1. Finshi mucita pa kuti mube sana ifibusa no muntu?

ILINGI line ica kubalilapo ico mufwile ukucita pa kuti mube ifibusa no muntu, kulasangwa nankwe. Kuti mwaba sana ifibusa nga mulelanshanya nankwe pa fyo muletontonkanya na pa fyo muleumfwa. Na lyo line kwaliba fimo ifingalenga catukosela ukuba ifibusa na Yesu. Finshi fingalenga catukosela?

2. Landeni ica kubalilapo icingalenga catukosela ukuba cibusa wa kwa Yesu.

² Ica kubalilapo icingalenga catukosela ukuba ifibusa na Yesu ca kuti tatwamonanapo nankwe. Abena Kristu abengi abaliko mu nshita ya batumwa nabo tabamonenepo na Yesu. Na lyo line umutumwa Petro alandile ukuti: “Nangu ca kuti tamwamumwene, mwalimutemwa. Nangu tamumumona pali nomba, mulamutetekela.” (1 Pet. 1:8) Ifi alandile filanga fye ukuti umuntu kuti aba cibusa wa kwa Yesu nangu ca kuti tamumonapo.

3. Landeni icalenga bubili icingalenga catukosela ukuba cibusa wa kwa Yesu.

³ Icalenga bubili icingalenga catukosela ukuba ifibusa na Yesu ca kutila te kuti tulande nankwe. Ilyo tulepepa, tulanda na Yehova. Kwena tupepela mwi shina lya kwa Yesu, lelo tatulanda nankwe. Na kuba, Yesu tafwaya ukuti tulepepa kuli ena. Mulandu nshi? Pantu ipepo lubali lwa kupepa, kabili Yehova fye e o tulingile ukupepa. (Mat. 4:10) Na lyo line, kuti twalanga ukuti twalitemwa Yesu.

4. Cinshi cimbi icingalenga catukosela ukuba ifibusa fya kwa Yesu, kabili finshi twalasambilila muli cino cipande?

 ⁴ Icalenga butatu icingalenga catukosela ukuba ifibusa na Yesu ca kuti Yesu aba ku muulu, kanshi te kuti tube pamo nankwe. Na lyo line kuti twaishiba ifingi pali ena, nangu ca kuti tatuli nankwe. Twalalanda pa fintu fine, ifingatwafwa ukukosha bucibusa bwesu na Yesu. Natubalilepo ukulanda pa co cacindamina ukuba ifibusa sana na Kristu.

5. Cinshi tulingile ukubela ifibusa na Yesu? (Moneni akabokoshi akaleti “ Ukuba Cibusa wa kwa Yesu E Kwingalenga Mwaba Cibusa wa kwa Yehova,” na kaleti “ Muleishiba Bwino Icifulo Yesu Akwata.”)

⁵ Pa kuti tube na bucibusa busuma na Yehova, tulingile ukuba ifibusa fya kwa Yesu. Cinshi twalandila ifi? Ica kubalilapo, Yesu aebele abasambi bakwe ukuti: “Tata umwine alimutemwa, ico mwalintemwa.” (Yoh. 16:27) Alandile no kuti: “Takuli uwisa kuli Tata kano aishila muli ine.” (Yoh. 14:6) Ukufwaya ukuba cibusa wa kwa Yehova ukwabula ukuba cibusa wa kwa Yesu, cimo cine no kufwaya ukwingila mu cikuulwa ukwabula ukupitila pa mwinshi. Yesu alibomfeshe icilangililo capalana ne ci ilyo alandile ukuti ali “mwinshi wa mpaanga.” (Yoh. 10:7) Icalenga bubili, Yesu alepashanya sana imibele ya kwa Wishi. Aebele abasambi bakwe ati: “Uwamona ine, ninshi amona na Tata.” (Yoh. 14:9) Kanshi inshila iisuma iyo twingeshibilamo Yehova kulasambilila pali Yesu. Nga twaishiba ifingi pali Yesu, tukamutemenwako. Kabili nga twamutemwa sana, tukatemwa sana na Wishi.

6. Mulandu nshi umbi uo tulingile ukubela ifibusa fya kwa Yesu? Londololeni.

⁶ Tufwile ukuba cibusa wa kwa Yesu pa kuti amapepo yesu yaleasukwa. Kanshi kwaliba  na fimbi ifyo tulingile ukucita, ukulunda pa kulanda fye ukuti “ukupitila mwi shina lya kwa Yesu” ilyo tulepepa. Tufwile ukwishiba ifyo Yehova abomfya Yesu pa kwasuka amapepo yesu. Yesu aebele abatumwa ukuti: “Conse ico mwalombela mwi shina lyandi, nkacicita.” (Yoh. 14:13) Nangu ca kuti Yehova e umfwa no kwasuka amapepo yesu, alipeela Yesu amaka ya kucita ifyo Yehova alefwaya ukucita. (Mat. 28:18) Kanshi ilyo Yehova tala-asuka amapepo yesu, alamona nga ca kuti tulakonka ifyo Yesu alandile. Ku ca kumwenako, Yesu atile: “Nga mwabelela uluse abamulufyanya, Shinwe wa mu muulu na o akamubelela uluse; nomba nga tamubelela uluse abamulufyanya, na Shinwe wa mu muulu takamubelele uluse ku fyo mulufyanya.” (Mat. 6:14, 15) Kanshi calicindama ukulabelela abantu banensu uluse nga filya fine Yehova na Yesu batubelela uluse!

