1-2. Cinshi Yehova abikako sana amano, kabili cinshi afwaya ukuti tulecita?

 YEHOVA alibika sana amano ku fyo tucitila abantu banensu. Yesu asambilishe ukuti tulingile ukulatemwa abantu banensu nge fyo twaitemwa fwe bene. (Mat. 22:​37-39) Ici calola mu kuti tulingile ukutemwa abantu bonse ukubikako fye na bo tushipepa nabo. Nga tulecita ifi, ninshi tulepashanya Yehova Lesa uulenga, “akasuba kalebalikila ababifi na basuma kabili alenga imfula ilelokela pa balungama na pa bashalungama.”—Mat. 5:45.

² Nangu ca kuti Yehova alitemwa abantu bonse, abo atemwa sana bantu abacita ifyalungama. (Yoh. 14:21) Afwaya ukuti tulemupashanya. Atukoselesha ukuti tulingile ‘ukutemwa nga nshi’ bamunyinefwe na bankashi. (1 Pet. 4:8; Rom. 12:10) Uku kwine e kutemwa uko tulanga kuli lupwa wesu nelyo cibusa wesu uo twatemwa sana.

3. Finshi tulingile ukwibukisha pa fyo ukutemwa kwaba?

³ Iluba, lilakabila ukulisakamana pa kuti likule bwino. Ifi fine e fyo no kutemwa kwaba. Umutumwa Paulo asambilishe Abena Kristu ukuti: “Mutwalilile ukutemwana apo muli ba bwananyina.” (Heb. 13:1) Yehova afwaya ukuti twatwalilila ukutemwa abantu. Muli cino cipande, twalasambilila pa fyo twingacita pa kuti tutemwane na ba bwananyina no mulandu tulingile ukutwalilila fye ukutemwa aba bwananyina.

 UMULANDU TULINGILE UKUTEMWANINA NA BA BWANANYINA

4. Ukulingana ne fyaba pa Amalumbo 133:​1, kuti twatwalilila shani ukutemwa aba bwananyina? (Moneni ne fikope.)

⁴ Belengeni Amalumbo 133:1. Twalisumina amashiwi ya walembele Amalumbo, uwalembele ati “cilawama nga nshi” ukuba pamo na batemwa Yehova. Lelo nga filya fine umuntu ashingabikako amano ku cimuti icisuma ico amona cila bushiku, e fyo na ifwe tushingabikako amano ku busuma ubwaba mu kuba abaikatana na Bena Kristu banensu. Ilingi line tulamonana na bamunyinefwe na bankashi, nalimo tulamonana nabo imiku iingi mu mulungu. Kuti twatwalilila shani ukulanga ukuti twalibatemwa? Kuti twatwalilila ukutemwa bamunyinefwe na bankashi nga ca kuti tulekwatako inshita ya kutontonkanya pa fyo cila muntu acindama mu cilonganino.

5. Finshi abantu bamo bengacita nga bamona ifyo fwe bantu ba kwa Yehova twatemwana?

⁵ Bamo aba kuti e muku wa kubalilapo basangwako mu kulongana, balatemwa sana nga bamona ifyo twaba abatemwana. Nga bamona ifyo twatemwana, kuti bashininkisha ukuti nabasanga icine. Yesu alandile ukuti: “Nga muletemwana, e lyo bonse bakeshiba ukuti muli basambi bandi.” (Yoh. 13:35) Natulande pa lyashi lya ba Chaithra, abo Inte sha kwa Yehova balesambilisha Baibo ilyo bali pa universiti. Ilyo babetile ukuya mu kulongana kwa citungu, balisumine. Ilyo balongene ubushiku bwa kubalilapo, baebele abalebasambilisha Baibo ukuti: “Abafyashi bandi tabatala  abankumbatilapo. Lelo pali uku ukulongana, abantu 52 e bankumbatile mu bushiku fye bumo! Ifyo abantu ba kwa Yehova bacitile fyalengele naumfwa ukuti alintemwa. Ndefwaisha ukuba muli ulu lupwa.” Ba Chaithra balitwalilile ukulunduluka kabili balibatishiwe mu 2024. Ilingi line abantu nga bamona imibele yesu iisuma ne fyo twatemwana, balafwaisha ukulabombela Yehova.—Mat. 5:16.

