1-3. (a) Bushe ifintu fyali shani ku bantu ba kwa Yehova ilyo Sekaria atendeke bukasesema? (b) Mulandu nshi Yehova aebele abantu bakwe ‘ukubwelela kuli ena’?

MWI buuku lya kwa Sekaria mwaba icimonwa ca cimfungwa icalepupuka, ica mwanakashi uo baisalile mwi tepe, na ica banakashi babili abaleisa no mwela mu mapindo yabo kwati ya bakabaso. (Seka. 5:1, 7-9) Mulandu nshi Yehova alangile kasesema wakwe ifimonwa fya musango uyu? Bushe pali ilya nshita ifintu fyali shani mu Israele? Bushe ifi ifimonwa ifyo Sekaria alembele fyatukuma shani pali lelo?

² Mu mwaka wa 537 ninshi Yesu talaisa pano isonde, abantu abaipeele kuli Yehova balisekelele nga nshi. Pa numa ya kwikala muli bunkole pa myaka 70 aba bantu balibalubwile ukufuma mu Babiloni. Apo balisekelele, batendeke umulimo wa kubwesha ukupepa kwa cine mu Yerusalemu. Mu mwaka wakonkelepo mu 536, balimbile umufula wa kukuulapo itempele. Pali ilya nshita  abantu “balewelesha ne shiwi ilikalamba, ne ciunda ici caumfwikike ukufika ukutali sana.” (Esra 3:10-13) Na lyo line, abantu bambi batendeke ukubakaanya ukubomba umulimo wa makuule. Ifi abantu balebakaanya fyalengele bafuupulwa ica kuti baleka no kukuula itempele, baya na mu kusunga amayanda yabo na mu kulima amabala yabo. Na lintu papitile imyaka 16 abena Israele tabapwile ukukuula itempele lya kwa Yehova. Abantu ba kwa Lesa balekabila ukubacinkulako ukuti balingile ukubwelela kuli Yehova no kuleka ukubika fye amano ku milimo yabo. Yehova alefwaya abantu bakwe batampe ukumupepa na kabili no mweo onse.

³ Pa kwibukishako abantu bakwe icalengele abalubule mu Babiloni, Lesa abatumiine kasesema Sekaria mu mwaka wa 520 ninshi Yesu talaisa pano isonde. Ishina lya kuti Sekaria ilyalola mu kuti “Yehova Naibukisha,” nalimo lyalibebukisheko icishinka icikalamba ica kuti, nangu ca kutila balilabile ifyo Yehova abapuswishe, Lesa ena talabile abantu bakwe. (Belengeni Sekaria 1:3, 4.) Yehova alibalaile ukuti aali no kubafwa ukubwesha ukupepa kwa cine, lelo alibasokele ukuti taali no kupokelela ukupepa kwabo nga ca kuti tabali no kulamupepa no mweo onse. Natumone ifyo Yehova abacincishe ukulabomba mu cimonwa calenga 6 na 7 ifyo Sekaria amwene. Twalamona ne fyo twingasambilila kuli ifi ifimonwa muno nshiku.

4. Cinshi Sekaria amwene mu cimonwa calenga 6, kabili calolele mwi filya icimfungwa calembelwe uku no ku? (Moneni icikope 1 pa ntendekelo ya cino cipande.)

⁴ Icipandwa 5 ice buuku lya kwa Sekaria catendeka ne cimonwa ca kupapusha. (Belengeni Sekaria 5:1, 2.) Sekaria amwene icimfungwa icalepele amamita 9 mu butali na mamita 4 na hafu mu bwipi cilepupuka! Ici icimfungwa cali icafungululwa. Pali ici cimfungwa palembelwe ubukombe bwa bupingushi kabili bwalembelwe uku no uku. (Seka. 5:3) Ilingi line pa fimfungwa balelemba fye ulubali lumo, kanshi ifi balembele uku no ku, calepilibula ukuti ubukombe bwalipo bwali ubwaluma.

5, 6. Bushe Yehova amona shani ubupuupu bonse apo bwapela?

