PA CISHI icinono icaba ku Indonesia ico beta ukuti Sangir Besar paliba bankashi yesu batatu. Mu myaka ya ku numa, balebombela pamo mu lulamba lwa bemba. Abantu abengi abekala pali ici cishi balishiba aba bankashi pa mulandu no mulimo babomba uwa kusambilisha abantu Baibo. Nomba umulimo balebomba mu lulamba lwa bemba tawali wa kusambilisha abantu Baibo.

Ica kubalilapo, baleingila mu menshi ku kufwaya amabwe ayakalamba e lyo bayasenda ku lulamba. Amabwe yamo yaleba ayakalamba kwati fye ni bola. Lyena baleikala pa tupuna no kutendeka ukutoba amabwe na sando pa kuti yacepe ukucila ne lini lya nkoko. Nga bapwisha ukutoba amabwe, baleyalonga mu mbeketi e lyo bayasenda uko baleikala. Pa numa, baleyalonga mu masaka pa kuti bakayalonge mu myotoka. Lyena abalepanga imisebo balebomfya aya mabwe.

Ishina lya kwa nkashi umo ni Hulda. Ba Hulda bena balekwata inshita iikalamba iya kubomba uyu mulimo wa kutoba amabwe ukucila bankashi bambi babili. Ilingi indalama balekwata baleshibomfya shonse ku kushitilamo ifyo ulupwa lwabo lwalekabila. Nomba pali iyi nshita, balefwaya ukulasungako indalama sha kushitamo cimo ico balefwaisha. Balefwaya ukushita tabuleti pa kuti balebomfya JW Library^®. Ba Hulda balishibe ukuti amavidio e lyo na fimbi ifyaba pa JW Library kuti fyalenga balabomba bwino umulimo wa kubila imbila nsuma, ukulaisambilisha Baibo, e lyo no kumfwikisha ifyo balesambilila.

Pa mweshi umo na hafu, lyonse ulucelo baleya mu kutoba amabwe pa ma-awala yabili. Baletoba amabwe aya kuti yaisula muli motoka. Balisukile bakwata indalama sha kushitamo tabuleti.

Ba Hulda batile: “Nangu ca kuti nalenaka sana kabili nalekwata ne filonda pa mulandu wa kutoba amabwe, nalilabileko kuli fyonse ifi ilyo nakwete tabuleti. Tabuleti yalilengele nalabomba bwino umulimo wa kubila imbila nsuma e lyo no kupekanya ukulongana.” Balandile no kuti tabuleti yalibafwile sana ilyo kwali icikuko pantu ukulongana konse kwalebela pa Intaneti. Tulesekelela pamo na ba Hulda pantu balicitile ifyo bapangile.