ICIPANDE CA KUSAMBILILAMO 45
Ifyo Twingafwa Abantu pa Kuti Balekonka Ifyo Kristu Atwebele
“E ico kabiyeni, kalengeni . . . abasambi, . . . mulebasambilisha ukulakonka fyonse ifyo namwebele.”—MAT. 28:19, 20.
ULWIMBO 89 Muleba ne Cumfwila E lyo Mukapaalwa
IFYO TWALASAMBILILA *
1. Ukulingana na Mateo 28:18-20, finshi Yesu aebele abasambi bakwe ukulacita?
ILYO Yesu abuushiwe alimoneke ku basambi bakwe abalongene mu Galili. Kwali ifyacindama ifyo alefwaya ukubeba. Finshi ifyo fine? Ifyo alefwaya ukubeba fyalembwa pe lembo lya kwa Mateo 28:18-20.—Belengeni.
2. Mepusho nshi twala-asuka?
2 Ababomfi ba kwa Lesa muno nshiku nabo balingile ukulakonka ifunde Yesu apeele abasambi bakwe. Kanshi lekeni tulande pa mepusho yatatu ayakuma umulimo Yesu atupeela. Icipusho ca kubalilapo, ukulunda pa kusambilisha abasambi abapya ifyo Lesa afwaya, finshi fimbi tulingile ukucita? Icalenga bubili, finshi bakasabankanya bonse mu cilonganino bengacita pa kwafwa abasambi ba Baibolo ukulunduluka? Icalenga butatu, kuti twa-afwa shani Abena Kristu banensu abanaka pa kuti batendeke na kabili ukubomba umulimo wa kulenga abantu baba abasambi?
MULEBASAMBILISHA UKULAKONKA IFYO KRISTU ALANDILE
3. Finshi Yesu alandile ilyo apeele abasambi bakwe ifunde lya kulalenga abantu baba abasambi?
3 Ifyo Yesu alandile fyalyanguka ukumfwa. Tufwile ukulasambilisha abantu ifyo atwebele. Lelo kwaliba icintu cimo icacindama ico tushilingile ukulaba. Yesu talandile ukuti: ‘Mulebasambilisha fyonse ifyo namwebele.’ Lelo atile: “Mulebasambilisha ukulakonka fyonse ifyo namwebele.” Pa kuti tulekonka ifyo Yesu alandile tatulingile ukupelela fye pa kusambilisha abasambi, lelo tulingile no kubalanga ifyo bengalakonka ifyo balesambilila. (Imil. 8:31) Cinshi tulingile ukulacitila ifi?
4. Bushe ukukonka ifunde kwalola mwi? Langilileni.
4 ‘Ukukonka’ ifunde cipilibula ukulaumfwila ifyo ilyo ifunde lilanda. Pa kulangilila ifyo twingasambilisha umuntu ukulakonka nelyo ukulaumfwila ifyo Kristu alandile, tontonkanyeni pali ici cilangililo. Bushe uusambilisha abantu ukwensha motoka, asambilisha shani abalesambilila ukwensha motoka ukulakonka amafunde ya pa musebo? Abalilapo ukubasambilisha amafunde ya pa musebo ilyo bali mu kalasi. Nomba kwaliba na cimbi ico alingile ukucita pa kuti abasambilishe ukulakonka amafunde ya pa musebo. Afwile ukuya no musambi mu musebo umulepita bamotoka abengi. Lyena ilyo umusambi ale-ensha motoka, afwile ukulamutungulula no kulamulanga ifya kukonka ifyo amusambilishe. Finshi twingasambilila kuli ici icilangililo?
5. (a) Ukulingana ne fyaba pali Yohane 14:15 na 1 Yohane 2:3, finshi tulingile ukusambilisha abasambi besu aba Baibolo ukulacita? (b) Landeni ifyo twingalanga abasambi ba Baibolo ifyo bengalakonka ifyo balesambilila.
