ABANTU balalanda ifyalekanalekana pa mweo na pa mfwa. Bambi bamona kwati nga bafwa kuti batwalilila ukuba aba mweo ku cifulo cimbi nelyo ukufyalilwa mu cintu cimbi. Bambi nabo bamona kwati nga bafwa bakafyalwa na kabili. Na lyo line, bambi bamona kwati nga bafwa ninshi e mpela yabo.

Ukulingana ne fyo bamukusha ne cifulo mwakuliileko, na imwe kufwile kwaliba ifyo mwasuminamo pali ili ilyashi. Apo abantu balalanda ifyalekanalekana pa fyo ciba umuntu nga afwa, bushe kwaliba uwingatweba nelyo uko twingasanga icasuko ca cine kuli ici icipusho?

Pa myaka iingi, intungulushi sha mapepo shisambilisha ukuti umweo wa muntu taufwa. Ababa mu filonganino fya Bena Kristu, abaHindu, abaYuda, abaShilamu e lyo na baba mu filonganino fya mapepo fimbi, baishiba ukuti umuntu nga afwa, umweo wakwe taufwa, lelo uya fye ku cifulo ca mipashi. AbaBuddha bena basumina ukuti umuntu alafwa no kufyalwa imiku iingi mpaka umupashi wafyalilwa ku cifulo icisuma ico beta ati Nirvana.

Ifi abantu basambilisha pa mfwa e fyalenga abengi muno calo basumine ukuti umuntu nga afwa alaya ku cifulo cimbi. Kanshi abantu abengi bamona kwati ukufwa kulalenga batendeka ubumi bumbi no kuti Lesa afwaya ukuti tulefwa. Nomba cinshi Baibolo yalandapo pa mfwa? Belengeni icipande cikonkelepo. Nalimo kuti mwapapa nga mwamona ifyo Baibolo yayasuka ici cipusho.