Ifingamwafwa nga ca Kuti Mumona Kwati no Kufwa Kwawama
MU FIPANDE fifumineko natumona ifyo amafya tukwata yengalenga twalamona kwati te kuti tushipikishe. Ilyo muli na mafya kuti mwalamona kwati no kufwa kwawama nelyo ukumona kwati takwaba uwa mubikako amano. Nomba mufwile ukwishiba ukuti Lesa alimubikako sana amano kabili alimutemwa sana.
Uwalembele Amalumbo 86 alandile pa fyo acetekele Lesa ukuti: “Mu bushiku bwa kucula kwandi nkalilila kuli imwe, Pantu mukanjasuka.” (Amalumbo 86:7) Na lyo line, nalimo kuti mwalayipusha amuti: ‘Bushe Lesa akanjasuka shani “mu bushiku bwa kucula kwandi”?’
Nangu ca kuti Lesa te kuti afumyepo amafya yonse ayo mukwata pali ino nshita, Icebo cakwe Baibolo citweba ukuti akamupeela umutende uukalamwafwa ukushipikisha. Citila: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu.” (Abena Filipi 4:6, 7) Natulande pa fyo amalembo ya mu Baibolo ayakonkapo yalanga ukuti Lesa alitubikako amano.
Lesa Alimubikako Amano
“Lesa talabapo [uluseba] nangu lumo. . . . Mwalicindama ukucila inseba ishingi.”—Luka 12:6, 7.
TONTONKANYENI PALI ICI: Abantu abengi tababika amano ku tuni utunono, lelo Lesa alitubikako sana amano. Takwaba uluseba nangu lumo ulo Lesa ashibikako amano pantu shonse shalicindama kuli ena. Abantu balicindama sana kuli Lesa ukucila inseba. Lesa alibumbile bwino abantu ukucila fyonse ifyo abumba pa calo, pantu ababumbile “mu cipasho” cakwe. E ico kuti baba ne mibele iyo akwata.—Ukutendeka 1:26, 27.
“Mwe Yehova, mwafwayafwaya muli ine, kabili mwalinjishiba. . . . Mwaishiba amatontonkanyo yandi . . . Nceeceeteni, no kwishiba amalangulushi yandi.”—Amalumbo 139:1, 2, 23.
TONTONKANYENI PALI ICI: Lesa alimwishiba bwino. Alishiba bwino fyonse fye ifyo mumfwa ne fimusakamika. Nangu ca kuti abantu kuti bafilwa ukwishiba bwino ifyo muleumfwa no bwafya mukwete, Lesa aleshiba kabili alafwaya no kumwafwa. Ukwishiba ici cishinka kuti kwalenga mwalafwaya ukuba no mweo.
Kwaliba Umulandu Lesa Amubumbiile
“Mwe Yehova, umfweni ipepo lyandi; Kabili lekeni ukukuuta kwandi kwise kuli imwe. . . . Teyamikeni ukutwi kwenu kuli ine; mu bushiku nakuuta, angufyanyeni, njasukeni. . . Akakutika kwi pepo lya bantu abo bapoka fye fyonse.” —Amalumbo 102:1, 2, 17.
TONTONKANYENI PALI ICI: Ukufuma fye pa kutendeka Yehova alamona ifyo abantu bacula kabili talaba. (Amalumbo 56:8) Alamona ifyo na imwe bene mucula. Yehova alishiba amafya mukwata pantu alimutemwa sana.
“Wilasakamana, pantu nine Lesa obe. Nkakukosha. Nkakwafwa . . . Ne Yehova Lesa obe, . . . ndekweba ati, ‘Witiina. Ine nkakwafwa.’” —Esaya 41:10, 13.
TONTONKANYENI PALI ICI: Lesa alafwaya ukumwafwa. Nga mwaba na mafya, akamwafwa.
Ifintu Fikawama ku Ntanshi
“Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.”—Yohane 3:16.
TONTONKANYENI PALI ICI: Lesa alimutemwa sana ica kuti alipeele Umwana wakwe Yesu ukuti afwile pa membu shenu. Ifi acitile fyalilenga mukwate isubilo lya kwikala aba nsansa umuyayaya. *
Nangu ca kuti mwaliba sana na mafya kabili mumona kwati te kuti mushipikishe, mulebelenga Icebo ca kwa Lesa no kucetekela sana ifyo Lesa atulaya. Nga mulecita ifi mukaba ne nsansa kabili mukalashipikisha amafya.
^ para. 19 Nga mulefwaya ukwishibilapo na fimbi pa fyo mwinganonkelamo mu mfwa ya kwa Yesu, tambeni vidio itila Muleibukisha Imfwa ya kwa Yesu iyaba pa www.jw.org/bem. Kabiyeni apo balemba ati IMPAPULO > AMAVIDIO > UKULONGANA KWESU NO KUSHIMIKILA.
Nalimo Kuti Mwatemwako ne fi
PA NTE SHA KWA YEHOVA
Mulandu Nshi Mulingiile Ukusambilila Baibolo?
Mu Baibolo mwaliba ifyasuko ku mepusho yacindama ayo abantu abengi pano calo bakwata. Bushe na imwe kuti mwatemwa ukusanga amasuko ku mepusho mwakwata?
ULUPUNGU LWA KWA KALINDA
Ifyo Mwinganonkelamo nga Mwaishiba Ukuti Lesa Alimubikako Amano
Amalembo yalatwafwa ukucetekela amalayo ya kwa Lesa ayalanda pa fyo ifintu fikaba ku ntanshi.
ULUPUNGU LWA KWA KALINDA
Cinshi Calenga Ubupe ubo Lesa Atupeela Ukucindama Sana?
Finshi filenga ica bupe ukucindama sana ukucila ifya bupe fimbi? Ukutontonkanya pali ifi fintu kuti kwalenga twalatasha sana pa cilubula.
