Lundululeni Bucibusa Bwapalamisha na Yehova

UMUSAMBI Yakobo alembele ukuti, “Palameni kuli Lesa, na o alapalama kuli imwe.” (Yakobo 4:8) Na kemba wa malumbo Davidi aimbile ukuti: “Isenge lya kwa Yehova lili ku bamutiina.” (Amalumbo 25:14) Cine cine, Yehova Lesa afwaya ukuti tukwate bucibusa bwapalamisha na wene. Lelo, te bonse abapepa Lesa no kumfwila amafunde yakwe abomfwa ukuti balipalama kuli wene.

Ni shani pa lwa imwe? Bushe pa lwenu mwalipanga bucibusa bwapalamisha na Lesa? Ukwabula ukutwishika, mulafwaya ukupalamina kuli wene. Bushe kuti twalundulula shani bucibusa bwapalamisha na Lesa? Bushe ukucite fyo kukapilibula cinshi kuli ifwe? Icipandwa calenga butatu ice buuku lya mu Baibolo ilya Amapinda nacikwata ifyasuko.

Beni Aba Luse Kabili Aba Cishinka

Imfumu Solomone iya Israele wa pa kale yatendeka icipandwa ca butatu ica Amapinda na mashiwi ayatila: “We mwana wandi, wilaba amalango yandi, na mafunde yandi leko mutima obe uyalinde; pantu ukutantalila kwa nshiku, ne myaka ya mweo, no mutende yakalundako kuli iwe.” (Amapinda 3:1, 2) Apo Solomone apuutilwemo na Lesa ku kulemba, kanshi ni Yehova Lesa e uletupanda amano pamo ngo mufyashi. E co batukoselesha ukukonka ifishimiko fya kwa Lesa pamo nga amafunde yakwe, nelyo ukusambilisha, na makambisho yakwe ayasangwa muli Baibolo. Nga twacite fi, “ukutantalila kwa nshiku, ne myaka ya mweo, no mutende yakalundako” kuli ifwe. Ca cine, na pali ino nshita kuti twaipakisha ubumi bwa mutende kabili kuti twasengauka ukukonkelela ifintu ifingatuletela amasanso ya kufwa bwaice bwaice ayesa pa ncitatubi. Na kabili, kuti twakwata isubilo lya kwikala abomi ku ciyayaya mu calo cipya ica mutende.—Amapinda 1:24-31; 2:21, 22.

Solomone atwalilila ukusosa ukuti: “Wileka uluse ne cishinka fikutaluke, fikake mu mukoshi obe (filembe pa cipampa ca mutima obe); e fyo ukasango bubile no kushilimuka kusuma mu menso ya kwa Lesa na ya bantu.”—Amapinda 3:3, 4.

Ishiwi limbi ilya mu lulimi lwa kutendekelako ilyapilibulwa ukuti “uluse” mashiwi pamo nga “ukutemwa kwa bucishinka” icisanshamo ukuipeelesha, ukwikatana na bucishinka. Bushe twalipampamina pa kulambatila kuli Yehova te mulandu ne cingacitika? Bushe tulalangisha uluse ku basumina banesu? Bushe tulabombesha ukuti tutwalilile ukupalama kuli bene? Ilyo tulebomba na bo cila bushiku, bushe tulasunga ‘amalango ya luse pa lulimi lwesu’ na lintu imibele ili iyayafya?—Amapinda 31:26.

Pa mulandu wa kufulisho luse, Yehova ‘alalekelela.’ (Amalumbo 86:5) Nga twalilapila ku membu shesu isha kale kabili pali ino nshita tulelungika inshila shesu, twaebekeshiwa ukuti “inshita sha kupuupuutula” shikesa ukufuma kuli Yehova. (Imilimo 3:19) Bushe tatufwile ukupashanya Lesa pa kulekelela bambi amampuulu yabo?—Mateo 6:14, 15.

Yehova ni “Lesa wa cishinka,” kabili afwaya  “icishinka” kuli abo abafwaya ukupalamina kuli wene. (Amalumbo 31:5) Bushe cine cine kuti twacetekela Yehova ukuba cibusa wesu nga tuli bamyalumyalu, ukulanga imibele isuma ilyo tuli na Bena Kristu banensu, e lyo nga tabalipo twalanga imibele imbi kwati “bantu ba bufi” abafisa umusango untu baaba? (Amalumbo 26:4) Fintu ico cingaba bupumbu, apo “ifintu fyonse fyabo bwamba kabili fyalikupukulwa ku menso” ya kwa Yehova!—AbaHebere 4:13.

