1. Fintu nshi ifyo abantu ba kwa Yehova bacita?

 KALE sana Baibolo yasobele ukuti abantu ba kwa Lesa “bakaipeela abene mu kuitemenwa” mu mulimo wa kwa Yehova kabili Yesu e ukalabatungulula. (Amalu. 110:3) Ubu busesemo bulefikilishiwa muno nshiku. Cila mwaka ababomfi ba kwa Yehova balabomba ama-awala ayengi nga nshi ukubila imbila nsuma. Balabomba uyu mulimo mu kuitemenwa kabili tababalipila. Na kabili balaafwa Abena Kristu banabo mu fyo balekabila, balabakoselesha, kabili balabafwa ukukosha bucibusa bwabo na Yehova. Baeluda na babomfi batumikila balapoosa inshita iikalamba ukupekanya amalyashi e lyo no kutandalila aba bwananyina pa kuti babakoseleshe. Cinshi cilenga abantu ba kwa Yehova balecita fyonse ifi? Kutemwa! Balitemwa Yehova kabili balitemwa na bantu.—Mat. 22:37-39.

2. Ukulingana na Abena Roma 15:1-3, cinshi Yesu acitile ico twingamupashanya?

² Yesu alilangile ukuti alibikile sana amano ku fyo abantu balefwaya ukucila ku fyo umwine alefwaya. Tulafwaisha ukupashanya Yesu. (Belengeni Abena Roma 15:1-3.) Nga tulemupashanya tukapaalwa nga nshi, atile: “Mwaba insansa ishingi mu kupeela ukucila ishaba mu kupokelela.”—Imil. 20:35.

3. Finshi twalasambilila muli cino cipande?

³ Muli cino cipande twalasambilila pali fimo ifyo Yesu acitile pa kuti aafwe abantu e lyo ne fyo twingamupashanya. Kabili  twalasambilila na pali fimo ifyo twingacita pa kuti tulefwaisha ukubombela abantu.

4. Finshi Yesu acitile ifilanga ukuti alibikile amano ku fyo bambi balefwaya ukucila ukubika amano ku fyo umwine alefwaya?

⁴ Yesu aleafwa abantu nangu nanaka. Tontonkanyeni ifyo Yesu acitile ilyo abantu baile kuli ena ku lupili nalimo mupepi na ku Kapernahumu. Alipepele ubushiku bonse. Afwile alinakile sana nomba ilyo amwene amabumba abapiina na balwele, alibomfwilile uluse. Tapeleele fye pa kubondapa lelo alilandile ne lyashi ilya bakoseleshe sana ilitwa ukuti Ilyashi lya pa Lupili.—Luka 6:12-20.

5. Bushe imitwe ya ndupwa bapashanya shani Yesu ilyo banakile?

⁵ Imitwe ya ndupwa balapashanya Yesu. Elenganyeni ukuti umutwe wa lupwa afuma ku ncito nanaka. Nalimo kuti afwaya ukuti bekwata Amapepo ya Lupwa, lelo apepa kuli Yehova ukuti amukoshe pa kuti atungulule Amapepo ya Lupwa. Yehova a-asuka ipepo lyakwe kabili atungulula na Mapepo ya Lupwa nga filya fine acita cila mulungu. Abana basambililako isambililo lyacindama bulya bushiku ilya kuti: Abafyashi babo balitemwa ukupepa Yehova ukucila ifintu fimbi.

6. Landeni pa cacitike icilelangilila ukuti Yesu alibomfeshe inshita yakwe ku kusambilisha abantu.

⁶ Nangu ca kuti inshita shimo Yesu alefwaya ukuba eka aleipeelesha ukusambilisha abantu bambi. Elenganyeni ifyo Yesu aumfwile ilyo cibusa wakwe Yohane Kabatisha bamwipeye. Afwile alyumfwile sana ubulanda. Baibolo itila: “Ilyo Yesu aumfwile [ukuti Yohane nabamwipaya], alifumineko no kuya mu bwato ukwali tondolo pa kuti abe eka.” (Mat. 14:10-13) Kuti twaishiba umulandu Yesu afwaile ukuba eka, pantu abantu bamo balafwaya ukuba beka nga baleloosha. Lelo ifyacitike fyalengele ukuti afilwe ukuba eka. Ibumba ilikalamba lyalifikile uko aleya ilyo ena ashilafika. Bushe Yesu acitile shani? Atontonkenye pa fyo aba bantu balekabila ‘kabili alibomfwilile uluse.’ Yesu alimwene ukuti balekabila ukubasansamusha, e ico ilyo line fye alitendeke ukubasambilisha. Na  kuba “atendeke ukubasambilisha ifintu ifingi.”—Marko 6:31-34; Luka 9:10, 11.

7-8. Landeni pa ficitika ifilangilila ukuti baeluda balapashanya Yesu ilyo aba bwananyina bali na mafya.

