Ilyo tushilatendeka ukuisambilisha, nalimo kuti twayipusha atuti, ‘Finshi nde-enekela ukusambilila?’ Nangu ca kutila kuti twaenekela ukusambilila fimo ilyo tuleisambilisha, tufwile ukulaibukisha ukuti kwaliba na fimbi ifipya ifyo Yehova engafwaya ukutusambilisha. Finshi tulingile ukucita pa kuti Yehova engatusambilishishapo na fimbi?

Mulelomba amano. Mulelomba Yehova ukuti amwafwe pa kuti mwishibe ifyo alefwaya ukumusambilisha. (Yako. 1:5) Mwilapelela fye pa fyo mwaishiba kale.—Amapi. 3:​5, 6.

Muleleka amaka ayo Icebo ca kwa Lesa cakwata yalemutungulula. “Icebo ca kwa Lesa ca mweo.” (Heb. 4:12) E ico lyonse ilyo twabelenga Icebo ca kwa Lesa, kuti twasambilila ifintu ifipya ifingatwafwa mu nshila ishalekanalekana. Lelo kuti caba fye ifi nga ca kuti twasumina ukuti tulingile ukusambilila ifyo Lesa alefwaya ukutusambilisha.

Muletasha pa nshila shonse isho Yehova atusambilishishamo. Ifya kulya fya ku mupashi ifyo atupekanishisha fyaba nga “umutebeto wa fyanona.” (Esa. 25:6) Mwilakaana ukubelenga amalyashi ayo mulemona ukutila te kuti muyatemwe ukuyabelenga. Nga tamulekaana ninshi muleleka Yehova alemwafwa pa kuti mwingaba umuntu umusuma kabili mukalatemwa sana ukuisambilisha!