PALI ino nshita ifintu mu calo tafyaba nga fintu Lesa alefwaya fibe. Lesa alefwaya ukuti mu calo mwisule abantu abaishiba ukuti e walinga fye ukubateka, abakonka ifyo alanda, kabili abamupashanya. Alefwaya no kuti baleumfwana bwino ilyo balekusha abana babo, ilyo balesambilila pa fintu ifipya, na lintu balelenga isonde lyonse ukuba paradaise.

• “Alelenga inkondo ukupwa ukufika ku mpela sha pano isonde.”—Amalumbo 46:9.

• “Inshita . . . ya konaula abaleonaula isonde [yafika].”—Ukusokolola 11:18.

• “Takuli umwikashi uukatila: ‘Nindwala.’”—Esaya 33:24.

• “Umulimo wa minwe yabo abasalwa bandi bakasekelamo nga nshi.”—Esaya 65:22.

Bushe aya amasesemo yakafikilishiwa shani? Lesa alisonta Umwana wakwe Yesu, ukuba Imfumu ya bufumu bwa ku muulu ubukalateka bwino isonde. Baibolo ita ubu ubufumu ukuti Ubufumu bwa kwa Lesa. (Daniele 2:44) Baibolo ilanda pali Yesu ukuti: “Lesa akamupeela icipuna ca bufumu . . . , kabili akaba Imfumu.”—Luka 1:32, 33.

Ilyo Yesu ali pa calo, alicitile ifipesha mano ifilanga ukuti ilyo akalateka, ifintu fikawama sana ukucila ifyo fyaba pali ino nshita.

• Alyundepe amalwele ya misango yonse, icilanga ukuti ilyo akalateka akapwisha amalwele yonse pa calo.—Mateo 9:35.

• Alitalalike amabimbi pali bemba, icilanga ukuti akulacingilila abantu ku masanso ayo ifyo Lesa abumba fingaleta.—Marko 4:36-39.

• Alipeele abantu abengi sana ifya kulya, icilanga ukuti akalapeela abantu ifyo bakabila.—Marko 6:41-44.

• Alisangwile amenshi ukuba umwangashi ilyo kwali ubwinga, icilanga ukuti akulacitila abantu ifikalalenga bakaleba ne nsansa.—Yohane 2:7-11.

Kuti mwacita shani pa kuti mukabeko ilyo Lesa akalenga abantu abamutemwa ukulaikala bwino? Kwaliba “umusebo” uo mulingile ukulaendamo. Baibolo ilanda ukuti uyu “musebo waya ku bumi . . . kabili banono abausanga.”—Mateo 7:14.

Bushe uyu umusebo e cinshi? Uyu umusebo wimininako ifyo Lesa atweba. Lesa alanda ukuti: “Ine, ne Yehova, nine Lesa obe, uukusambilisha ifingakuwamina, uukwensha mu nshila iyo ufwile ukwendamo.” (Esaya 48:17) Ifintu filatuwamina nga tulecita ifyo Yehova atweba.

Yesu atile: “Nine nshila ne cine no mweo.” (Yohane 14:6) Nga twacetekela ifyo Yesu alesambilisha  kabili tulemupashanya, kuti twaba ifibusa fya kwa Lesa kabili ifintu kuti filetuwamina.

Kuti mwacita shani pa kuti musange umusebo uwaya ku mweo? Kwaliba imipepele iingi mu calo, lelo Yesu alandile ukuti: “Te onse uutila kuli ine, ‘Shikulu, Shikulu’ akengila mu bufumu bwa mu muulu, kano uucita ififwaya Tata uwaba mu muulu e ukengilamo.” (Mateo 7:21) Alandile no kuti: “Mukabeshibila ku fisabo fyabo.” (Mateo 7:16) Baibolo kuti yamwafwa ukwishiba ukupepa kwa cine no kwa bufi.—Yohane 17:17.

Kuti mwacita shani pa kuti muleenda mu musebo uwaya ku mweo? Mufwile ukwishiba Intulo ya mweo: Nani intulo ya mweo? Bushe ni nani ishina? Bushe aba shani? Finshi atucitila muno nshiku? Finshi afwaya tulecita? *

Yehova tafwaya fye ukutila, tulebomba, ukulya, ukwangala, no kukwata abana. Afwaya no kuti twamwishiba kabili twaba ifibusa fyakwe. Kuti twalanga ukuti twalimutemwa nga tulecita ifyo afwaya. Yesu atile: “Nomba pa kuti babe no mweo wa muyayaya, kano baishiba imwe mwe Lesa wa cine mweka.”—Yohane 17:3.

Pa kuti mulecita ifyo Lesa afwaya, kuti kwaba ifyo mulingile ukwalukamo. Nalimo kuti mwamona kwati ukucita ifi kwalyafya sana. Nomba icishinka ca kuti mukaba sana ne nsansa nga mwatendeka ukwenda mu musebo wa ku mweo. Nga mulefwaya ukwishiba amasuko ku mepusho yacindama pali Lesa, kuti mwaeba ba Nte ukuti balemusambilisha Baibolo ukwabula ukumulipilisha, pa nshita ne cifulo ico mwingatemwa. Na kabili kuti mwalanshanya na ifwe ukubomfya webusaiti yesu iya www.jw.org/bem.