⁷ Ifyo baeluda ababa no kutemwa bapashanya Yesu. Tulatasha sana pa mulimo uo baeluda abatutemwa babomba. Aba bwananyina bamo mu cilonganino tabeshiba no kwishiba imilimo imo iyo baeluda babomba. Ku ca kumwenako, uwa bwananyina nga ali mu cipatala e lyo kwaba amafya, aba muli Komiti ya Kumfwaninamo ne Fipatala balaya mu kumumona. Ilingi line ifi ficitika ubushiku! Pa mulandu no luse bakwatila aba bwananyina, aba baeluda pamo ne ndupwa shabo balabika amano ku fyo abantu bambi balefwaya, balabika amano ku fingawamina aba bwananyina ukucila ifingabawamina.

⁸ Baeluda balabombako no mulimo wa kukuula Amayanda ya Bufumu ne fikuulwa fimbi e lyo no kwafwilisha aba bwananyina abaponenwe na masanso ayakalamba. Kabili balapoosa inshita iikalamba ukutusambilisha e lyo no kutukoselesha. Ala aba bamunyinefwe ne ndupwa shabo tufwile ukulabatasha. Shi Yehova alebapaala pa fyo baipeelesha ukubomba! Na lyo line, nga filya fine caba ku ba bwananyina bonse, baeluda tabalingile ukulabika fye amano ku milimo bakwata ica kuti balekelesha no lupwa lwabo.

9. Ukulingana na mashiwi yaba pa Abena Filipi 2:4, 5, cinshi Abena Kristu bonse bafwile ukulafwaisha ukucita?

⁹ Belengeni Abena Filipi 2:4, 5. Kwena fwe bengi te ifwe baeluda, na lyo line kuti  twapashanya filya Yesu aleipeelesha ukubombela abantu. Baibolo itila Yesu abuulile “icipasho ca busha.” (Fil. 2:7) Tontonkanyeni pa fyo twingasambilila kuli ili lembo. Umusha nelyo umubomfi alafwaya ukucita ifingalenga shikulu wakwe asekelela. Apo na ifwe tuli basha ba kwa Yehova kabili tubombela aba bwananyina, tulafwaya ukucita ifingalenga Yehova na ba bwananyina basekelela. Natulandeko pa fyo mwingacita ifi.

10. Mepusho nshi tulingile ukutontonkanyapo?

¹⁰ Muletontonkanya pa fyo mucita. Kuti mwatontonkanya pali ifi fipusho: ‘Bushe ndaipeelesha ukubomfya inshita yandi e lyo na maka yandi ukwafwa aba bwananyina? Kuti nacita shani nga banjeba ukuyatandalila munyinefwe umukalamba nelyo ukuyasenda nkashi umukoloci no kuya nankwe mu kulongana? Bushe ndaitemenwa ukubombako nga balefwaya aba kuyawamya apa kulonganina ukulongana kukalamba nelyo ukuwamya ifileonaika pa Ng’anda ya Bufumu?’ Ilyo twaipeele kuli Yehova twalimulaile ukuti twakulabomfya fyonse ifyo twakwata pa kumubombela. Afwaya ukuti tulebomfya inshita yesu, amaka yesu e lyo ne fyo twakwata ukwafwilisha abantu. Ukucita ifi, kulalenga aleba ne nsansa. Nga ca kutila twamona ukuti tulekabila ukwaluka, finshi twingacita?

11. Bushe ipepo kuti lyalenga shani twalafwaya ukulabombela aba bwananyina?

¹¹ Mulepepa kuli Yehova ukufuma pa nshi ya mutima. Tutile mulefwaya ukuipeelesha ukubombela bambi, lelo mulemona kwati te kuti mukumanishe ukucita ifyo. Cinshi mwingacita? Mufwile ukupepa kuli Yehova ukufuma pa nshi ya mutima. Mule-eba Yehova fyonse ifyo muleumfwa mwilashako nangu cimo kabili mulemulomba ukuti alemwafwa “pa kuti mulefwaya e lyo no kucitapo cimo.”—Fil. 2:13.

12. Mulimo nshi bamunyinefwe abacaice bengabombako mu cilonganino?

¹² Nga ca kuti uli mulumendo kabili walibatishiwa, ulelomba Yehova ukuti alekwafwa ukulafwaisha ukulabombela aba bwananyina mu cilonganino. Mu fyalo fimo baeluda balifula ukucila abatumikila, kabili abengi pali aba abatumikila bakalamba. Apo icilonganino ca kwa Yehova cilekulilako fye, tulefwaisha bamunyina abacaice abengi abengabombela pamo na baeluda ukusakamana abantu ba kwa Lesa. Mukaba ne nsansa nga ca kuti muleitemenwa ukubomba imilimo yonse iyo bamupeela. Mulandu nshi? Pantu mukalalenga Yehova ukusekelela, aba bwananyina bakamona ukuti mulaitemenwa ukubabombela, kabili mukaba ne nsansa isho tukwata pa mulandu wa kubombela abantu.