5 Ilyo tulesambilisha abantu Baibolo tulabasambilisha ukulakonka ifyo Lesa afwaya tulecita. Lelo kwaliba na fimbi ifyo tulingile ukucita. Tulingile ukulasambilisha abasambi besu aba Baibolo ifyo bengalakonka ifyo basambilila mu fyo bacita cila bushiku. (Belengeni Yohane 14:15; 1 Yohane 2:3.) Ifyo tucita kuti fyalenga abasambi besu aba Baibolo baishiba ifyo bengalakonka amashinte ya mafunde ya mu Baibolo ilyo bali ku sukulu, ku ncito, nelyo ilyo balelesha icitendwe. Kuti twabashimikilako ifyatucitikile pa kuti bamone ifyo ukukonka amashinte ya mafunde ya mu Baibolo kwatucingilile ku fyabipa nelyo ifyo kwatwafwile ukusala bwino ifya kucita. Ilyo tuli na basambi kuti twabapepelako kuli Yehova ukuti umupashi wa mushilo ulebatungulula.—Yoh. 16:13.
6. Finshi fyaba mu kusambilisha abantu ukulakonka ifyo Yesu alandile?
6 Finshi fyaba mu kusambilisha abantu ukulakonka ifyo Yesu alandile? Tulingile ukwafwa abasambi besu aba Baibolo pa kuti balefwaisha ukubombako umulimo wa kulenga abantu baba abasambi. Abasambi bamo kuti balatiina ukubombako uyu mulimo. E co tulingile ukubatekanishisha ilyo tulebasambilisha mu nshila ya kuti panono panono baumfwikisha ifyo balesambilila, fyabafika pa mutima kabili balafwaisha ukwebako abantu ifyo balesambilila. Finshi twingacita pa kuti twafwe abasambi ukulafwaisha ukubombako umulimo wa kulenga abantu baba abasambi?
7. Kuti twa-afwa shani abasambi besu pa kuti balefwaisha ukulabila imbila nsuma?
7 Nalimo kuti mwaipusha uo musambilisha Baibolo ukuti: “Bushe ukukonka ifyo usambilila mu Baibolo kwalenga shani ifintu mu bumi bobe ukuwaminako? Bushe uletontonkanya ukuti ulingile ukwebako bambi ifyo ulesambilila? Kuti wacita shani pa kuti webeko bambi ifyo ulesambilila?” (Amapi. 3:27; Mat. 9:37, 38) Kuti mwalanga umusambi amatrakiti ayaba pa Impapulo Tubomfya Sana pa Kusambilisha Abantu, no kumweba ukusalapo ayo alemona ukutila kuti ayabomfya pa kushimikila ba lupwa lwakwe, ifibusa fyakwe, nelyo abo abomba nabo. Lyena mufwile ukupeela umusambi wenu amatrakiti ayengi. Mulingile no kwesha nankwe ifyo engacita pa kupeela abantu amatrakiti ukwabula ukubakalifya. Lelo umusambi wesu nga aba kasabankanya uushabatishiwa, tulingile ukulaya nankwe mu kubila imbila nsuma pa kuti tulemulanga ifya kubomba.—Luk. Mil. 4:9, 10; Luka 6:40.
IFYO ABA MU CILONGANINO BENGAFWA UMUSAMBI WA BAIBOLO PA KUTI ALUNDULUKE
8. Cinshi cacindamina ukuti abasambi besu aba Baibolo batemwa sana Lesa na Bantu? (Moneni na kabokoshi akaleti “ Ifyo Twingafwa Abasambi Besu aba Baibolo pa Kuti Batemwe Sana Lesa.”)
8 Muleibukisha ukuti Yesu atwebele ukulasambilisha abantu “ukulakonka fyonse” ifyo alandile. Pa fyo Yesu alandile paba na mafunde ayakalamba yabili, e kutila ukutemwa Lesa no kutemwa abantu. Ukutemwa Lesa na bantu kulalenga twalafwaisha ukubila imbila nsuma no kulenga abantu baba abasambi. (Mat. 22:37-39) Ukutemwa Lesa na bantu e cikalamba icilenga tulebomba umulimo wa kubila imbila nsuma. Lelo abasambi ba Baibolo bamo kuti balaumfwa umwenso wa kubila imbila nsuma. Nomba kuti twalenga aba abasambi Baibolo baishiba ukuti Yehova nga abafwa, panono panono bakaleka ukutiina abantu. (Amalu. 18:1-3; Amapi. 29:25) Akabokoshi kali muli cino cipande nakalondolola ifyo twingacita pa kuti twafwe umusambi ukulatemenwako Lesa. Nomba finshi aba mu cilonganino bengacita pa kwafwa abasambi abapya ukulalanga sana ukutemwa?