⁵ Belengeni Sekaria 5:3, 4. Nangu ca kuti abantu bonse bakalubulula kuli Yehova, abantu bakwe bena cikacilanapo. Abatemwa Lesa balishiba ukuti ubupuupu bonse fye apo bwapela ‘bulaseebanya ishina lya kwa Lesa wabo.’ (Amapi. 30:8, 9) Abantu bamo bamona ukuti caliba fye bwino ukwiba nga ca kuti nababulisha fimo, nampo ici nga e cilenga nelyo iyo, umupuupu abika fye amano ku fyo umutima wakwe ulefwaya ukucila ukucindika Lesa. Alasuula amafunde ya kwa Lesa, tacindika Yehova ne Shina lyakwe.

⁶ Bushe mwacimona ukuti pali Sekaria 5:3, 4 patila “icitiipu . . . [cali no] kwingila mu ng’anda ya mupuupu . . . kabili [cali no] kwikala mu kati ka ng’anda yakwe no konaula yena”? Umuntu nangu engafisama shani te kuti abutuke ubupingushi bwa kwa Yehova. Yehova kuti asokolola ifyabipa ifyo abantu bakwe bacita. Nangu ca kuti umuntu kuti afisama ku balashi, ku bamwingisha incito, kuli baeluda, nelyo ku bafyashi, te kuti abelame kuli Lesa uwalanda ukuti ubupuupu bonse apo bwapela bukasokoloka. (Heb. 4:13) Ala tulomfwa bwino ukulayampana na bantu abafwaisha ukuba abafumacumi “muli fyonse”!—Heb. 13:18.

7. Kuti twapusuka shani icitiipu ca cimfungwa icilepupuka?

⁷ Ubupuupu bonse apo bwapela bulakalifya Yehova. Tumona ukuti ukukonka amafunde ya kwa Yehova, ukuba ne mibele iingalenga ishina lyakwe lilecindikwa, mucinshi uo Yehova atupeela. Nga tulecita ifi, kuti twaisapusuka ilyo  akapingula abantu abashikonka amafunde yakwe ku mufulo fye.

8-10. (a) Bushe umulapo ni cinshi? (b) Mulapo nshi Imfumu Sidekia ishafishishepo?

⁸ Ubukombe ubwalembelwe pa cimfungwa icalepupuka bwakonkenyepo ukusoka ‘abalelapa umulapo uwa bufi mwi shina lya kwa Lesa.’ (Seka. 5:4) Umulapo kulanda amashiwi ayalelanga ukuti ifintu fimo fya cine nelyo ukulaya ukucita nelyo ukukanacita ifintu fimo.

⁹ Ukulapa umulapo mwi shina lya kwa Yehova te cintu ca kusenda buyefya buyefya. Ifi fine e fyo uwalekelesheko ukuba imfumu mu Yerusalemu acitile. Sidekia alapile mulapo mwi shina lya kwa Yehova ukuti ali no kulabombela imfumu ya bena Babiloni. Lelo Sidekia tafishishepo umulapo wakwe. Ici calengele Yehova amupingule ati: “Na pali ne mwine, . . . ku cifulo ukwikala imfumu iyabikile [Sidekia] pa bufumu uwasuulile umulapo wa iko no kupula mu cipangano ca iko, e ko akafwila, e kutila mu Babiloni.”—Esek. 17:16.

¹⁰ Apo Imfumu Sidekia yalapiile umulapo mwi shina lya kwa Lesa, yalingile fye ukucita ifyo yalapile. (2 Imila. 36:13) Mu cifulo ca kucita ifyo alapile, Sidekia aile ku Egupti pa kuti bamwafwe ukulubuka ku mfumu ya ku Babiloni lelo tabamwafwile.—Esek. 17:11-15, 17, 18.

11, 12. (a) Mulapo nshi uwacindamisha uo twingalapa? (b) Bushe umulapo wa kuipeela ulingile ukukuma shani ifyo tucita cila bushiku?

