IFINGATWAFWA NGA NATUSAKAMIKWA NELYO TULI NA MAFYA
Kuti Mwaikala mu Calo Umushakabe Amafya Nelyo Amasakamika
Nga tulekonka ifyo Baibolo ilanda kuti twacefyako amasakamika na mafya tukwata. Kwena te kuti tupwishe amasakamika na mafya yonse. Na lyo line, Kabumba wesu kuti ayapwisha. Alisala na Yesu Kristu ukwisapwisha amafya yonse ayo tukwata. Ilyo Yesu Kristu akalateka isonde lyonse, akacita ifintu ifisuma ukucila ifyo acitile ilyo ali pano calo. Ku ca kumwenako:
YESU AKONDAPA ABALWALA NGA FINTU ALECITA ILYO ALI PA CALO.
“Bamuleteele bonse abalelwala, abalecula ku malwele yalekanalekana . . . , kabili alibondepe.”—MATEO 4:24.
ILYO YESU AKALATEKA, ABANTU BONSE MU CALO BAKAKWATA AMAYANDA NE FYA KULYA.
Abo Yesu akalateka “bakakuula amayanda no kwikalamo; bakalima na mabala ya myangashi no kulya ifisabo fya yako. Tabakakuule amayanda e lyo bambi bakekalemo; tabakalime amabala e lyo bambi bakalye ifisabo.” —ESAYA 65:21, 22.
ILYO YESU AKALATEKA, MU CALO CONSE MUKABA UMUTENDE.
“Mu nshiku shakwe abalungama bakapuuka, Kabili umutende ukafula ukushinta na po umweshi ukalekela ukubapo. Kabili akakwata abatekwa ukufuma kuli bemba ukufika kuli bemba No kufuma ku Mumana ukufika ku mpela sha pano isonde. . . . Kabili abalwani bakwe bakamyanga ulukungu.”—AMALUMBO 72:7-9.
ILYO YESU AKALATEKA, MU CALO TAMWAKABE ULUFYENGO.
“Akomfwila ubulanda umulanda no mupiina, Kabili akapususha imyeo ya bapiina. Akalubula imyeo yabo ukufuma ku ba mutitikisha na ku ba bunkalwe.”—AMALUMBO 72:13, 14.
ILYO YESU AKALATEKA, TAKWAKABE UKUCULA NO KUFWA.
“Imfwa tayakabeko na kabili, takwakabe no kuloosha nangu ukuteta nangu ukukalipwa na kabili.”—UKUSOKOLOLA 21:4.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Finshi Ubufumu bwa kwa Lesa Bukacita?
Sambilileni ifyo ubuteko bwa kwa Lesa bukacita ilyo bukalateka aba pa calo.
