1-2. Twaishiba shani ukuti Yesu alicindika sana ishina lya kwa Yehova?

 YESU alicindika sana ishina lya kwa Yehova. Takwaba nangu umo uwalenga ishina lya kwa Wishi lyaishibikwa ukucila pa fyo Yesu alenga lyaishibikwa. Mu cipande cafumineko, twalisambilile ukuti Yesu ali-itemenwe ukufwa pa kuti alange ukutila ishina lya kwa Yehova lya mushilo no kuti fyonse ifyo acita fyalilungama. (Marko 14:36; Heb. 10:​7-9) Twalisambilile no kuti ilyo Yesu akateka pa myaka 1,000 akaitemenwa ukubwesesha Wishi Ubufumu pantu alafwaya ishina lya kwa Wishi lyaba ilya mushilo. (1 Kor. 15:​26-28) Na kabili, ifyo Yesu atemwa ishina lya kwa Wishi, filanga fye ifyo batemwana. Fyonse ifyo Yesu acitiile Yehova fyalangile ukuti alimutemwa sana.

² Yesu aishiile pano isonde mwi shina lya kwa Wishi. (Yoh. 5:43; 12:13) Alilengele abasambi bakwe baishiba ishina lya kwa Wishi. (Yoh. 17:​6, 26) Alesambilishisha mwi shina lya kwa Yehova, kabili e mo alecitila ne fipesha mano. (Yoh. 10:25) Na kuba, Yesu alombele Yehova ukuti alecingilila abasambi bakwe ‘pa mulandu we shina lyakwe.’ (Yoh. 17:11) Nga ca kuti ifi e fyo Yesu alemona ishina lya kwa Yehova, bushe umuntu kuti alanda shani ukuti musambi wa cine uwa kwa Kristu nga ca kuti taishiba ishina lya kuti Yehova kabili talibomfya no kulibomfya?

3. Finshi twalasambililapo muli cino cipande?

³ Apo tuli Bena Kristu, tufwaya ukulapashanya sana Yesu uwalangile ukuti alitemwa ishina lya kwa Yehova no kuti alilicindika. (1 Pet. 2:21) Muli cino cipande, twalamona ico Yehova apeelela abantu ababila “imbila nsuma ya Bufumu” ishina lyakwe. (Mat. 24:14) Na kabili, twalasambilila ico cila muntu alingile ukulamwena  ukutila ishina lya kwa Yehova lyalicindama.

“ABANTU ABAKWITILWA KWI SHINA LYAKWE”

4. (a) Mulimo nshi Yesu apeele abasambi bakwe ilyo ashilabwelelamo ku muulu? (b) Cipusho nshi twingepusha pa mulandu no yu mulimo abapeele?

⁴ Ilyo Yesu ali mu kubwelelamo ku muulu, aebele abasambi bakwe ati: “Mukapokelela amaka kabili mukaba inte shandi mu Yerusalemu, mu Yudea monse na mu Samaria, na ku mpela ya pano isonde.” (Imil. 1:8) Kanshi abasambi ba kwa Yesu bali no kubila imbila nsuma na mu ncende shimbi, te mu Israele mweka. Na mu kupita kwa nshita, abantu aba mu nko shonse bali no kukwata ishuko lya kuba abasambi ba kwa Yesu. (Mat. 28:​19, 20) Lelo Yesu atile: “Mukaba inte shandi.” Bushe abali no kuba abasambi bakwe balingile ukwishiba ishina lya kwa Yehova, nelyo balingile fye ukuba inte sha kwa Yesu? Ifyo tubelenga mwi buuku lya Imilimo icipandwa 15 kuti fyalenga twa-asuka ici cipusho.

5. Bushe abatumwa na bakalamba mu Yerusalemu balangile shani ukuti abantu bonse balingile ukwishiba ishina lya kwa Yehova? (Moneni ne cikope.)

⁵ Mu mwaka wa 49 ninshi Yesu alibwelelamo ku muulu, abatumwa na bakalamba mu Yerusalemu balilongene pa kuti balanshanye pa fyo Abena Fyalo abashali abasembululwa balingile ukucita pa kuti bengaba Abena Kristu. Ilyo balesondwelela ifyo balanshenye, Yakobo munyina wa kwa Yesu alandile ati: “[Petro] nalondolola bwino bwino ifyo pa muku wa kubalilapo Lesa apilibukiile ku bena fyalo pa kuti abulemo abantu abakwitilwa kwi shina lyakwe.” Lishina lya kwa nani Yakobo alelandapo? Ilyo ayambwile ifyo kasesema Amose alandile, atile: “Pa kuti abantu abashalapo, pamo na bena fyalo bonse, e kutila abantu abetilwa kwi shina lyandi, bakafwaye Yehova, e fyo Yehova alanda.” (Imil. 15:​14-18) Twamona ukuti abali no kuba abasambi ba kwa Yesu bali no kusambilila pali Yehova, kabili bali no ‘kulaitilwa kwi shina lyakwe.’ Ici calolele mu kuti bali no kulalenga abantu baishiba ishina lya kwa Lesa, kabili abantu bali no kubeshiba ukuti bemininako ishina lya kwa Lesa.