13-14. Finshi twingacita pa kuti tuleafwa aba bwananyina? (Moneni icikope icili pa nkupo.)

¹³ Mulebika amano ku ba bwananyina pa kuti muleishiba ilyo mwingabafwa. Umutumwa Paulo aebele abaYuda baleikala mu Yudea ukuti: “Mwilaba ukucita icisuma no kupeelana ifintu, pantu amalambo ya musango yu e yasekesha Lesa.” (Heb. 13:16) Ifyo umutumwa Paulo abebele fyalicindeme. Mulandu nshi? Pantu ilyo Abena Kristu abaleikala mu Yudea bapokelele kalata, tapakokwele batendeke “ukufulumukila ku mpili” kabili bashile amayanda yabo, amakwebo yabo, e lyo na balupwa lwabo abashali Bena Kristu. (Mat. 24:16) Ilyo bafulumwike, balingile ukula-afwana. Nga ca kuti ilyo tabalafulumuka balepeelana ifintu nga filya umutumwa Paulo abakoseleshe, ninshi calibangukile ukukwata fye ifintu ifinono uko bafulumukile.

 ¹⁴ Te lyonse bamunyinefwe na bankashi bengatweba nga balefwaya fimo. Ku ca kumwenako, tutile munyinefwe alifwilwa umwina mwakwe. Kuti akabila aba kumwipikilako, aba kumwafwako mu myendele, nelyo ukumwafwako imilimo ya pa ng’anda. Nalimo teti atwebe ukuti alefwaya tumwafwilisheko muli ifi pantu alemona kwati akulatucusha. Lelo kuti aumfwa bwino nga twaitemenwa fye ukumubombelako iyi milimo. Tatulingile ukulatontonkanya ukuti bambi e bengamwafwa nelyo akatweba ilyo akalafwaya ubwafwilisho. Tufwile ukutontonkanya pali ici cipusho, ‘Nga ca kuti ninebo ifi fyacitikile, finshi ningafwaya abantu bancitila?’

15. Cinshi twingacita pa kuti cileangukila aba bwananyina ukwisa mu kulomba ubwafwilisho?

¹⁵ Mulecita ifintu ifingalenga ca-angukila aba bwananyina ukumulomba ukuti mubafwe. Ukwabula no kutwishiba mwalishibako bamo mu cilonganino abaafwa sana aba bwananyina. Tabamona kwati tulebacusha. Twalishiba ukutila kuti batwafwa nga tuli no bwafya, kabili tulafwaisha ukubapashanya. Ba Alan baeluda abali ne myaka 45 balafwaya ukuti aba bwananyina belatiina ukulomba ukuti babafwilishe. Balandile pa fyo Yesu alecita ukuti: “Nangu ca kuti Yesu alikwete imilimo iingi, abaice na bakalamba tabaletiina ukuya kuli ena no kumulomba ukuti abaafwe. Balemona ukuti alibabikileko amano. Na ine mfwaya ukuti abantu belatiina ukulanda na ine, balemona ukuti nalibatemwa kabili nalibabikako amano nga filya fine Yesu ali.”

16. Nga tulekonka ifyaba pa Amalumbo 119:59, 60, kuti fyalenga shani twapashanya Yesu?

¹⁶ Tatufwile ukumfwa ububi nga twafilwa ukupashanya bwino bwino ifyo Yesu alecita.  (Yako. 3:2) Umusambi uulesambilila ukulenga teti acile kafundisha wakwe. Nomba nga ca kuti alesambililako ku fyo alelufyanya kabili ale-esha na maka ukupashanya kafundisha wakwe, akeshiba ukulenga. Na ifwe nga tulecita ifyo tulesambilila mu Baibolo, kabili tulealuka umo tulingile ukwaluka, tukalapashanya sana Yesu.—Belengeni Amalumbo 119:59, 60.

17-18. Busuma nshi bwaba mu kubombela abantu nga filya Yesu aleitemenwa ukubabombela?

¹⁷ Nga tuleipeelesha ukubombela bambi, aba bwananyina mu cilonganino bakulatupashanya. Ba Tim baeluda batile: “Twalikwata bamunyinefwe abatumikila abacaice sana. Cimo icalengele ukuti babasonte, ni co balepashanya aba bwananyina abaleipeelesha ukubomba. Aba abacaice babombela pamo na baeluda ukwafwa aba mu cilonganino.”

¹⁸ Abantu abengi muli cino calo bacita fye ifya kubawamina. Nomba ifi te fyo abantu ba kwa Yehova baba. Tulasambililako ifingi kuli filya Yesu aleipeelesha ukubombela abantu kabili tulafwaisha sana ukumupashanya. Kwena te kuti tucite fye nga filya fine alecita, lelo “kuti tulekonka sana mu ntampulo shakwe.” (1 Pet. 2:21) Nga tulebombesha ukupashanya Yesu filya aleitemenwa ukubombela abantu, na ifwe bene tukalaba ne nsansa pantu tukalenga Yehova ukusekelela.