6. Bushe nga twaba ifibusa na bamunyinefwe na bankashi kuti twacingililwa shani?

⁶ Nga natutemwana na ba bwananyina, kuti twacingililwa. Paulo akonkomeshe Abena Kristu banankwe ukuti: “Mulekoseleshanya cila bushiku . . . pa kuti umuntu nangu umo pali imwe ekosa umutima pa mulandu wa kubelelekwa kwa lubembu.” (Heb. 3:13) Nga ca kuti ciletukosela ukucita icalungama, Yehova kuti alenga uwa bwananyina aishiba kabili kuti atwafwa. (Amalu. 73:​2, 17, 23) Kuti cawama sana uwa bwananyina nga atwafwa.

7. Bushe ukutemwana kwa-ampana shani no kwikatana? (Abena Kolose 3:​13, 14)

⁷ Twaba pe bumba lya bantu abaibikilishako pa kuti balelanga ukuti balitemwana. Ne ci cilenga Lesa aletupaala nga nshi. (1 Yoh. 4:11) Ku ca kumwenako, nga tuli no kutemwa ‘tulatwalilila ukushipikishanya,’ ne ci cilenga twatwalilila ukuba abaikatana. (Belengeni Abena Kolose 3:​13, 14; Efes. 4:​2-6) Kanshi nga tulelongana, tulaba pamo na ba bwananyina abo twatemwana nabo sana. Kabili pano pe sonde tapaba abatemwana nge fi twatemwana.

MULECINDIKANA

8. Finshi Yehova acita pa kuti tube abaikatana na ba bwananyina?

⁸ Yehova e walenga ukuti tube abaikatana mwi sonde lyonse, nangu ca kuti tatwapwililika. (1 Kor. 12:25) Baibo itila ‘Lesa alatusambilisha ukutemwana.’ (1 Tes. 4:9) Mu nshila imbi kuti twatila Yehova alatusambilisha ifyo twingacita pa kuti tube ifibusa na ba bwananyina. Ukupitila mu Cebo cakwe Baibo, Lesa alatusambilisha nga ca kuti tulebika amano ku fyo tusambilila mu Cebo cakwe kabili nga tulekonka ifyo citusambilisha. (Heb. 4:12; Yako. 1:25) Kabili ifi fine e fyo fwe Nte sha kwa Yehova twesha na maka ukulacita.

9. Finshi Baibo itusambilisha pa Abena Roma 12:​9-13 pa kucindika aba bwananyina?

⁹ Bushe Icebo ca kwa Lesa citusambilisha shani pa fya kuba ifibusa na ba bwananyina? Tontonkanyeni pa fyo Paulo alandile pali ili lyashi nga fintu calembwa pa Abena Roma 12:​9-13. (Belengeni.) Moneni ukutila alembele ati, “pa kucindikana nimwe mulebalilapo.” Bushe aya mashiwi yalola mwi? Yalola mu kuti tulingile ukutendekelapo ukutemwa aba bwananyina ukupitila mu kubabelela uluse, ukubapokelela, ukuba bakapekape, nelyo ukubacitilako ifintu fimbi. (Efes. 4:32) Tatufwile ukulolela aba bwananyina ukuti ebo babalilepo ukuba ifibusa na ifwe. Lelo mufwile ukubalilapo ukucita ifi. Yesu atile: “Mwaliba insansa ishingi mu kupeela ukucila mu kupokelela.”—Imil. 20:35.

10. Finshi twingacita pa kuti ‘tulecindikana’? (Moneni ne cikope.)

¹⁰ Pa numa ya kutweba ukuti tulebalilapo ukucindika aba bwananyina, Paulo atukoseleshe ukuti “mulebombesha, mwilaba abanang’ani.” Umuntu uubombesha, alaba uwacincila. Nga bamupeela umulimo, alabombesha. Baibo pa Amapinda 3:​27, 28 itukoselesha ukuti: “Witana abalekabila ifisuma nga naukwata amaka ya kubafwilisha.” Nga  ca kuti twamona umo uulekabila ubwafwilisho, tatwikata na ku cani, tulamwafwilisha. Tatushingashinga ukwafwilisha umuntu nelyo ukutontonkanya ukuti umuntu umbi e ukamwafwa.—1 Yoh. 3:​17, 18.

11. Finshi tufwile ukucita pa kuti tutemwane na ba bwananyina?

¹¹ Inshila imbi iyo twingalangilamo ukuti twalicindika aba bwananyina, kwangufyanya ukubabelela uluse nga batulufyanya. Baibo pa Abena Efese 4:26 itila: “Mwileka akasuba kawe mucili fye abakalipa.” Cinshi Baibo yalandila ifi? Pa cikomo 27 Baibo itila, “mwilapeela Satana Kaseebanya apa kwikala.” Libili libili, Yehova alatweba mu Cebo cakwe ukuti tulingile ukulabelelana uluse. Baibo pa Abena Kolose 3:13 itukonkomesha ukuti ‘tulebelelana uluse.’ Nga tulebelelana uluse tulatemwana sana na ba bwananyina. Nga twacita ifi, ‘tulaba abaikatana nga fintu umupashi ulenga twaba abaikatana mu mutende.’ (Efes. 4:3) Kuti twatila fye, nga tulebelela aba bwananyina uluse, tulaba abaikatana kabili aba mutende.

