalembwa pa mapepala ya mu Baibolo no kububika mu mitima ya bakomfwa besu.”

Ilyashi lya kukonkana ilya kubalilapo pali ili bungano lyaleti “Ukuisambilisha Ilyo Tulesambilisha Bambi.” Ulubali lwa kubalilapo muli ili lyashi lwakomaile pa kuti tufwile ukuba no musangwela umo wine uwa Bwina Kristu nga ulya wine tusambilisha kuli bambi. Ulubali lwakonkelepo lwatucincishe ‘ukulungiko kusose cebo ca Cine.’ (2 Timote 2:15) Pa kuti tuisambilishe, umukoosha wa kusambilila Baibolo lyonse walicindama, te mulandu ne myaka twabombela Lesa. Ulubali lwa kulekeleshako lwatulengele ukwishiba ukuti Kaseebanya alebebeta ifwe ukumona nga kuti asangamo imibele pamo nga icilumba, bucipondoka, ukuimona uwacindama, akalumwa, akafindwe, icilulo, ukukalifiwa, no kufwailisha ifilubo. Lelo, nga twatukuta ukukaanya Kaseebanya, akafulumuka kuli ifwe. Pa kuti  tumukaanye, tufwile ukupalama kuli Lesa.—Yakobo 4:7, 8.

Ilyashi lyalandile pa filecitika ilyaleti “Pateni Umusango Useekele Uwa Kutamba Ifye Shiku” lyatulangile ifya kucincintila ici cimusango cingonaula bumupashi bwesu. Kasesema Habakuki alandile pali Yehova ati: “Mwaba na menso ayasanguluka, tamwingalolesha pa bubi, kabili tamwingamona pa bupondamishi.” (Habakuki 1:13) Tufwile ‘ukupato bubifi.’ (Abena Roma 12:9) Abafyashi balicincishiwe ukulamona ifyo abana babo balebomfya Intaneti ne fyo baletamba pa TV. Kumfwa ku batamba ifye shiku, kalanda atile, bafwile ukuya ku banabo bakosoka lwa ku mupashi ukuti bafwiwe. Kabili kuti cayafwako nga tuleetetula no kusungila ku mutwe amalembo pamo nga Amalumbo 97:10; Mateo 5:28; 1 Abena Korinti 9:27; Abena Efese 5:3, 12; Abena Kolose 3:5; na 1 Abena Tesalonika 4:4, 5.

Ilyashi lyakonkelepo ilyaleti, “Lekeni Umutende wa kwa Lesa Umulinde,” lyatusansamwishe ne cilayo ca kuti ilyo kwaba ifya kutulenga ukusakamikwa, kuti twapoosa icisendo cesu pali Yehova. (Amalumbo 55:22) Nga twapepa no kupongolola icili ku mutima, Yehova akatupo “mutende wa kwa Lesa,” e kutila ukukanasakamikwa no kwikala ku matwi tondolo pa mulandu wa kuba na bucibusa bwa pa mutima na wene.—Abena Filipi 4:6, 7.

Ubushiku bwa kubalilapo bwasondwelele ne lyashi lyalengele abasangilweko ukusekelela ilyaleti “Yehova Acindamika Abantu Bakwe ku Lubuuto,” ilyasopolwele ukufikilishiwa kwa kwa Esaya icipandwa 60. Mu calo ca ndakai icili mu mfifi, “bambi bambi,” e kutila ibumba likalamba ilyapale mpaanga ililekulilako fye, baleipakisha ulubuuto lwa kwa Yehova capamo na Bena Kristu basubwa. Ilyo kalanda afikile pa fikomo 19 na 20, atile: “Yehova ‘takawe’ nga filya fiwa akasuba nelyo ‘ukutobolwa’ ifyo umweshi utobolwa.” Akakonkanyapo ukucindamika abantu bakwe pa kulengo lubuuto ukubalikila pali bene. Awe mwandini ubu bulayo busuma kuli ifwe ilyo tuleikala mu nshiku sha kulekelesha isha cino calo caba mu mfifi!” Ku nsondwelelo ye lyashi, kalanda abilishe ukuti icitabo ca Ukusesema kwa kwa Esaya—Ulubuuto lwa Bantu Bonse Volyumu 2 nomba e ko cili. Bushe mwalipwa ukubelenga ulu lupapulo lupya?

