Tuli Abakwate Citetekelo

Ukushimikila Ubukombe bwa Cisansamushi mu Italy

YEHOVA ni “Lesa wa cisansamushi conse.” Ababomfi bakwe balamupashanya ilintu ‘basansamusha abali mu ca bucushi conse.’ (2 Abena Korinti 1:3, 4; Abena Efese 5:1) Uyu waba mulandu umo pa milandu imbi iikalamba intu Inte sha kwa Yehova bashimikila.

Ukwaafwa Umwanakashi Umupiina

Pa mulandu wa bupiina, inkondo, no kufwaya ukwikalako bwino, abantu abengi mu myaka ya ndakai baya ku fyalo fyacilapo ubukankaala. Lelo cilabakosela ukubelesha imikalile ya bantu basanga kulya. Manjola aleikala na bena Albania bambi mu Borgomanero. Apantu aleikala mu Italy ukwabula insambu, aleumfwa umwenso wa kulanda na Wanda, Inte ya kwa Yehova. Nangu cibe fyo, Wanda na Manjola bapangene ukuti bakakumane pa kuti bengalalanshanyako, kabili Manjola alikwete ubuseko nga nshi ubwa kufwaisha ukusambilila Icebo ca kwa Lesa, te mulandu no bwafya bwa kukanaishiba ululimi lwa ku Italy. Pa numa ya kusambililako panono, Wanda talesangapo nelyo umo pa ng’anda. Cinshi cacitike? Lintu afwailishe bamwebele ukuti Manjola no mwaume uo aleikala nankwe balifyukile pantu umwaume balemufwaya bakapokola, ali no mulandu wa kwipaya umuntu!

Ilyo papitile imyeshi ine, Wanda akumene na Manjola. Wanda ebukisha ukuti: “Manjola alemoneka uwaundalila no konda, kabili umushishi wakwe walelangilila ukuti aali no bwafya.” Manjola aebeleko Wanda pa lwa kukakwa kwa mwaume aleikala na o na pa fyo ababiye bamusungile bubi bubi. Ilyo Manjola amwene ukuti ubucushi bwacilamo, apepele kuli Lesa ukuti amwaafwe. Lyena aibukishe Wanda, uwalandileko nankwe pa lwa Baibolo. Fintu Manjola atemenwe lintu akumenye Wanda na kabili!

Isambililo lya Baibolo lyalitwalilile, kabili mu kwangufyanya Manjola ayambile ukusangwa mu kulongana. Lintu aile mu kupoka insambu sha kwikala mu Italy balimusuminishe. Pa numa ya mwaka umo, Manjola alibatishiwe. Alisansamushiwe pa mulandu wa malayo aumfwile aya bulesa, kabili abwelelemo ku Albania uko nomba aleshimikila ubukombe bwa mu Baibolo ubwa cisansamushi ku bekashi banankwe.

Ukushimikila pa Kamba ka Balebeshi

Ababa mu filonganino ifingi mu Italy abapekanya ukulashimikila ku balebeshi pamo nga Manjola. Ku ca kumwenako, icilonganino caba mu Florence capekenye ukulatandalila akamba ka balebeshi lyonse. Impendwa iikulu iya bekashi ba pa kamba, bafumine ku Bulaya, ku Macedonia, na ku Kosovo, kabili aba  bantu balecula mu nshila shapusanapusana. Bamo balepepa ifikola nelyo ukukolwa ubwalwa. Abengi baleiba pa kusanga tumo uto balekabila.

Ukushimikila ubukombe kuli aba bantu kwali ukwayafya. Nangu cibe fyo, mu kupita kwa nshita Paola kashimikila wa mbila nsuma uwa nshita yonse alanshenye na Jaklina, umwanakashi wa ku Macedonia. Pa numa ya kulanshanya nankwe pa nshita ntali, na o akoseleshe Susanna umunankwe ukubebeta Baibolo. Susanna na o ashimikileko balupwa lwakwe bambi. Bwangu bwangu fye, abantu 5 ukufuma muli ulu lwine lupwa balesambilila Baibolo lyonse, ukusangwa mu kulongana, no kubomfya fintu balesambilila. Te mulandu na mafya balolenkene na yo, balasanga icisansamushi ukufuma kuli Yehova ne Cebo cakwe.

Umwanakashi Umushimbe wa fya Mapepo Apokelela Icisansamushi Ukufuma kuli Yehova

Mu musumba wa Formia, kabilisha wa mbila nsuma uwa nshita yonse uwe shina lya Assunta alandileko no mwanakashi uwalebilikita pa kwenda. Uyu mwanakashi umushimbe aali mwi calici lyaipeela ukwafwilisha abalwele kumo na balemana mu fipatala atemwa mu mayanda mu mwabo.

Assunta aebele uyu mwanakashi ukuti: “Na imwe bene mulemoneka kwati mulecula, bushe te ifyo? Ku ca bulanda, bonse fye tulaponenwa na mafya ayo tufwile ukushipikisha.” Apo pene umwanakashi atendeke ukulila no kushimika ukuti alelwalilila. Assunta akoseleshe umwanakashi lintu amwebele ukuti, Lesa wa mu Baibolo kuti amusansamusha. Umwanakashi apokeleko bamagazini balanda pa fyaba mu Baibolo abo Assunta akwete.

Ilyo bakumene inshita imbi no kulanshanya, uyu mwanakashi uwe shina lya Palmira, asumiine ukuti alecula sana. Pa nshita ntali aleikala pa mayanda ya banakashi bashimbe mu lukuta lwa mapepo. Lintu aalelombo lusa lwa kuya ku kundapwa, balemweba ukuti nga afumapo ekabwela. Lelo Palmira ena aleyumfwa uwaipeela kuli Lesa apo alilapile ukwikalo bushimbe. Ilyo aile kuli bashing’anga ku “kundapwa” icamucitikile calengele ukuti abe uwapelenganishiwa. Palmira asumiine ukusambilila Baibolo, kabili umwaka onse alesangwa mu kulongana kwa Bwina Kristu. Pa mulandu wa kukuukila ku ncende imbi, alekele ukumonana ne Nte sha kwa Yehova. Imyaka ibili yalipwile ukwabula ukukumana na Assunta. Ilintu bamonene na Assunta batendeke na kabili ukusambilila, lelo balupwa ba kwa Palmira na bashimapepo tabalefwaya ukuti akonkanyepo ukusambilila Baibolo. Nangu cibe fyo, isambililo lyalibukulwike, kabili alilundulwike lwa ku mupashi, no kubatishiwa pamo nge Nte ya kwa Yehova.

Ca cine, abengi balakoseleshiwa ku bukombe bwa kwa ‘Lesa wa kukoselesha.’ (Abena Roma 15:4, 5) E ico, Inte sha kwa Yehova mu Italy baliipeelesha ukutwalilila ukupashanya Lesa ilyo baleshimikila ubukombe bwakwe ubwa cisansamushi kuli bambi.