“MWAPOLENI mukwai! Muli shani?”

Ukwabula no kutwishika mulalanda amashiwi ya musango uyu nga muleposha abantu. Nalimo mulafunka na bantu mu minwe nelyo mulabakumbatila pa kubaposha. Intambi tukonka na mashiwi tulanda pa kuposha yalapusana ukulingana fye ne ncende, lelo umutende wena umo wine. Na kuba, umuntu nga taposha nelyo nga tasuka nga bamuposha kuti balamumona ukuti tatemwa abantu nelyo taba na mucinshi.

Lelo te bantu bonse abatemwa ukuposha. Abantu bamo balafilwa ukuposha abantu pantu ba nsoni nelyo baliisuula. Bambi cilabakosela ukuposha abantu aba mushobo umbi, abakonka intambi shimbi, abakalamba, abaice, aba nkulilo imbi, abaume nelyo abanakashi. Na lyo line batila: “Mwapoleni akuulile umushi.”

Yipusheni amuti: ‘Cinshi ukuposha abantu kwacindamina? Kabili finshi Icebo ca kwa Lesa calandapo pa kuposha?’

Ilyo umutumwa Petro apokelele Korneli umwina Fyalo uwabalilepo ukuba mu cilonganino ca Bena Kristu, alandile ati: “Lesa taba na kapaatulula.” (Imil. 10:34) Pa numa Petro alembele ati Lesa “afwaya ukuti bonse bakalapile.” (2 Pet. 3:9) Pa kubala nalimo kuti twamona kwati aya malembo yalanda pa muntu uulesambilila icine. Lelo Petro na kabili akonkomeshe Abena Kristu ati: “Mulecindika abantu aba misango yonse, muletemwa aba bwananyina bonse.” (1 Pet. 2:17) Bushe te kuti ciwame tuleposha abantu bonse nangu ca kuti ba mushobo umbi, bakonka intambi shimbi, nelyo ba nkulilo iyapusana ne yesu? Nga tulecita ifi ninshi twalibacindika kabili twalibatemwa.

Umutumwa Paulo akoseleshe abali mu cilonganino ati: “Mulepokelelana, ifyo na Kristu atupokelele.” (Rom. 15:7) Paulo alilumbwile na mashina ya ba bwananyina ‘abamukoseleshe.’ Ukwabula no kutwishika muno nshiku e lyo tufwile no kucilapo ukulakoseleshanya pantu Satana aletulwisha sana fwe bantu ba kwa Lesa.—Kol. 4:11; Ukus. 12:12, 17.

Amalyashi yaba mu Baibolo yalanga ukuti umutende taulenga fye umuntu aumfwa bwino.

Ilyo inshita ya kukuushisha ubumi bwa Mwana wa kwa Lesa mu nda ya kwa Maria yafikile, Yehova atumine malaika ukuyalanda na Maria. Malaika atendeke ukulanda na Maria ati: “Mwapoleni, we wapaalwa nga nshi, Yehova ali nobe.” Aya mashiwi ‘yalisakamike’ Maria, pantu taishibe icalengele malaika alelanda nankwe. Ilyo malaika amwene ifi, atile: “Witiina, Maria, pantu Lesa nakupaala.” Kabili amwebele ukuti Lesa e walefwaya ukuti akafyale Mesia. Mu cifulo ca kutwalilila fye ukuba uwasakamikwa, Maria alisumine no kulanda ati: “Moneni! Ndi musha mwanakashi uwa kwa Yehova! Nacibe ifyo fine ukulingana ne fyo mwasosa.”—Luka 1:26-38.

Filya Yehova atumine malaika fyalangile ukuti alimucindike sana; lelo malaika talemona ukuti ali no kumoneka uwa pa nshi nga alanda no muntu uushapwililika. Atampilepo ukumuposha. Finshi tulesambilila kuli malaika? Tulingile ukulaitemenwa ukuposha abantu no kubakoselesha. Mu mashiwi fye ayanono ayo twingalanda kuti twayafwa abantu no kulenga balamona ukuti bantu ba kwa Yehova.

