MU Baibolo mwalilembwa amashiwi ayalanga ifyo abantu abali fye “nga ifwe bene” baleumfwa. (Yako. 5:17) Ku ca kumwenako, te kuti citwafye ukwishiba umo Paulo aloseshe ilyo alandile amashiwi yaba pa Abena Roma 7:21-24 apatila: “Lyonse ilyo mfwaya ukucita icalungama, nsanga ndecita icabipa. . . . Yangu ne mulanda wine wine!” Ifi Paulo alandile pa fyo aleumfwa filatukoselesha ilyo tulelwisha ukuleka ukucita ifyabipa.

Na kabili Paulo alilandile na fimbi ifyo aleumfwa. Alandile pa fyo ashininkishe ati: ‘Umwana wa kwa Lesa, alintemenwe no kuipeela pa mulandu wa ine’! (Gal. 2:20) Bushe ifi e fyo na imwe mumfwa? Nalimo te lyonse mumfwa ifi.

Nga ca kuti tumfwa ukuti tatwacindama pa mulandu ne fyabipa ifyo twacitile kale, nalimo inshita shimo kuti twalamona ukuti Yehova tatutemwa kabili tatweleela. Ifi nga e fyo tumona, kuti catukosela ukusumina ukuti Yesu alitufwilile. Bushe cine cine Yesu afwaya tulemona icilubula ukuti bupe? Nga e fyo afwaya, ninshi finshi tulingile ukucita pa kuti tulemona icilubula ukuti bupe? Natwasuke aya mepusho yabili.

Yesu afwaya mulemona ukuti ilambo bupe ubo amupeela. Finshi fingalenga mwashininkisha ukuti e fyo afwaya? Tontonkanyeni pa lyashi lyalembwa muli Luka 23:39-43. Umwaume nabamupoopela pa cimuti mupepi na Yesu. Asumina ukuti alicitile umulandu. Umulandu acitile ufwile wali ukalamba pantu abo bapoopela pa cimuti bantu bapanga imilandu iikalamba. Uyu mwaume nasakamana sana, e ico apapaata Yesu ati: “Mukanjibukishe ilyo mukaba imfumu.”

Bushe Yesu amwaswike shani? Elenganyeni ubukali ubo Yesu aumfwile ilyo apilibwike pa kuti aloleshe ncitatubi. Nangu ca kuti alishikitike, alimwentwilile uyu ncitatubi e lyo amweba ati: “Cine cine ndekweba lelo nati, uli no kuba na ine mu Paradaise.” Yesu afwaya nga aebele fye uyu mwaume ukuti “Umwana wa muntu . . . aishile mu . . . kupeela umweo wakwe icilubula pa kuti alubule abengi.” (Mat. 20:28) Lelo bushe namumona ifyo Yesu amwebele ukuti e fyo icilubula cali no kumwafwa? Yesu ali ne cikuuku kuli ena kabili alandile ishiwi lya kuti “uli” ne lya kuti “ine.” Kabili aebele umwaume ati ali no kuba mu paradaise pano isonde.

Ukwabula no kutwishika Yesu alefwaya ulya mwaume eshibe ukuti ilambo lyakwe ilyo ali no kupeela lyali no kuba bupe kuli ena. Nga ca kuti ifi e fyo Yesu alefwaya ulya ncitatubi uushakwete ne nshita ya kuti abombele Lesa eshibe, ninshi ifi fine e fyo afwaya no Mwina Kristu uwabatishiwa uwa kuti alabombela Lesa aishiba. Finshi fingalenga twasumina ukuti ilambo Kristu apeele likatulubula ku membu isho twacitile kale?

Apo Yesu e wapeele Paulo umulimo wa kubila imbila nsuma, Paulo alisumine ukuti Yesu alimufwilile.  Cinshi twalandila ifi? Paulo alandile ati: “Ndetootela Kristu Yesu Shikulwifwe, uwankoseshe, pantu amwene ukuti nali uwa cishinka pa kumpeela uyu mulimo, nangu ca kutila kale nali uwa miponto kabili uwalecusha abantu bakwe kabili uwa musaalula.” (1 Tim. 1:12-14) Umulimo Yesu apeele Paulo walengele ashininkishe ukuti Yesu alimubelele uluse, alimutemenwe no kuti alimucetekele. Na ifwe umo umo Yesu alitupeela umulimo wa kubila imbila nsuma. (Mat. 28:19, 20) Bushe uyu mulimo kuti walenga na ifwe twashininkisha ukuti Yesu alitufwilile?

Tapalakokola sana ukutula apo ba Albert babwelele mu cilonganino ca kwa Yehova pa numa ya kuba ku nse ya cilonganino pa myaka nalimo 34 pantu balitamfiwe. Batile: “Nshalaba ifibi ifyo nacitile kale. Lelo nga ndebila imbila nsuma, ng’umfwa ukuti Yesu alimpeela umulimo nga filya fine umutumwa Paulo aleumfwa. Uyu mulimo ulenga ndeba ne nsansa, ndeimona ukuti nalicindama, kabili ndesubila no kuti ifintu fikawama ku ntanshi.”—Amalu. 51:3.

Ba Allan abali bantalamisoka kabili abali aba lubuli ilyo bashilasambilila icine, balandile abati: “Ncili ndatontonkanya pa fibi fyonse ifyo nacitile ku bantu. Inshita shimo ndaba no bulanda sana. Lelo ndatasha Yehova pantu alimpeela umulimo wa kubila imbila nsuma ku bantu nangu ca kuti ndi mubembu. Nga namona abantu balesumina ukukutika imbila nsuma, ndebukisha ukuti Yehova musuma kabili aliba no kutemwa. Mona ukuti alamomfya ku kwafwa abantu aba kuti nabo balomfwa ubulanda pa fyo bacitile kale.”

Ilyo tulebila imbila nsuma tulacita ifintu ifisuma kabili tutontonkanya pa fisuma. Uyu mulimo ulenga twashininkisha ukuti Yesu wa luse, alitutemwa, kabili alitucetekela.

Imitima yesu ikaleka fye ukutuseka pa fibi ifyo twacitile kale ilyo cino calo ca kwa Satana cikonaulwa. Finshi twingacita pa kuti twilaikalila fye ukumfwa ububi pa fibi ifyo twacitile kale?

Ba Jean ilyo bali abakashana balecita ifisuma nga bali pa mwabo na pa Ng’anda ya Bufumu, lelo balecita ifibi nga bali kumbi. Nomba balomfwa ububi pali ifi balecita, kabili batile: “Nalitemwa ifi ‘Lesa acila imitima yesu.’” (1 Yoh. 3:19, 20) Na ifwe kuti twasansamuka nga twaishiba ukuti Yehova na Yesu balishiba bwino sana ukuti tuli babembu. Muleibukisha ukuti abo bapeela icilubula te bantu abapwililika, lelo babembu abalapila.—1 Tim. 1:15.

Nga tuletontonkanya sana pa fyo Yesu alemona abantu abashapwililika kabili nga tulebombesha umulimo wa kubila imbila nsuma uo atupeela, tukashininkisha ukuti icilubula cilatwafwa umo umo. Kabili tukalalanda nga filya Paulo alandile ati: Yesu ‘alintemenwe no kuipeela pa mulandu wa ine.’