9. Mu cilangililo ca muntu uulesambilila ukwensha motoka, bushe umusambi kuti asambilila shani ifingamwafwa ukulaensha bwino motoka?
9 Tontonkanyeni na kabili pa cilangililo ca muntu uulesambilila ukwensha motoka. Kuti asambilila shani ifya kukonka amafunde ya pa musebo ilyo ale-ensha motoka mu musebo umuli bamotoka abengi? Afwile ukulakutika ku fyo uulemusambilisha alemweba no kulamona ifyo banamutekenya abaishiba bwino ukwensha imyotoka balecita. Ku ca kumwenako, kasambilisha kuti amulanga namutekenya uwashila namutekenya munankwe inshila ukuti apite. Nelyo kuti amulanga namutekenya uwabweshako amalaiti ya motoka yakwe pa kuti banamutekenya abalefuma ku ntanshi balemona bwino. Ukucita ifi kuti kwalenga umusambi asambilila ifyo engalacita ilyo ale-ensha motoka.
10. Finshi fingafwa umusambi wa Baibolo ukulunduluka mu fya kwa Lesa?
10 Ifi fine e fyo caba na ku musambi uwatendeka ukwenda mu musebo uutwala ku mweo wa muyayaya. Tasambilila fye kuli kasambilisha wakwe, lelo alasambilila na ku babomfi ba kwa Yehova bambi. Finshi fingafwa sana umusambi wa Baibolo ukulunduluka mu fya kwa Lesa? Kulasangwa mu kulongana lyonse. Cinshi twalandila ifi? Ifyo tusambilila mu kulongana kuti fyalenga aishibilako ifyaba mu Baibolo, icitetekelo cakwe kuti cakoselako kabili kuti fyamwafwa ukutemwa sana Lesa. (Imil. 15:30-32) Na kabili ilyo bali pa kulongana, kasabankanya kuti alenga umusambi wakwe uwa Baibolo aishibana na bamunyinefwe na bankashi abo umusambi wakwe engapalana nabo mu fingi. Umusambi akamona ifyo aba bwananyina mu cilonganino batemwana.
11. Finshi umusambi nalimo engamona muli bakasabankanya bamo aba mu cilonganino?
11 Tontonkanyeni pa fya kumwenako fyakonkapo. Umusambi uukusha abana ukwabula umulume amona nkashi uwakwata ubwafya bumo bwine. Atemwa sana ukumona ifyo uyu nkashi aibikilishako pa kuti aleisa ku Ng’anda ya Bufumu na bana bakwe abanono. Umusambi uo cikosela ukuleka ukupeepa fwaka aishibana na kasabankanya uwakwete ubwafya bumo bwine lelo uwabucimfishe. Kasabankanya aebako umusambi ifyo ukutemwa sana Yehova kwalengele alakonka sana amafunde ya kwa Lesa. (2 Kor. 7:1; Fil. 4:13) Pa numa kasabankanya alondolwela umusambi ifyo acitile pa kuti aleke ukupeepa, amweba no kuti, “Na iwe wine kuti waleka.” Umusambi akoseleshiwa kabili acetekela ukuti na o wine kuti aleka ukupeepa. Umukashana uusambilila Baibolo amona ifyo nkashi wacaice aba ne nsansa pa mulandu wa kuba Inte ya kwa Yehova. Ici calenga umusambi alafwaisha ukwishiba icilenga uyu nkashi aleba ne nsansa lyonse.
12. Mulandu nshi twingalandila ukuti bonse fye mu cilonganino kuti twacitapo fimo pa kwafwa abasambi ba Baibolo ukulunduluka mu fya kwa Lesa?
12 Abasambi ba Baibolo nga baishibana na bakasabankanya abalekanalekana ababombela Lesa ne cishinka, kuti baishiba ifyo bengacita pa kuti balekonka ifunde lya kwa Kristu ilya kutemwa Lesa na bantu. (Yoh. 13:35; 1 Tim. 4:12) Na kabili nga fintu tulandilepo, abasambi ba Baibolo kuti basambilila ifya kucimfya amafya kuli bakasabankanya abakwetepo amafya ayapalana na yo bakwete. Umusambi nga amona ifyo bamo bacimfishe amafya ayapalana nayo akwete, kuti aishiba ukuti na o wine kuti acimfya aya amafya pa kuti abe umusambi wa kwa Kristu. (Amala. 30:11) Kwaliba ifingi ifyo bonse mu cilonganino twingacita pa kuti twafwe abasambi ba Baibolo ukulunduluka mu fya kwa Lesa. (Mat. 5:16) Finshi ifyo imwe pa lwenu mucita pa kukoselesha abasambi ba Baibolo ukulunduluka mu fya kwa Lesa?