Uluse ne cishinka fifwile ukumonwa ifyacindama kwati kabeekobeeko akaumisha umutengo ‘akakakilwa mu mukoshi wesu,’ pantu filatwafwa ‘ukusanga ububile mu menso ya kwa Lesa na ya bantu.’ Tatulekabila ukulangisha fye iyi mibele lwa ku nse lelo tufwile no kuilemba ‘pa cipampa ca mitima yesu,’ ukuilenga ukuba imibele ya cine cine iya buntu bwesu.

Lundululeni Ukutetekela Kwakumanina Muli Yehova

Imfumu ya mano yatwalilila aiti: “Tetekela Yehova umutima obe onse, na ku kwiluka kobe we mwine wishintililako; uko konse wenda umwishibe, na o akatambalike nshila shobe.”—Amapinda 3:5, 6.

Cine cine Yehova aliwaminwa ukutetekelwa umupwilapo. Pamo nga Kabumba, alikwata “amaka ayengi” kabili e Ntulo ya “kukosa.” (Esaya 40:26, 29) Alikwata amaka ya kucita conse cintu afwaya. Na kuba, ishina lyakwe line lipilibula “Uulenga Ukubako,” kabili lilakosha ukutetekela kwesu mu maka yakwe aya kufikilisha ifyo alaya! Icishinka ca kuti, ‘Lesa tengabepa’ cimulenga ukuba intulo ya cishinka. (AbaHebere 6:18) Imibele yakwe iyapulishamo yaba kutemwa. (1 Yohane 4:8) “Alilungama mu mibele yakwe yonse, kabili wa luse mu micitile yakwe yonse.” (Amalumbo 145:17) Nga tatutetekele Lesa, nani twingatetekela? Ca cine, pa kuti tutetekele wene, tukabila ‘ukusonda no kumona ukuti aliwama Yehova’ ukupitila mu kubomfya fintu tusambilila muli Baibolo mu bumi bwesu no kutontonkanya pa fisuma ififumamo.—Amalumbo 34:8.

Bushe kuti ‘twamwishiba shani Yehova mu nshila shesu shonse’? Kemba wa malumbo uwapuutilwemo atila: “Ndetontonkanyo kubomba kwenu konse, no kwetetule milimo yenu.” (Amalumbo 77:12) Apo Lesa tamoneka, ukwetetula pa milimo yakwe iikalamba ne mibombele yakwe na bantu kulafwaikwa pa kulundulula bucibusa na wene.

Ipepo nalyo ni nshila imo iya kwishibilamo Yehova. Imfumu Davidi yalelilila kuli Yehova “akasuba konse.” (Amalumbo 86:3) Davidi ilingi alepepa ubushiku bonse, pamo nga lintu ali imbutushi mu matololo. (Amalumbo 63:6, 7) Umutumwa Paulo akonkomeshe ukuti, “Mupepele mu Mupashi inshita shonse.” (Abena Efese 6:18) Miku iinga tupepa? Bushe pa lwesu tulaipakisha ukulanda na Lesa ukufuma pa nshi ya mutima? Lintu tuli na mafya, bushe tulamulomba ukuti atwafwe? Bushe ukupitila mwi pepo tulalomba ubutungulushi bwakwe ilyo tatulapingulapo fimo ifyacindama? Amapepo yesu ayafumaluka yalatupalamika kuli wene. Kabili twalyebekeshiwa ukuti akomfwa amapepo yesu no ‘kutambalike nshila shesu.’

Fintu caba bupumbu ‘ukushintilila pa kwiluka kwesu’ nangu pa bantu balumbuka aba mu calo lintu tufwile ukutetekela Yehova umupwilapo! Solomone atila, “Wiba uwa mano mu menso yobe.” Mu kupusanako, akonkomesha ukuti: “Tiina Yehova, no kufuma ku bubi: e fyo kukabo kupola ku mubili obe, no kupembuka ku mafupa yobe.” (Amapinda 3:7, 8) Akatiina kasuma aka kukanafwaya ukufulwisha Lesa e kafwile ukutulenga ukucita ifintu fimo, mu ukutontonkanya, no kupaanga. Akatiina ka kumucindika aka musango yo kalatucingilila ukukanacita icabipa kabili kalondapa no kupembesula lwa ku mupashi.

