PALI Citatu ulucelo, pa 24 January mu 2018, ababombela pa Bethel ya ku United States ne ya ku Canada balyumfwile ifyo babilishe ati: Munyinefwe Kenneth Cook, Jr nabamusonta ukuba mwi Bumba Litungulula ilya Nte sha kwa Yehova.

Munyinefwe Cook afyalilwe mu citungu ca Pennsylvania, ku U.S.A kabili no kukula e ko akulile. Asambilile icine ku mwana we sukulu munankwe ilyo ali mu kupwisha isukulu lya ku sekondari, kabili abatishiwe pa 7 June mu 1980. Munyinefwe Cook atendeke bupainiya pa 1 September mu 1982. Pa numa ya kubomba bupainiya pa myaka ibili, balimwitile ku Bethel kabili atendekele ukubombela pa Bethel ya ku Wallkill, mu New York pa 12 October mu 1984.

Pa myaka 25 munyinefwe Cook alibombele imilimo iyalekanalekana mu cikuulwa umo bapulintila impapulo na mu maofeshi yambi aya pa Bethel. Mu 1996 aupile ba Jamie kabili bonse batwalilile ukubombela pa Bethel ya ku Wallkill. Mu December mu 2009, munyinefwe Cook no mwina mwakwe babakuushishe ku Watchtower Educational Center ku Patterson, mu New York kabili atendeke ukubombela mu dipartimenti iyasuka amepusho ayo abantu bepusha. Mu April mu 2016, munyinefwe Cook no mwina mwakwe babwelele ku Wallkill kabili tapakokwele babakuushishe ku Brooklyn, mu New York. Pa numa ya myeshi 5 bakuukile ku maofeshi yakalamba aya Nte sha kwa Yehova ku Warwick, mu New York. Mu January mu 2017, munyinefwe Cook balimusontele ukuba kafwa muli Komiti ya Kulemba iye Bumba Litungulula.