MULEAFWA ABANAKA PA KUTI BATENDEKE UKUBILA IMBILA NSUMA NA KABILI
13-14. Cinshi Yesu acitile ilyo abatumwa bakwe bafuupwike?
13 Tulafwaya ukwafwa bamunyinefwe na bankashi abanaka pa kuti batendeke na kabili ukubombako umulimo wa kushimikila no kulenga abantu baba abasambi. Ifyo Yesu acitile ku batumwa bakwe ilyo bafuupwike filanga ifyo na ifwe twingacita muno nshiku.
14 Ilyo Yesu alepwisha umulimo wakwe pano isonde kabili ilyo ali mupepi no kufwa, abatumwa bakwe “bonse balimushile no kufulumuka.” (Marko 14:50; Yoh. 16:32) Finshi Yesu acitile pa nshita lintu abatumwa bakwe bafuupwike? Ilyo papitile fye inshita iinono ukutula apo Yesu abuukile, aebele abasambi bakwe ukuti: “Mwitiina! Kabiyeni, kebeni bamunyinane ukuti [nalibuuka].” (Mat. 28:10a) Yesu tasuulile abatumwa bakwe. Nangu ca kuti balimubutwike, alitwalilile ukubeta ukuti “bamunyinane.” Yesu ali no luse kabili ale-elela nga filya Yehova acita.—2 Isha. 13:23.
15. Bushe tumfwa shani pa ba bwananyina abaleka ukubila imbila nsuma?
15 Na ifwe bene twalibika sana amano ku ba bwananyina abaleka ukubila imbila nsuma. Ni bamunyinefwe kabili ni bankashi yesu kabili twalibatemwa! Tulebukisha ifyo aba bamunyinefwe balebombesha mu mulimo wa kwa Yehova. Bamo abaleka ukubila imbila nsuma balibombela Yehova pa myaka iingi. (Heb. 6:10) Ala tulabafuluka nga nshi! (Luka 15:4-7) Kuti twalanga shani ukuti twalibika amano kuli aba aba bwananyina?
16. Kuti twalanga shani ukuti twalibika amano kuli bamunyinefwe na bankashi abanaka?
16 Cikuuku cikuuku mulebeta ukwisa ku kulongana. Cimo ico Yesu acitile pa kukoselesha abatumwa bakwe abafuupwike, kubeta ku kukumana. (Mat. 28:10b; 1 Kor. 15:6) Nga filya Yesu acitile, na ifwe kuti twakoselesha bamunyinefwe na bankashi abanaka ukwisa mu kulongana. Twalishiba ukuti nalimo kuti twabeta pa miku iingi pa kuti batendeke ukwisa mu kulongana. Ukwabula no kutwishika Yesu alitemenwe nga nshi ilyo abasambi bakwe baile kuli kulya ku kumana.—Linganyeniko Mateo 28:16 na Luka 15:6.
17. Finshi tulingile ukucita nga ca kuti twamona munyinefwe nelyo nkashi uwanaka aisa mu kulongana?
17 Mulebapokelela ne nsansa. Yesu alilengele abasambi bakwe baumfwa bwino ilyo ali nabo pali kulya kukumana pantu e wabalilepo ukulanda nabo. (Mat. 28:18) Finshi tulingile ukucita nga twamona munyinefwe nelyo nkashi uwanaka aisa ku Ng’anda ya Bufumu? Tufwile ukumupokelela ne nsansa. Nalimo pa kubalilapo fye te kuti twishibe ifya kulanda. Lelo ukwabula ukumulenga aumfwa ububi, kuti twamweba fye ukuti natutemwa ifi twamona aisa mu kulongana.
