IFYO BAIBOLO ILANDA: “Amapange ya wacincila yamulenga ukubomba bwino, lelo onse uususwa ukucita ifintu alola ku kubulwa.”—Amapinda 21:5.

UMWALOLA AYA AMASHIWI: Nga mulefwaya ukulabomfya bwino indalama, mufwile ukulatantikila libela ifyo muli no kushibomfya. Lyena mufwile ukukonka ifyo mwatantika. Ukucita ifi kwalicindama pantu te lyonse mwingakwata indalama sha kushitamo fyonse ifyo mwingatemwa ukushita.

IFYO MWINGACITA:

• Mulelemba ifyo mulefwaya ukubomfya indalama kabili mulekonka ifyo mwalemba. Mulelemba fyonse ifyo mulingile ukushita nelyo ifyo mulingile ukulipila. Lyena mufwile ukwakanya indalama mukapoosa kuli ifyo fintu. Nga mwasanga ukutila indalama mwapangile ukubomfya ku fintu ifyacindama shacepa, mufwile ukubuula indalama isho mwapangile ukubomfya ku fishacindama sana pa kuti mukumanishe ishibulilepo. Ku ca kumwenako, nga ca kuti indalama mwapangile ukushitamo amafuta ya motoka shacepa, mufwile ukubuula pa sho mwali no kubomfya ku fintu ifishacindama sana, pamo nga isho mwali no kwangalilamo.

• Mwilakongola na pashilingile. Muleesha na maka ukukanaba ne nkongole. Mulesunga indalama nga pali ifyo mulefwaya ukushita. Nga mulakongola, mufwile ukulalipila inkongole shonse cila mweshi pa kuti mwilalipila indalama ishingi. Na kabili nga mwalikwata inkongole, mufwile ukutantika ifyo mukalipila isho inkongole kabili mulekonka ifyo mwatantika.

  Abafwailisha pa fintu balanda ukuti abantu nga balebomfya kardi ya ku banki pa kushita ifintu, balabomfya indalama ishingi ukucila isho bengabomfya nga tabalebomfya kardi. Kanshi nga mulashita  ifintu ukubomfya kardi ya ku banki mufwile ukucenjela sana pa kuti tamuleonaula indalama.

IFYO BAIBOLO ILANDA: “Pa mulandu wa mpepo umunang’ani talima; inshita ya kulobolola akalapula, lelo takafisange.”—Amapinda 20:4.

UMWALOLA AYA AMASHIWI: Ubunang’ani kuti bwalenga umuntu aba umupiina. Kanshi mufwile ukulabombesha kabili mufwile ukulabomfya bwino indalama.

IFYO MWINGACITA:

• Mulebombesha. Mufwile ukulabombesha pa kuti abamwingisha incito bakamucetekele no ku mutemwa.

• Muleba aba cishinka. Tamufwile ukulaibila abamwingisha incito. Nga tamuli aba cishinka, abantu bakalakaana ukumwingisha incito.

• Mwilatemwisha indalama. Nga mwatemwisha indalama kuti mulecita ifingalenga mwalwala kabili kuti mwaleka ukumfwana bwino na bantu. Muleibukisha ukutila kwaliba ifintu ifingi ifyacindama ukucila indalama.

MWILAONAULA INSHITA NE NDALAMA KU FINTU IFYABIPA.

“Cakolwa no muliili bakaba abapiina, no kushipula kukalenga umuntu ukusapula.”—AMAPINDA 23:21.

MWILASAKAMIKWA SANA.

“Mwilasakamikilwa imyeo yenu ifyo mukalya nelyo ifyo mukanwa, nelyo ukusakamikwa pa mibili yenu ifyo mukafwala.”—MATEO 6:25.

MWILABA NO LUNKUMBWA.

“Umuntu wa menso ya lunkumbwa apamfiwa ku kukwata ifyuma, lelo teshiba ukuti ku ntanshi akabulwa.”—AMAPINDA 28:22.