¹¹ Na muno nshiku mwine Yehova alomfwa imilapo iyo tulapa. Yehova afwaya tulefishapo imilapo pa kuti atutemwe. (Amalu. 76:11) Pa milapo yonse iyo tulapa, umulapo uwacindama sana, mulapo tulapa pa kuipeela kuli Yehova. Umuntu nga aipeela kuli Yehova ninshi alapa ukuti akulamubombela nangu ifintu fyafye shani.

¹² Kuti twacita shani pa kuti tulefishapo umulapo uo twalapa uwa kuipeela? Ifyo tucita nga  twakwata amesho ayakalamba nelyo ayanono filingile ukulanga ukuti tatwasenda buyefya buyefya umulapo wesu uwa kulumbanya Yehova “ubushiku no bushiku.” (Amalu. 61:8) Ku ca kumwenako, nga ca kuti umo pa ncito nelyo pa sukulu alelanga icintemwa, bushe tumona ukuti iyi e nshita ya kukaana pa kuti ‘tulesekelela mu mibele ya kwa Yehova’? (Amapi. 23:26) Nga ca kuti twikala na bashili ba Nte, bushe tulalomba Yehova ukuti aletwafwa ukuba ne mibele iisuma nangu ca kuti bambi mu lupwa tabeshanako ukuba ne yi mibele? Bushe tulapepa kuli Shifwe wa ku muulu cila bushiku no kumutasha pa fyo atutungulula na pa fyo atutemwa? Bushe tulakwata inshita ya kubelenga Baibolo cila bushiku? Bushe ilyo twaipeele tatwalaile ukuti tukalacita ifi? Nga tulefishapo umulapo wesu ninshi tuli bacumfwila. Nga tulebombesha mu kupepa Yehova ninshi tulelanga ukuti twalimutemwa kabili twaliipeela no mweo onse. Tatupepela Yehova ico cine fye lelo tulaitemenwa ukumupepa. Nga tulefishapo imilapo yesu ifintu filatuwamina; nga tuli aba cishinka tukekala bwino ku ntanshi.—Amala. 10:12, 13.

13. Finshi twasambilila ku cimonwa calenga 6 ico Sekaria amwene?

¹³ Icimonwa calenga 6 ico Sekaria amwene catwafwa ukwishiba ukuti abatemwa Yehova tabalingile ukulaiba nelyo ukufilwa ukufishapo imilapo. Na kabili catwafwa ukumona ukuti nangu ca kuti abena Israele tabaleumfwila Yehova, ena tabalabile. Yehova alishibe amafya ayo balekwata pa mulandu na balwani babo ababashingulwike. Na ifwe bene tufwile ukulafishapo imilapo nga filya fine Yehova acita, kabili akalatwafwa ukufishapo imilapo yesu. Yehova alitupeela isubilo lya kuti ali no kufumyapo ifyabipa fyonse pano isonde kabili iyi ni nshila imo iyo atwafwilamo. Icimonwa cakonkapo ico Sekaria amwene cilanga ukuti ukwabula no kutwishika Yehova akafumyapo ifyabipa.

14, 15. (a) Finshi Sekaria amwene mu cimonwa calenga 7? (Moneni icikope 2 pa ntendekelo ya cino cipande.) (b) Finshi umwanakashi uwali mwi tepe emininako, kabili mulandu nshi bamubikiile mwi tepe no kwisalapo?

¹⁴ Pa numa Sekaria amona icimonwa ca cimfungwa icalepupuka, malaika amwebele ‘ukwinuna amenso.’ Finshi amwene mu cimonwa calenga 7? Amwene “itepe” lileisa. (Belengeni Sekaria 5:5-8.) Ili tepe lyalikwete ne “nkupiko ya mutofwe.” Ilyo inkupiko yakupukwilwe, Sekaria amwene ‘umwanakashi naikala mwi tepe.’ Malaika alondolwele ukuti umwanakashi uwaikele mwi tepe aleimininako “ifyabipa.” Elenganyeni ifyo Sekaria atiniine ilyo amwene umwanakashi alefwaya ukufuma mwi tepe! Bwangu bwangu malaika alimufwintiile mwi tepe kabili aiselepo inkupiko ya mutofwe uwafina. Bushe ifi malaika acitile fyalola mwi?