Ubushiku bwa Cibili—Abafikapo Bwino Bwino ku Kusambilisha Bambi

Pa numa ya kulanshanya ilembo lya bushiku no bushiku ubushiku bwalenga shibili, twalipooseleko amano ukukutika ku lyashi lya kukonkana ilyalenga yabili pali lilye bungano ilyaleti, “Bakapyunga Abalenga Bambi Ukutetekela.” Bakalanda batatu abakwete ili lyashi lya kukonkana bakomaile pa fintu fitatu ifikabilwa pa kwafwa abantu ukutetekela, ne fi fintu fyaba kwananya ubukombe bwa Bufumu, ukwangwa umuntu, no kusambilisha abalefwaisha ukusambilila ukumfwila ifyo Kristu alandile. Ukulanshanya kwa kwipusha no kwesha ifyo cali kwatwafwile ukumona ifyo twingasambilisha bambi ukuba abasambi.

Ilyashi lyakonkelepo lyaleti “Ku Kushipikisha Lundeniko Bukapepa.” Kalanda atile icacindamisha  ca kutila ‘twashipikisha ukufika na ku mpela.’ (Mateo 24:13) Tufwile ukubomfya fyonse ifyo Lesa atuteyanishisha, e kutila ipepo, isambililo lya pa lwesu, ukulongana, no butumikishi, pa kuti tulundulule bukapepa. Tufwile ukucilikila ifya pano isonde ukuti fitwingilila nelyo ukonaula bukapepa bwesu.

Ni shani fintu abantu abacucutika kabili abafinwa bengasanga ukutusha lelo? Ilyashi lyaleti “Sangeni Ukutusha mwi Koli lya kwa Kristu” lyayaswike ico cipusho. Yesu aitile abakonshi bakwe ukuti basende ikoli lyakwe no kusambilila kuli wene. (Mateo 11:28-30) Kuti twasenda ikoli lya kwa Yesu pa kwesha ukupashanya imikalile yakwe iyayanguka, iishali iya butukami. Ifishinka fikalamba ifya ili lyashi fyakomailwepo mu kulanshanya kwa kwipusha abantu abayangusha imikalile yabo.

Icikalamba cimo icibako pa kulongana kukalamba ukwa Nte sha kwa Yehova kubatisha ababomfi ba kwa Lesa abaipeele fye nomba line. Munyinefwe uwalandile ilyashi lyaleti “Ulubatisho Lutungulula ku Mashuko Yakalamba aya Kusambilisha” asengele abali no kubatishiwa no kubeba ukuti ilyo babatishiwa bakabombeko imilimo iingi. Bakasambilisha bapya aba Cebo ca kwa Lesa ababatishiwe abakumanisha ififwaikwa fya mu Malembo kuti batinamina imilimo iingi mu cilonganino.

“Pashanyeni Kasambilisha Mukalamba” e lyashi lyabalilepo mu cungulo. Imyaka ishishibantu ilyo ali mu muulu, Yesu alelolekesha no kupashanya Wishi, e calengele no kuti abe Kasambilisha Mukalamba. Ilyo ali pano isonde, alebomfya inshila sha kusambilishishamo ishisuma, pamo nga ifipusho fifika pa mutima ne filangililo fyayanguka kabili ifyalondoloka. Ifisambilisho fya kwa Yesu fyalefuma mu Cebo ca kwa Lesa kabili alecincimuka pa kulanda, alelanda bwino, kabili alelanda na maka. Bushe tatwafwaile ukupashanya Kasambilisha Mukalamba?

Ilyashi na limbi ilya kulenga ukuti wacitapo cimo lyaleti, “Bushe Mwaliba Abaitemenwa Ukubombela Bambi?,” lyatukoseleshe ukupashanya Yesu mu kubombela bambi. (Yohane 13:12-15) Kalanda acincishe abaume bafikapo ukwabula no kubapita mu mbali ukuti bafwile ukuba nga Timote ukufwaisha ukubombela bambi. (Abena Filipi 2:20, 21) Abafyashi balikoseleshiwe ukupashanya Elkana na Hana ukwafwilisha abana babo ukukonkelela umulimo wa nshita yonse. Abacaice nabo balikoseleshiwe ukupashanya Yesu Kristu na Timote wacaice pa kuipeela abene ukuti babomfiwe. (1 Petro 2:21) Ifyebo fyalandile ababombela bambi fyalitufikile pa mutima.

Ilyashi lya kukonkana ilyalenga yatatu lyaleti “Nonkelenimo nga Nshi mu Masambililo ya Bulesa.” Kalanda akomaile pa busuma bwa kukushako inshita tupoosako amano pa kubelenga ukwabula ukupumfyanishiwa. Pa kufika pali ubu buyo, tufwile ukutendekela ne sambililo lya pa lwesu ilya pa nshita fye iinono kabili mu kupita kwa nshita ukwesha ukulundako inshita ye sambililo. Akoseleshe abali mwi bumba ukulabelenga amalembo no kulemba ifishinka pa kulongana. Kalanda wa cibili atucinkwileko umulandu tufwile ukukonkela “icipasho ca fyebo fituntulu.” (2 Timote 1:13, 14) Pa kuti tuicingilile kuli bucisenene bulangwa pa TV, ku mano ya buntunse, ku kulengulula, na ku fisambilisho fya basangu, tufwile ukusanga inshita ye sambililo lya pa lwesu ne ya kusangwa ku kulongana. (Abena Efese 5:15, 16) Kalanda wa kulekeleshako muli ili lyashi lya kukonkana akomaile pa kukabila kwa kubomfya ifyo tulesambilila pa kutila twingamwenamo sana mu masambililo ya bulesa.—Abena Filipi 4:9.