6-7. (a) Cinshi Yesu aishiile pano isonde? (b) Mulandu nshi umbi uukalamba uo Yesu aishiile pano isonde?

⁶ Ishina lya kuti Yesu lyalola mu kuti “Yehova E Pusukilo,” kabili Yesu alilangile ukuti muli ena e mo Yehova akapusushisha bonse abakwata icitetekelo. Yesu aishile pano isonde pa kuti afwile abantu. (Mat. 20:28) Ilyo aituulile  icilubula, alengele abantu bakwata ishuko lya kuti Yehova alebabelela uluse pa membu shabo, kabili alengele bakwata isubilo lya kwisaikala umuyayaya.—Yoh. 3:16.

⁷ Cinshi calengele abantu bakabile icilubula? Mulandu ne cacitike mwi bala lya Edeni. Cinshi cacitike? Nga fintu twasambilile mu cipande cafumineko, abafyashi besu aba kubalilapo, e kutila Adamu na Efa balipondokele Yehova. Ifi bacitile fyalengele bapanye ishuko lya kwikala umuyayaya. (Ukute. 3:​6, 24) Nomba kwali icintu na cimbi icacindeme sana ukucila na pe pusukilo lya bali no kutuntuka muli Adamu na Efa. Cintu nshi ico cine? Satana alibepeshe Yehova ubufi ubukalamba. (Ukute. 3:​4, 5) Kanshi ipusukilo lya bali no kutuntuka muli Adamu na Efa lyalikumine icintu icikalamba, e kutila ukulenga ishina lya kwa Yehova lyaba ilya mushilo. Apo Yesu alelandilako Yehova kabili aleimininako ishina lyakwe, e walingile sana ukulenga ishina lya kwa Yehova lyaba ilya mushilo.

8. Finshi bonse abali no kuba abasambi ba kwa Yesu balingile ukwishiba?

⁸ Bonse abali no kuba abasambi ba kwa Yesu, nampo nga baYuda nelyo Bena Fyalo, balingile ukwishiba uwali no kubapususha, e kutila Yehova Lesa, Wishi wa kwa Yesu. (Yoh. 17:3) Nga filya fine cali kuli Yesu, nabo bene bali no kulaitilwa kwi shina lya kwa Yehova. Na kabili balingile ukwishiba ubucindami bwaba mu kulenga ili ishina lyaba ilya mushilo. Balingile ukulacita ifi pa kuti bengapusuka. (Imil. 2:​21, 22) Kanshi abasambi ba kwa Yesu bonse aba cishinka, balingile ukusambilila pali Yehova na pali Yesu wine. E mulandu wine ilyo Yesu alesondwelela ipepo ilyalembwa muli Yohane icipandwa 17 alandiile amashiwi ya kuti: “Nalilenga baishiba ishina lyenu kabili nkatwalilila ukulenga abantu bakalishibe, pa kuti bengaba no kutemwa uko mwantemenweko, na ine ningaba muli bena.”—Yoh. 17:26.

“MULI NTE SHANDI”

9. Kuti twalanga shani ukuti twalicindika sana ishina lya kwa Yehova?

⁹ Bonse abasambi ba kwa Yesu aba cine bafwile ukulalenga ishina lya kwa Yehova lyaba ilya mushilo. (Mat. 6:​9, 10) Bafwile ukulamona ukuti ishina lya kwa Yehova e lyacindamisha pa mashina yonse. Nomba ici cilepilibula ukuti kuli ifyo bafwile ukulacita. Finshi ifyo fine bafwile ukulacita pa kulenga ishina lya kwa Yehova lyaba ilya mushilo, na pa kuti balelanga ukuti ifyo Satana alandile pali Yehova fya bufi?

10. Cilye nshi ica mampalanya ico Baibo ilandapo mwi buuku lya kwa Esaya icipandwa 42 ukufika ku cipandwa 44? (Esaya 43:9; 44:​7-9) (Moneni ne cikope.)

¹⁰ Ifyalembwa mwi buuku lya kwa Esaya icipandwa 42 ukufika ku cipandwa 44, filanga ifyo tufwile ukulacita pa kulenga ishina lya kwa Yehova lyaba ilya mushilo. Ifyaba muli ifi fipandwa filanda pa cilye ca mampalanya ica ku muulu, umo Yehova eba abantu abashimupepa ukuti balange ukuti tulesa uto bapepa ni tulesa twa cine cine. Aleta ne nte ukuti shilange ukuti ca cine utu tulesa twa cine cine. Lelo takwaba inte nangu imo iilanga ukuti ni tulesa twa cine cine.—Belengeni Esaya 43:9; 44:​7-9.