¹⁵ Ifi malaika acitile fyalola mu kuti Yehova takasuminishe abacita ifyabipa ukuba mu bantu bakwe. Yehova akangufyanya ukubafumyamo. (1 Kor. 5:13) Filya malaika ayangufyenye ukwisala pe tepe filenga twashininkisha ukuti Yehova akafumyapo abacita ifyabipa.

16. (a) Finshi Sekaria amwene ifyacitike kwi tepe? (Moneni icikope 3 pa ntendekelo ya cino cipande.) (b) Ni kwi abanakashi abali na mapindo batwele itepe?

¹⁶ Na kabili Sekaria amwene abanakashi babili abakwete amapindo ayakosa nga ya kwa kabaso. (Belengeni Sekaria 5:9-11.) Ala aba banakashi babili balipusene sana na umwanakashi uwali mwi tepe! Aba banakashi babomfeshe amapindo yabo ayakosa no kufuuba itepe umwali “ifyabipa.” Bushe aba abanakashi baletwala kwisa ifyabipa? Balefitwala mu “calo ca Shinari,” nelyo mu Babiloni. Nomba mulandu nshi batwalile itepe ku Babiloni?

17, 18. (a) Mulandu nshi icalo ca Shinari cabelele ‘icifulo calinga’ uko “ifyabipa” fyalingile ukuba? (b) Finshi tulingile ukulafwaisha ukucita pa bubifi?

 ¹⁷ Abena Israele abaliko mu nshiku sha kwa Sekaria balishibe ukuti ku Shinari eko ifyabipa fyalingile ukuba. Sekaria na baYuda banankwe balishibe ukuti mu Babiloni mwalecitika ifyabipa pali ilya nshita. Apo bakuliile muli uyu umusumba umwalecitika ifyabipa, cila bushiku balingile ukulalwisha na maka pa kuti belacitako ifyabipa ifyo abengi balecita. Ukwabula no kutwishika ici icimonwa calilengele baumfwa bwino kabili bashininkisha ukuti Yehova ali no kucingilila ukupepa kwa cine pa kuti kwikowela!

¹⁸ Na lyo line ici icimonwa caibukisheko abaYuda ukuti balingile ukulasunga ukupepa kwa cine ukwasanguluka. Yehova te kuti asuminishe kabili takasuminishe ifyabipa ukuba mu cilonganino cakwe. Apo Lesa alituleta mu cilonganino cakwe icasanguluka umo atucingilila no kutusakamana, tufwile ukulacisunga icasanguluka. Bushe ifi tafilengele tulefwaisha ukulasunga icilonganino icasanguluka? Ububifi ubwa misango yonse tabulingile ukusangwa muli paradaise yesu iya ku mupashi.

19. Finshi twasambilila ku fimonwa ifyo Sekaria amwene?

¹⁹ Ifyaba mu cimonwa calenga 6 na 7 ifyo Sekaria amwene filasoka abantu abashaba na bufumacumi, kabili fitwibukishako ukuti Yehova tatekelesha abacita ifyabipa. Bakapepa ba kwa Yehova aba cishinka nabo balingile ukupata sana ifyabipa. Na kabili ifi fimonwa filanga ukuti Shifwe wa ku muulu alitutemwa. Nga ca kuti tulebombesha ukuba abantu abo Lesa engatemwa kabili abo engacingilila, tatwakabe ne citiipu icikalenga tukafwe. Lelo Yehova akatupaala. Ifyo tukapaalwa fikacila pa fyo tushomboka pa kuti tutwalilile ukuba abasanguluka muli cino calo cabipa. Kuti twacetekela ukutila kuti twatwalilila ukuba abasanguluka nga ca kuti Yehova atwafwa! Na lyo line, kuti twashininkisha shani ukuti ukupepa kwa cine kukatwalilila ukubako nangu ca kuti muli cino calo mwaba abantu abacita ifyabipa? Finshi fingalenga twashininkisha ukuti Yehova akacingilila icilonganino cakwe ilyo ubucushi bukalamba bulepalama? Aya amepusho yakasukwa mu cipande cikonkelepo.