Twalitemenwe icine cine ukukutika ku lyashi lyaleti “Ifintu Ifipya Ifya Kutwafwa Ukulunduluka lwa ku Mupashi”! Twalisekelele ukwishiba ukuti icitabo cipya icikwete umutwe wa kuti Nonkelenimo mu Masambililo ya mwi Sukulu lya  Butumikishi Ilya Bulesa cili no kusabankanishiwa nomba line. Twalefwaya nga nshi ukumona ici citabo ilyo kalanda alelondolola ifyabamo. Ukulanda pa lubali lwa ici citabo ululanda pa kufunda kwa milandile, kalanda atile: “Ici citabo cipya tacilembelwe nge buuku lya ku calo lelo inshila cilandiilemo pa masambililo 53 aya kubelenga kusuma, ukulanda, no kusambilisha, ishimpilwe pa fishinte fya mu Malembo.” Ici citabo cikatulanga ifyo bakasesema, Yesu, na basambi bakwe bali abalamuka mu misambilishishe yabo. Ca cine, tatuletwishika ukuti ici citabo ne mbali shipya ishe Sukulu lya Butumikishi bwa Teokrasi shikatwafwa ukuba bakasambilisha basuma aba Cebo ca kwa Lesa.

Ubushiku bwa Citatu—Beni Bakasambilisha pa Mulandu wa Kupite Nshita

Pa numa ya kulanshanya ilembo lya bushiku no bushiku pa bushiku bwa kulekeleshako, bonse balipooseleko amano ku lyashi lya kukonkana ilya kulekelesha ilyaleti, “Ukusesema kwa kwa Malaki Kutupekanishisha ku Kwisa kwa Bushiku bwa kwa Yehova.” Malaki aseseme nalimo imyaka 100 pa numa abaYuda bafumine ku Babele. Na kabili balisensenwinwe mu busangu na mu bubifi, ukusaalula ishina lya kwa Yehova pa kusuula amalango yakwe ayalungama na pa kutuule lambo lya nama ishapofula, ishalemana, ne shalwala. Cimbi na co, baleleka abakashi babo aba ku bulumendo, pa kutila bope abanakashi abena fyalo.

Icipandwa ca kubalilapo ica kusesema kwa kwa Malaki citweba ukuti Yehova alitemwa abantu bakwe. Cikomaila pa busuma bwa kuba na katiina kuli Lesa e lyo no kukatamika ifyashila. Yehova enekela ifwe ukumupeela ifyawamisha, ukumupepa pa mulandu wa kuti twalimutemwa. Tatufwile ukubombela fye ico cine umulimo washila, kabili tukalubulula kuli Lesa.

Kalanda wa cibili mu lyashi lya kukonkana alandile pa fyo twingabomfya icipandwa 2 ica kwa Malaki pali lelo ilyo aipwishe ati: “Bushe pa lwesu tulapempwila pa kuti ‘mu milomo yesu mwisangwa ubupondamishi’?” (Malaki 2:6) Abasambilisha mu cilonganino bafwile ukushininkisha ukuti ico balesosa cilefuma mu Cebo ca kwa Lesa. Tufwile ukupata ukufutika kwa musango yo ngo kwa kulekana apashili umulandu wine wine.—Malaki 2:14-16.

Ukulanda pa mutwe waleti “Nani Akapusuka Ubushiku bwa kwa Yehova?” kalanda wa kulekelesha muli ili lyashi lya kukonkana atwafwile ukuipekanisha ubushiku bwa kwa Yehova. Kalanda atile: “Mwandi cilasansamusha ababomfi ba kwa Yehova ukwishiba ukuti Malaki icipandwa 3,  icikomo 17, ilefikilishiwa pali bene! Itila: ‘“Bakaba bandi, icikwatwa candi icaibela,” e fyo asosa Yehova wa milalo, “mu bushiku umo ine nkacitamo; kabili nkabalanguluka, ifyo umuntu alanguluka umwana wakwe umwaume uumubombela.”’”