11. Mashiwi nshi Yehova alanda pa bantu bakwe, ayaba pali Esaya 43:​10-12?

¹¹ Belengeni Esaya 43:​10-12. Yehova alanda pa bantu bakwe ati: “Muli nte shandi, . . . kabili nine Lesa.” Yehova afwaya ba-asuka icipusho ca kuti: “Bushe kwaliba Lesa umbi uwacila pali ine?” (Esa. 44:8) Ifwe twalikwata ishuko lya kwasuka ici cipusho. Tulanga ukuti Yehova e  Lesa wa cine ukupitila mu fyo tulanda na mu fyo tucita. Ishina lyakwe lyalicila amashina yonse. Kabili mu fyo tucita cila bushiku, tulanga ukuti twalitemwa sana Yehova kabili tuli ba cishinka kuli ena nangu Satana engatwesha shani. Nga tulecita ifi, ninshi tulelenga ishina lyakwe lileba ilya mushilo.

12. Bushe ubusesemo bwaba pali Esaya 40:​3, 5 bwafikilishiwe shani?

¹² Nga tuletungilila ishina lya kwa Yehova ninshi tulepashanya Yesu Kristu. Esaya na kabili asobele ukuti kwali no kuba uwali no ‘kuwamya [nelyo, ‘ukupekanya,’ ftn.] inshila ya kwa Yehova.’ (Esa. 40:3) Bushe ifyo aseseme fyafikilishiwe shani? Yohane Kabatisha alipekanishishe Yesu inshila. Yesu aishiile mwi shina lya kwa Yehova kabili alelandila mwi shina lya kwa Yehova. (Mat. 3:3; Marko 1:​2-4; Luka 3:​3-6) Ubusesemo bumo bwine bwatile: “Ubukata bwa kwa Yehova bukasokololwa.” (Esa. 40:5) Inga ubu busesemo nabo bwafikilishiwe shani? Ilyo Yesu aishile pano isonde, aleimininako bwino sana  Yehova ica kuti cali fye kwati Yehova umwine e waishile pano isonde.—Yoh. 12:45.

13. Kuti twapashanya shani Yesu?

¹³ Na ifwe bene tuli nte sha kwa Yehova nga filya fine Yesu ali. Twitilwa kwi shina lya kwa Yehova kabili tulebako bonse abo twamonana nabo pa fisuma ifyo aacita. Nomba pa kuti tube Inte sha kwa Yehova ishisuma, tulingile no kuleka abantu baishiba fyonse ifyo Yesu acitile pa kulenga ishina lya kwa Yehova lyaba ilya mushilo. (Imil. 1:8) Yesu e Nte ya kwa Yehova iyacila pa Nte shonse kabili tulingile ukulamupashanya. (Ukus. 1:5) Nomba bushe finshi fimbi ifyo bonse tufwile ukulacita pa kulanga ukuti tumona ukuti ishina lya kwa Yehova lyalicindama?

FIMBI IFYO TWINGACITA PA KULANGA UKUTI ISHINA LYA KWA YEHOVA LYALICINDAMA

14. Ukulingana ne fyaba pa Amalumbo 105:​3, bushe tumfwa shani pe shina lya kwa Yehova?

¹⁴ Twalitemwa sana ishina lya kwa Yehova. (Belengeni Amalumbo 105:3.) Yehova alatemwa sana nga ca kuti tuleitakishisha pe shina lyakwe. (Yer. 9:​23, 24; 1 Kor. 1:31; 2 Kor. 10:17) Amashiwi ya kuti ‘ukuitakishisha muli Yehova’ yapilibula ukuti ukuba ne cilumba pa mulandu wa kuti Yehova e Lesa wesu. Tumona ukuti Yehova alitupeela ishuko ilikalamba kabili alitucindamika ifi atusuminisha ukulatungilila ishina lyakwe. Tatufwile ukulaumfwa insoni sha kweba abo tubomba nabo, abo tusambilila nabo ku sukulu, abena mupalamano, na bantu bambi ukuti tuli Nte sha kwa Yehova. Satana afwaya twaleka ukweba abantu pe shina lya kwa Yehova. (Yer. 11:21; Ukus. 12:17) Na kuba, Satana na bakasesema bakwe aba bufi bafwaya abantu balaba ishina lya kwa Yehova. (Yer. 23:​26, 27) Lelo apo twalitemwa Yehova, tulasekelela mwi shina lyakwe “akasuba konse.”—Amalu. 5:11; 89:16.