Paulo alishibe abantu abengi abali mu filonganino fya mu Asia Minor na mu Bulaya. Mu makalata alembele, alilumbwile na mashina ya ba bwananyina abo aposeshe. Ifi fine e fyaba mu cipandwa 16 ice  buuku lya Abena Roma. Paulo aliposeshe Abena Kristu banankwe abengi. Aitile Febi ati “nkashi yesu,” kabili akoseleshe aba bwananyina ati “mumupokelele muli Shikulu nga filya fine mupokelela aba mushilo, no kuti mumwafwe muli fyonse ifyo engakabila kuli imwe.” Na kabili Paulo aposeshe Priska na Akula abo alandilepo ati “te ine neka ndebatootela lelo ne filonganino fyonse ifya bena fyalo filebatootela.” Paulo aliposeshe na bantu abo tushaishiba sana pali lelo, pamo nga “Epainete” uo aitile ati “uwatemwikwa wandi” na “Trufaena na Trufosa, abanakashi abalebombesha muli Shikulu.” Ukwabula no kutwishika Paulo aleitemenwa ukuposha aba bwananyina.—Rom. 16:1-16.

Elenganyeni ifyo batemenwe ilyo baishibe ukuti Paulo tabalabile. Bafwile balitemenweko Paulo na ba bwananyina! Kabili ifi fifwile fyalikoseleshe Abena Kristu bambi, no kubafwa ukutwalilila ukuba ne citetekelo. Nga ca kuti ilyo tuleposha abantu tulebalanga ukuti twalibabikako amano kabili tulebatasha, balaba sana ifibusa fyesu kabili tulekatana nga nshi.

Ilyo Paulo afikile pa cabu ca Puteoli no kulola ku Roma, aba bwananyina balile ku kumupokelela. Ilyo abamwene ninshi bacili akatalamukila, “atootele Lesa kabili alikoshiwe.” (Imil. 28:13-15) Inshita shimo nalimo kuti twamwentula fye nelyo twaimisha fye umuntu ukuboko. Lelo ifi fine kuti fyakoselesha umuntu nalimo uusakamikwe nelyo uuli no bulanda.

Umusambi Yakobo alingile ukukalipila aba bwananyina pantu Abena Kristu bamo baishileba ifibusa ne calo. (Yako. 4:4) Lelo moneni ifyo Yakobo atendeke kalata yakwe:

“Ine ne Yakobo, ne musha wa kwa Lesa kabili uwa kwa Shikulu Yesu Kristu, ndeti mwapoleni mwe mikowa 12 iyasalanganina mu ncende shalekanalekana.” (Yako. 1:1) Ukwabula no kutwishika ilyo aba bwananyina baishibe ukuti alibaposeshe muli kalata abalembeele, tacabakosele ukukonka ifyo abebele pantu balishibe ukuti alebamona ukuti na bo bene bali babomfi ba kwa Lesa. Nga ca kuti twabalilapo ukuposha umuntu, kuti cayanguka no kulanshanya na pa malyashi ayayafya.

Nangu twalanda fye amashiwi ayanono pa kuposha umuntu, tufwile ukulanga ukuti twalimutemwa. Ifi e fyo tulingile ukucita na lintu abo tuleposha balemoneka ukuti tababikileko amano. (Mat. 22:39) Bushiku bumo nkashi ku calo ca Ireland afikile pa Ng’anda ya Bufumu ninshi ukulongana kuli mu kutampa. Ilyo alefwaya apa kwikala, munyinefwe umo alipilibwike, amumwentwila e lyo atila: “Muli shani? Natemwa ukumumona.” Nkashi aikele fye.

Ilyo papitile imilungu imo, nkashi alile kuli munyinefwe no kumweba ati pa nshita imo ali no bwafya ubukalamba pa ng’anda. Alandile ati: “Nalikalipe sana cilya cungulo bushiku ni cikanga fye niisa na ku Ng’anda ya Bufumu. Kwena te kuti njibukishe fyonse ifyo twasambilile, lelo ndebukisha umutende wenu. Mwalilengele naumfwa bwino ukuba pa Ng’anda ya Bufumu. Natootela.”

Munyinefwe taishibe ifyo nkashi aumfwile ilyo amuposeshe. Munyinefwe atile: “Ilyo anjebele ifyo aumfwile ilyo namuposeshe, nalyumfwile bwino sana filya namuposeshe. Na ine wine nalitemenwe.”

Solomone alembele ati: “Poosa ifya kulya fyobe pa menshi, pantu ilyo papita inshiku ishingi ukafisanga na kabili.” (Luk. Mil. 11:1) Nga natwishiba ukuti caliwama ukuposha abantu maka maka Abena Kristu banensu, tukalalenga abantu baleumfwa bwino kabili na ifwe bene tulomfwa bwino. Kanshi twilamona kwati ukuposha abantu takwacindama.