7. Ni bani bakanonkelamo mwi lambo lya cilubula?

⁷ Ababa ifibusa fya kwa Yesu, e bakanonkelamo mwi lambo lya cilubula. Twaishiba shani? Yesu alandile ukuti ali no ‘kutuulila abanankwe umweo wakwe.’ (Yoh. 15:13) Ababomfi ba kwa Yehova aba cishinka abaliko ilyo Yesu ashilaisa pano isonde bakasambilila pali ena kabili bakamutemwa. Abaume na banakashi pamo nga Abrahamu, Sara, Mose na Rahabu bakabuushiwa, kabili nangu ca kuti bali balungami bakakabila ukuba ifibusa fya kwa Yesu pa kuti bakabe no mweo wa muyayaya.—Yoh. 17:3; Imil. 24:15; Heb. 11:8-12, 24-26, 31.

8-9. Nga fintu Baibolo ilanda pali Yohane 15:4, 5, bushe ukuba ifibusa fya kwa Yesu kulenga tulecita finshi, kabili mulandu nshi cacindamina ukutemwa Yesu?

⁸ Tulaba ne nsansa ukubombela pamo na Yesu umulimo wa kushimikila no kusambilisha abantu pa Bufumu. Ilyo Yesu ali pano calo, alesambilisha abantu. Kabili ukufuma apo abwelelemo ku muulu, Yesu umutwe wa cilonganino, alitwalilila ukutungulula umulimo wa kushimikila no kusambilisha abantu. Alamona kabili alatasha sana pa fyo mubombesha ukwafwa abantu abengi ukumwishiba no kwishiba Wishi. Na kuba, te kuti tubombe bwino uyu mulimo nga ca kuti Yehova na Yesu tabaletwafwa.—Belengeni Yohane 15:4, 5.

⁹ Icebo ca kwa Lesa citweba ukuti tulingile ukutemwa Yesu pa kuti tulesekesha Yehova. Kanshi lekeni tulande pa fintu fine ifingatwafwa ukuba ifibusa fya kwa Yesu.

10. Cinshi tufwile ukubalilapo ukucita pa kuti tube ifibusa fya kwa Yesu?

¹⁰ (1) Tulingile ukwishiba bwino Yesu. Kuti twaishiba bwino Yesu nga tulebelenga amabuuku ya mbila nsuma, e kutila Mateo, Marko, Luka na Yohane. Nga tuletontonkanya sana pa fyaba mu mabuuku ya mu Baibolo ayalanda pa bumi bwa kwa Yesu, tulamutemwa kabili tulamucindika pa mulandu wa kuti alelanga icikuuku ku bantu. Ku ca kumwenako, talesunga abasambi bakwe nga basha nangu ca kuti ali ni Shikulu wabo. Lelo alebebako ifyo aletontonkanya ne fyo aleumfwa. (Yoh. 15:15) Ilyo baleba no bulanda, Yesu na o aleba no bulanda. (Yoh. 11:32-36) Na balwani bakwe balimwene ukuti abapokelele imbila nsuma baishileba ifibusa fya kwa Yesu. (Mat. 11:19) Nga tulepashanya ifyo Yesu alesunga abasambi bakwe, tukalaumfwana bwino na bantu banensu, tukaba ne nsansa kabili tukatemenwako Kristu no kulamucindika.

11. Cinshi icalenga bubili ico tulingile ukucita pa kuti tube ifibusa fya kwa Yesu, kabili mulandu nshi cacindamina ukucita ifi?

 ¹¹ (2) Tufwile ukulapashanya Yesu mu fyo tutontonkanya na mu fyo tucita. Nga twaishiba bwino ifyo Yesu atontonkanya kabili nga tulemupashanya, bucibusa bwesu na ena bukakoselako. (1 Kor. 2:16) Finshi twingacita pa kuti tulepashanya Yesu? Tontonkanyeni pali cimo ico Yesu alecita. Alebika sana amano ku kwafwa abantu ukucila ukubika amano ku kucita ifingamuwamina. (Mat. 20:28; Rom. 15:1-3) Ici calelenga aleipeelesha ukubafwa no kulababelela uluse. Talefulwa bwangu abantu nga balanda ifibi pali ena. (Yoh. 1:46, 47) Kabili talesunga ifilubo ifyo abantu bacitile kale. (1 Tim. 1:12-14) Yesu atile: “Nga muletemwana, e lyo bonse bakeshiba ukuti muli basambi bandi.” (Yoh. 13:35) Kanshi kuti cawama mwayipusha amuti, “Bushe ndesha na maka ukuba pa mutende na bamunyinefwe na bankashi pa kuti ndepashanya Yesu?”