Peeleni Yehova Ifyawamisha

Ni nshila nshi imbi twingapalaminamo kuli Lesa? Imfumu yatufunda ukuti, “Cindika Yehova ku fyuma fyobe, na ku fya ntanshi fya cibwesha cobe conse.” (Amapinda 3:9) Ukucindika Yehova cipilibula ukumupeela sana umucinshi  no kumulumbanya ku bantu ukupitila mu kubilisha pa lwe shina lyakwe. Ifyuma tucindikilako Yehova ni nshita yesu, ukulamuka kwesu, amaka yesu, ne fikwatwa fya ku mubili. Ifi fifwile ukuba ifya ntanshi, uko e kuti ifyawamisha. Bushe imibomfeshe ya fyuma fyesu taifwile ukulangilila ukuti twalisalapo ‘ukubala ukufwaya ubufumu bwa kwa Lesa no bulungami bwakwe’?—Mateo 6:33.

Ukucindika Yehova ne fyuma fyesu kulalambulwa. Solomone aebekesha ukuti, “E fyo na matala yobe yakesulamo ifya ciikushi, ne fya kukaminamo fyobe fikalapalo mwangashi upya.” (Amapinda 3:10) Nangu cingati ubunonshi bwa ku mupashi tabwisako pa mulandu wa bunonshi bwa ku mubili, bukapekape mu mibomfeshe ya fyuma fyesu ku kucindika Yehova bulaleta amapaalo yakalamba. Ukucita ukufwaya kwa kwa Lesa kwali e “ca kulya” ca kwa Yesu. (Yohane 4:34) Ukupalako, ukubombako umulimo wa kushimikila no kupanga abasambi uukatamika Yehova kulatunonsha. Nga twaba no mukoosha muli ulya mulimo, amatala yesu aya ku mupashi yakesulamo ifya ciikushi. Ubuseko bwesu, ubwaimininwako no mwangashi upya, bukapala.

Bushe tatushintilila pali Yehova no kupepa kuli wene ukuti atupe ica kulya cakumanina ica cila bushiku? (Mateo 6:11) Na kuba, conse ico twakwata cafuma kuli Shifwe wa ku muulu uwa kutemwa. Yehova akapongolola amapaalo yafulilako ukufika ku cipimo tubomfeshamo ifyuma fyesu ku kumulumbanya.—1 Abena Korinti 4:7.

Pokeleleni Ukusalapula kwa kwa Yehova

Ukulangilila ifyo ukusalapula pa kuba cibusa wa kwa Yehova kwacindama, imfumu ya Israele yatufunda ukuti: “Ukufunda kwa kwa Yehova wilakupata, we mwana wandi, nangu kutendwo kwebaula kwakwe; pantu untu Yehova atemwa e o ebaula, ifyo na wishi ebaulo mwana mwaume uo acankilwa.”—Amapinda 3:11, 12.

Nangu ni fyo, limbi te kuti citwangukile ukupokelela ukusalapula. Umutumwa Paulo alembele ukuti, “Ukufunda konse ilyo kubapo . . . takumoneko kwa kusekelela, kuba fye ukwa bucushi: lelo abafundwako, apo inshita yapita, kutwalako icisabo ca mutende, ica bulungami.” (AbaHebere 12:11) Ukwebaula no  kusalapula ni mbali shacindama isha kufunda ukutupalamika kuli Lesa. Ukulungikwa na Yehova, nampo nga twakupokelela ukufuma ku bafyashi, ukupitila mu cilonganino ca Bwina Kristu, nelyo ukupitila mu kwetetula pa Malembo mwi sambililo lya pa lwesu, kulangilila ukuti alitutemwa. Tukacita bwino ukupokelela kwene.

Koneneni ku Mano na ku Mucetekanya

Ukukonkapo, Solomone akomaila pa bucindami bwa kuba na mano no mucetekanya pa kulundulula bucibusa bwapalamisha na Lesa. Atila: “Alishuko muntu uusanga amano, no muntu uumono mucetekanya; pantu ukusanduluka kwa yako kwawamo kucilo kwa silfere, ne cibwesha ca yako cawamo kucila golde; . . . yene muti wa mweo ku baikatako, na bakonenako balishuka.”—Amapinda 3:13-18.