15. Calola mwi ukulilila kwi shina lya kwa Yehova?

¹⁵ Tulatwalilila ukulilila kwi shina lya kwa Yehova. (Yoele 2:32; Rom. 10:​13, 14) Ukulilila kwi shina lya kwa Yehova te kupelela fye pa kwishiba ishina lya kwa Lesa no kulalibomfya. Lelo tufwile no kushininkisha ukuti Lesa e ko aba, tufwile ukumucetekela, kabili tufwile ukulamulomba ukuti aletwafwa no kututungulula. (Amalu. 20:7; 99:6; 116:4; 145:18) Na kabili ukulilila kwi shina lya kwa Yehova cipilibula ukuti tulingile ukulaebako abantu pe shina lyakwe, na pa mibele yakwe iisuma. Kabili tulingile ukulabakoselesha ukuti bafwile ukwaluka pa kuti balecita ifyo Yehova atemwa na pa kuti akabapusushe.—Esa. 12:4; Imil. 2:​21, 38.

16. Kuti twalanga shani ukuti Satana wa bufi?

¹⁶ Tulaitemenwa ukucula pa mulandu we shina lya kwa Yehova. (Yako. 5:​10, 11) Nga twatwalilila aba cishinka kuli Yehova ilyo tulecula, tulanga ukuti Satana wa bufi. Mu nshiku sha kwa Yobo, Satana abepeshe abantu ababombela Yehova ati: “Umuntu kuti apeela conse ico akwata pa kuti acingilile umweo wakwe.” (Yobo 2:4) Satana atile, abantu kuti babombela fye Yehova nga ca kuti ifintu fili bwino. Lelo nga bakwata amafya, kuti baleka ukumubombela. Yobo uwali ne cishinka alangile ukuti ifi Satana alandile fya bufi. Na ifwe bene twalikwata ishuko lya kulanga ukuti tatwakaleke ukubombela Yehova nangu Satana engatuletela amafya ya musango shani. Kuti twacetekela ukuti Yehova akatwalilila ukutucingilila pa mulandu we shina lyakwe.—Yoh. 17:11.

17. Ukulingana na mashiwi yaba pali 1 Petro 2:​12, ni nshila nshi na imbi iyo twingalengelamo abantu bacindika ishina lya kwa Yehova?

¹⁷ Tulalanga ukuti twalicindika ishina lya kwa Yehova. (Amapi. 30:9; Yer. 7:​8-11) Apo twitwa ukuti Inte sha kwa Yehova, ifyo tucita kuti fyalenga abantu bacindika ishina lya kwa  Yehova nelyo bakaana ukulicindika. (Belengeni 1 Petro 2:12.) E ico tufwile ukulalanga ukuti tulacindika ishina lya kwa Yehova muli fyonse ifyo tulanda na mu fyo tucita. Nga tulecita ifi, nangu ca kuti tatwapwililika, tukalalenga abantu balecindika ishina lya kwa Yehova.

18. Ni nshila nshi na imbi iyo twingalangilamo ukuti twalicindika sana ishina lya kwa Yehova? (Moneni na futunoti.)

¹⁸ Tumona ukuti ishina lya kwa Yehova lyalicindama sana ukucila ifyo abantu batumona. (Amalu. 138:2) Mulandu nshi ici cacindamina sana? Pantu nga tulecita ifingalenga Yehova asekelela, ilingi line abantu tabafitemwa kabili kuti balalanda ne fyabipa pali ifwe. a Yesu ali-ipeeleshe ukufwa imfwa ya museebanya kwati cipondo pa kuti fye alenge ishina lya kwa Yehova libe ilya mushilo. Yesu “tasakamene ukuseebana” pantu tabikile amano ku fyo abantu bali no kutontonkanya pali ena. (Heb. 12:​2-4) Ico abikileko amano kucita ifyo Lesa afwaya.—Mat. 26:39.

19. Mumfwa shani pe shina lya kwa Yehova, kabili mulandu nshi mumfwila ifyo?

¹⁹ Twalitemwa sana ishina lya kwa Yehova kabili tumona ukuti Yehova alitucindamika sana ifi atusuminisha ukulaitwa ukuti Inte sha kwa Yehova. Pa mulandu wa kuti twalitemwa ishina lya kwa Yehova, tukatwalilila ukumulumbanya nangu abantu balande ifyabipa pali ifwe. Ishina lya kwa Yehova lyalicindama sana ukucila ne fyo abantu batumona. E ico natutwalilile ukulalumbanya ishina lya kwa Yehova nangu Satana engesha shani ukutulesha. Nga tulecita ifi, tukalanga ukuti twalicindika sana ishina lya kwa Yehova nga filya fine Yesu Kristu alicindike.