Icikalamba na cimbi icaliko pali ili bungano cilangililo ca nkansu icaleti “Cindikeni Ubutungulushi bwa kwa Yehova,” umwali abana ba kwa Kora. Nangu ca kuti shibo ali ne mibele ya bucipondoka kuli Mose na Aarone, bena bali na bucishinka kuli Yehova na ku beminishi bakwe. Ilyo Kora na bakonshi bakwe balobele, abana ba kwa Kora bene balipuswike. Ilyashi lyakonkelepo ilyaleti, “Nakileni ku Butungulushi bwa kwa Lesa Muli Bucishinka,” lyalandile pa fyo ifwe umo umo twingomfwila ifyali mu cilangililo. Kalanda atusokele mu mbali 6 umo Kora na bakonshi bakwe bashacitile bwino: tabatungilile ubutungulushi bwa kwa Yehova muli bucishinka; balekele icilumba, ukufwaya ukulumbuka, na kalumwa ukubansha; balelanda pa filubo fya basontwa na Yehova; balundulwile umutima wa kuilishanya; basuulile imilimo bapeelwe; kabili balekele ifibusa nelyo balupwa ukuba pa ntanshi ukucila ukuba na bucishinka kuli Yehova.

“Ni Bani Balesambilisha Inko Shonse Icine?” wali e mutwe we lyashi lya cintubwingi. Icine calandilwepo cali, te cine ca cinkumbawile, lelo cine pa lwa bufwayo bwa kwa Yehova ubo Yesu Kristu abelele ubunte. Kalanda alandile pa cine ca fisumino, icine ca musango wa mipepele, ne cine pa lwa myendele. Pa numa ya kulinganya Abena Kristu ba mu mwanda wa myaka uwa kubalilapo ne Nte sha kwa Yehova isha muno nshiku, icisumino cesu ica kuti ‘Lesa aba muli ifwe’ calikoseleko icine cine.—1 Abena Korinti 14:25.

Pa numa ya kusupawila isambililo lya Ulupungu lwa kwa Kalinda ilya ulya mulungu, bakasambilisha wa cebo ca kwa Lesa bonse abasangilwe pali ili bungano balengelwe ukucitapo cimo mu lyashi lya kulekelesha ilyaleti, “Ukubomba Umulimo Wesu Uwa Kusambilisha mu Kucincila.” Ukupitulukamo ukwipi ukwa programu kwakomaile pa bucindami bwa kubomfya Amalembo pa kusambilisha, inshila isho twingabelamo bakasambilisha bafikapo, no mulandu tufwile ukucetekela icine tusambilisha bambi. Kalanda atucincishe ukulenga ‘ukulunduluka kwesu kumoneke’ no ‘kuimona fwe bene, ne sambilisho lyesu.’—1 Timote 4:15, 16.

Ala mwandini wali mutebeto wa ku mupashi uo twaipakishe pe Bungano lya Citungu ilya “Bakasambilisha wa Cebo ca kwa Lesa”! Shi natupashanye Kasambilisha wesu Uwapulamo, Yehova, na Kasambilisha wesu Umukalamba, Yesu Kristu, ilyo tulesambilisha bambi icebo ca kwa Lesa.

[Akabokoshi ne Fikope pe bula 28]

Impapulo Shipya Isha Kwafwa Umusango Umo Uwa Bantu

Abalongene pe Bungano lya Citungu ilya “Bakasambilisha wa Cebo ca kwa Lesa” balisekelele pa kupokelela impapulo shibili, ishili no kubafwa sana ukusambilisha abantu icine ca mu Malembo mu fyalo fimo. Trakiti atila Bushe Mwakwata Umupashi Uushifwa? akaafwa sana ukutendeka ukulanshanya na bantu abekala mu fyalo umo batila “umweo” no “mupashi” fyaba fye cimo cine. Uyu trakiti mupya alilondolola bwino ubupusano bwaba pa mupashi, uwaba maka, ne fibumbwa fya mupashi kabili alondolola ukuti abantu tabasanguka ifibumbwa fya mupashi ilyo bafwa.

Broshuwa wa A Satisfying Life—How to Attain It bamubilishe mu lyashi lya kusondwelela pa bushiku bwalenga shibili ubwe bungano. Uyu broshuwa alembeelwe ukutendekelamo amasambililo ya Baibolo na bantu abashaishiba ukutila Kabumba e ko aba kabili abashaishiba ukuti kwaliba icitabo icapuutwamo na Lesa. Bushe mwalilanshanyapo na bantu mu butumikishi ukubomfya ishi mpapulo ishipya?

[Ifikope pe bula 26]

Mu Milan, Italy, na pa mabungano yali mwi sonde lyonse, abantu abengi nga nshi balibatishiwe

[Icikope pe bula 29]

Icilangililo caleti “Cindikeni Ubutungulushi bwa kwa Yehova” cafikile amabumba pa mitima