18. Kuti twakoselesha shani bakasabankanya abanaka?
18 Mulebakoselesha. Abasambi ba kwa Yesu bafwile balemona ukuti umulimo wa kubila imbila nsuma mwi sonde lyonse walikulile ica kutila te kuti bakumanishe uku-ubomba. Lelo Yesu alibakoseleshe ilyo abebele ukuti: “Nakulaba na imwe inshiku shonse.” (Mat. 28:20) Bushe ifi abebele fyalibafwile? Ee fyalibafwile. Tapakokwele balitendeke ukubombesha mu mulimo wa ‘kusambilisha no kubila imbila nsuma.’ (Imil. 5:42) Bakasabankanya abanaka nabo balakabila aba kubakoselesha. Nalimo kuti balaumfwa umwenso ukutendeka ukubila imbila nsuma na kabili. Kuti twabakoselesha ukuti tabakulabomba beka, lelo twakulaya nabo mu kubila imbila nsuma. Ukwabula no kutwishika bakalatasha sana ifyo tukalabatungilila ilyo bakatendeka ukubila imbila nsuma na kabili. Nga ca kuti tulelanga abanaka ukuti tubamona ukutila ni bamunyinefwe kabili ni bankashi yesu, kuti batendeka ukubila imbila nsuma na kabili. Kabili aba mu cilonganino bakalasekelela.
TULAFWAYA UKUPWISHA UKUBOMBA UMULIMO UO YESU ATUPEELE
19. Cinshi tufwaisha ukucita, kabili mulandu nshi?
19 Ni lilali tukaleka ukubomba umulimo wa kulenga abantu baba abasamba? Tukatwalilila ukubomba ukufika na ku mpela ya calo. (Mat. 28:20) Bushe tukakumanisha ukutwalilila ukubomba umulimo Yesu atupeela ukufika na ku mpela? Tulafwaisha ukutwalilila ukubomba! Tulaitemenwa ukubomfya inshita yesu, amaka yesu, e lyo ne fyo twakwata pa kuti tusange abantu ababa no ‘mutima uusuma uufwaya umweo wa muyayaya.’ (Imil. 13:48) Nga tulecita ifi ninshi tulepashanya Yesu. Yesu atile: “Ica kulya candi kucita ukufwaya kwa wantumine no kupwisha umulimo wakwe.” (Yoh. 4:34; 17:4) Ifi fine e fyo na ifwe tumfwa. Tulafwaisha ukupwisha umulimo uo Yesu atupeele. (Yoh. 20:21) Kabili tulafwaya ukutwalilila ukubombela pamo na bakasabankanya banensu uyu mulimo, ukubikako fye na banaka.—Mat. 24:13.
20. Ukulingana ne fyaba pa Abena Filipi 4:13, cinshi twingalandila ukutila kuti twapwisha ukubomba umulimo uo Yesu atupeele?
20 Ca cine ukuti taca-anguka ukupwisha ukubomba umulimo uo Yesu atupeele. Na lyo line, tatuba fweka ilyo tulebomba uyu mulimo. Yesu alilaile ukuti akulaba na ifwe. “Tubombela pamo na Lesa” ilyo tubomba umulimo wa kulenga abantu baba abasambi, kabili Kristu alaba na ifwe. (1 Kor. 3:9; 2 Kor. 2:17) Kanshi kuti twapwisha ukubomba uyu mulimo. Ala lishuko nga nshi ukubombako uyu mulimo no kwafwako abantu bambi ukuti na bo balebombako uyu mulimo!—Belengeni Abena Filipi 4:13.
ULWIMBO 79 Basambilisheni Ukwiminina Ndi
^ para. 5 Yesu aebele abasambi bakwe ukulalenga abantu baba abasambi no kulabasambilisha ukulakonka fyonse ifyo abebele. Cino cipande cilelanda pa fyo twingacita pa kuti tulekonka ifyo Yesu alandile. Ifyebo fimo ifili muli cino cipande fyaliba na mu cipande cali mu Ulupungu lwa kwa Kalinda ulwa July 1, 2004, amabula 14-19.
^ para. 66 UBULONDOLOSHI BWA CIKOPE: Ilyo nkashi aletungulula isambililo, alelondolwela umusambi ifyo alingile ukucita pa kuti atemwe sana Lesa. Pa numa umusambi alecita ifintu fitatu ifyo kasambilisha wakwe amusambilishe.