Ukutucinkulako pa lwa mano no kushilimuka ifimoneka mu bubumbo bwa kwa Yehova ubwa kupapusha, imfumu yatila: “Yehova ni ku mano ashimpile icalo, apampamike imyulu ku mucetekanya; . . . We mwana wandi, sunga amano no bupanda, wileka fifume ku menso yobe; na fyo fikabo mweo ku mutima obe, kabili cisaamo mu mukoshi obe.”—Amapinda 3:19-22.

Amano no mucetekanya mibele ya bulesa. Tatufwile ukulundulula fye yene, lelo tufwile no kukonena kuli yene pa kukananenuka mu mukoosha wesu uwa kufwailisha mu Malembo no kubomfya fintu tusambilila. Solomone atwalilila ati, “E lyo kuti waendo mutelelwe mu nshila yobe, tawakaipunune na lukasa. “ Alundapo ukuti: “Nga wasendama tawakekatwe umwenso, kuti wasendama, kuti twawama no tulo tobe.”—Amapinda 3:23, 24.

Ca cine, kuti twaenda mu mutelelwe no kusendama mu mutende wa muntontonkanya ilyo tulelolela ubushiku bwa “boni bwa kupumikisha” ubuleisa ngo mupupu pa calo cibifi ica kwa Satana. (1 Abena Tesalonika 5:2, 3; 1 Yohane 5:19) Na mu bucushi bukalamba ubupalamine, kuti twaba no ku kwebekesha: “Tawakatiine icilengo mwenso ica kupumikisha, nangu ni pumpunta wa babifi ilyo akesa; pantu Yehova akabe ca kutetekelako cobe; na o akabako lukasa lobe ukuti lwiikatwa.”—Amapinda 3:25, 26; Mateo 24:21.

Citeni Ubusuma

Solomone akonkomesha ukuti, “Witana busuma ku munobe, ilyo cili mu maka ya kuboko kobe ukubucita.” (Amapinda 3:27) Ukucitila bambi ifisuma kusanshamo ukubomfya ifyuma fyesu ku kubafwilishako, kabili cibimbamo ifingi. Lelo bushe ukwafwa bambi ukukwata bucibusa bwapalamisha na Lesa te cintu cawamisha ico twingabacitila muli ino “nshita ya ku mpela”? (Daniele 12:4) Ishi, kwena, ni nshiku sha kuba abapimpa mu mulimo wa kushimikila no kupanga abasambi.—Mateo 28:19, 20.

Imfumu ya mano na kabili yalumbula fimo ifyo tushifwile kucita, yatila: “Ku munobe witila, Kabiye, ukabwele mailo nkakupeela; ilyo uli na co. Wielenganisha munobe ububi, apo wene aikalo mutelelwe kuli iwe. Wiumana no muntu apa fye, nga takucitile ububi. Wifinuka muntu wa lufyengo, kabili wisalapo imibele yakwe yonse.”—Amapinda 3:28-31.

Ukusupawila umulandu apeelele uku kufunda, Solomone atila: “Pantu uwapotama wa muselu kuli Yehova, lelo ku batambalala e kwabe senge lyakwe; icitiipu ca kwa Yehova caba mu ng’anda ya mubifi, lelo ubwikalo bwa balungami alabupaala; aba micendo wene alabacenda, lelo asenamina abalanda; aba mano bene bakakwato bukata, lelo abawelewele bakamono kusaaluka.”—Amapinda 3:32-35.

Nga tuli no kuipakisha bucibusa bwapalamisha na Yehova, tatufwile ukwelenganya amapange yapondama aya buncitatubi. (Amapinda 6:16-19) Lyeka fye lintu twacita icalungama mu menso ya kwa Yehova e lintu tukakwata ububile bwakwe na mapaalo. Bambi kuti baitendekelako ukutucindika nga bamona ukuti incitilo shesu shileumfwana na mano ya bulesa. E co natukaane inshila sha bupondamishi isha ici calo ca bubifi no lukaakala. Cine cine, natukonkelele inshila shatambalala no kulundulula bucibusa bwapalamisha na Yehova!

[Ifikope pe bula 25]

“Cindika Yehova ku fyuma fyobe”