12. (a) Cinshi icalenga butatu ico tulingile ukucita pa kuba ifibusa fya kwa Yesu? (b) Finshi twingacita pa kutungilila bamunyina ba kwa Kristu?

¹² (3) Tufwile ukulatungilila bamunyina ba kwa Kristu. Yesu amona ukuti nga tuleafwilisha bamunyina bakwe abasubwa, ninshi e o tuleafwilisha. (Mat. 25:34-40) Inshila iikalamba iyo twafwilamo abasubwa kubombako umulimo wa kubila pa Bufumu no kupanga abasambi, uo Yesu aebele abasambi bakwe ukulabomba. (Mat. 28:19, 20; Imil. 10:42) Bamunyina ba kwa Kristu te kuti bakumanishe ukubomba umulimo ubombwa muno nshiku uwa kubila imbila nsuma mwi sonde lyonse, nga ca kuti ababa mwi bumba lya “mpaanga shimbi” tababafwileko. (Yoh. 10:16) Nga ca kuti muli ba mu mpaanga shimbi, nga mwabombako uyu mulimo, ninshi mulelanga ukuti mwalitemwa abasubwa kabili ninshi mwalitemwa na Yesu.

13. Finshi twingacita pa kuti tulekonka ifyo Yesu alandile pali Luka 16:9?

¹³ Na kabili, kuti twaba ifibusa fya kwa Yehova na Yesu nga ca kuti tulesangwilako ku mulimo uo batungulula. (Belengeni Luka 16:9.) Ku ca kumwenako, kuti twasangwilako ku mulimo wa mwi sonde lyonse, kabili ishi imisangulo balashibomfya ku kutungilila umulimo wa kubila imbila nsuma mu ncende ishabela ukutali, balashibomfya mu kukuula no kuwamya Amayanda ya Bufumu ne fikulwa fimbi ifyo tubomfya mu cilonganino ca kwa Yehova, kabili balashibomfya na ku kwafwilisha abaponenwa na masanso ayakalamba. Na kabili kuti twasangwilako indalama sha cilonganino kabili kuti twabomfya ifyo twakwata ku kwafwilisha abalekabila ubwafwilisho. (Amapi. 19:17) Nga tulecita ifi, ninshi tuletungilila bamunyina ba kwa Kristu.

14. Ukulingana ne fyaba pa Abena Efese 4:15, 16, cinshi icalenga bune ico twingacita pa kuti tube ifibusa fya kwa Yesu?

¹⁴ (4) Tulingile ukulatungilila icilonganino ca kwa Yehova. Bucibusa bwesu na Yesu umutwe wa cilonganino bulakoselako nga tuleumfwila abo basonta ukulatutungulula. (Belengeni Abena Efese 4:15, 16.) Ku ca kumwenako, tulafwaya ukubomfya bwino Amayanda ya Bufumu. Ici e cilenga ifilonganino fimo bafikumbinkanye pamo, kabili bakushe nelyo bacefyeko ififulo fya kushimikilamo. Ukucita ifi kulalenga tulebomfya bwino imisangulo sha cilonganino ca kwa Yehova. Na lyo line, ifilonganino nga bafikumbinkanya bakasabankanya aba muli ifyo filonganino balakabila ukwaluka muli fimo. Bakasabankanya bamo nalimo bali mu cilonganino  cimo pa myaka iingi kabili balipangile ifibusa na bamunyinabo na bankashi aba muli ico cilonganino. Lelo pali ino nshita balibeba ukuya mu cilonganino cimbi. Ala Yesu alatemwa nga amona abasambi bakwe aba cishinka balekonka ifyo babeba!

15. Bushe bucibusa bwesu na Yesu bukaba shani ku ntanshi?

¹⁵ Abasubwa no mupashi wa mushilo balikwata isubilo lya kuba pamo na Yesu umuyayaya, kabili bakalateka pamo nankwe mu Bufumu bwa kwa Lesa. Bakalamonana na Yesu, bakalalanda nankwe, kabili bakalaba pamo nankwe. (Yoh. 14:2, 3) Yesu alitemwa na bakwata isubilo lya kwikala pano isonde kabili alibabikako amano. Nangu ca kuti tabakalemonana nankwe, bucibusa bwabo bukakoselako kabili bakaba ne nsansa pantu Yehova na Yesu bakabapaala nga nshi.—Esa. 9:6, 7.

16. Mapaalo nshi tuipakisha nga twaba ifibusa fya kwa Yesu?

¹⁶ Nga ca kuti twaba ifibusa fya kwa Yesu, tulapaalwa nga nshi. Ku ca kumwenako, na pali ino ine nshita tulaba ne nsansa pantu Yesu alatulanga ukutemwa kabili alatutungilila. Twalikwata isubilo lya kwisaikala umuyayaya. Ne cacindama ca kutila, nga twaba ifibusa fya kwa Yesu tukaba ifibusa sana na Wishi wa ku muulu, Yehova. Ala lishuko icine cine ukuba ifibusa fya kwa Yesu!