12. Bushe Yehova atwafwa shani pa kuti tule-elela abantu?

¹² Kwena, kuti catukosela ukwelela umuntu uutulufyenye. Lelo umupashi wa kwa Lesa nga watwafwa, kuti twamubelela uluse. Amalembo yatukoselesha ukuti ‘tuletemwana nga nshi’ no kuti ‘tulebombesha.’ Lyena yatweba ukuti: “Muleleka umupashi ulelenga muleba abacincila.” Ici calola mu kuti umupashi wa kwa Lesa kuti walenga twaba abacincila kabili twalabombesha. Umupashi wa kwa Lesa kuti walenga twatemwana nga nshi na ba bwananyina kabili kuti walenga twalaitemenwa ukubelelana uluse. E co tulombela Yehova ukuti aletwafwa.—Luka 11:13.

“PELABA AMALEKANO PALI IMWE”

13. Finshi fingalenga mu cilonganino mwaba amalekano?

¹³ Mu cilonganino ca kwa Yehova mwaba “abantu ba misango yonse” abafuma mu nkulilo ishalekanalekana. (1 Tim. 2:​3, 4)  Pa mulandu wa kuti cila muntu alikwata ifya kufwala ifyo atemwa, ifyo afwaya ukuiyemfya, ne myundapilwe engafwaya e lyo ne fya kuleseshamo icitendwe, nga tatucenjele ifi fintu kuti fyalenga mu cilonganino mwaba amalekano. (Rom. 14:4; 1 Kor. 1:10) Pa mulandu wa kuti ‘Lesa alatusambilisha ukutemwana,’ tatulingile twalenga aba bwananyina balamona kwati ifyo twasalapo ukucita fisuma ukucila ifyo basalapo ukucita.—Fil. 2:3.

14. Finshi tulingile ukulaesha na maka yonse ukulacita, kabili mulandu nshi?

¹⁴ Nga ca kuti tulekoselesha aba bwananyina lyonse, mu cilonganino te kuti muleba amalekano. (1 Tes. 5:11) Muno nshiku, aba bwananyina abengi abali abanaka nelyo abo bafumishe mu cilonganino, balibwelela mu cilonganino. Tulabapokelela ne nsansa! (2 Kor. 2:8) Moneni ifyo cali kuli nkashi umo uwaile mu kulongana ku Ng’anda ya Bufumu ninshi palipita imyaka 10 ukutula apo anakiile. Atile: “Aba bwananyina balemposha ninshi bali ne nsansa.” (Imil. 3:19) Bushe uyu nkashi aumfwile shani pa fyo aba bwananyina bamulangile icikuuku? Alandile ati: “Naumfwile kwati Yehova alentungulula pa kuti ningaba ne nsansa na kabili.” Nga tulekoselesha aba bwananyina, Kristu kuti asansamusha “abalecula kabili abafininwa” ukupitila muli ifwe.—Mat. 11:​28, 29.

15. Finshi fimbi tulingile ukucita pa kuti tube abaikatana mu cilonganino? (Moneni ne cikope.)

 ¹⁵ Na kabili kuti twatwalilila ukuba abaikatana mu cilonganino nga tulelanda ifisuma. Pali Yobo 12:11 Baibo itila: “Bushe ukutwi takwishiba ukuti aya mashiwi yasuma no kuti aya yabi nga filya fine ululimi lusonda ifya kulya?” Nga filya fine uwaishiba ukwipika ifya kulya abala asonda ifya kulya ilyo ashilapekanishisha abantu bambi, e fyo na ifwe tulingile ukulatontonkanya sana pa fyo tulefwaya ukulanda ilyo tushilafilanda. (Amalu. 141:3) Tulingile ukulafwaisha ukulanda amashiwi ayengasansamusha kabili ‘ayengakoselesha abaleumfwa.’—Efes. 4:29.

16. Ni bani maka maka abalingile ukubika amano ku fyo balanda?

¹⁶ Abalume e lyo na bafyashi balingile ukubika sana amano ku fyo balanda. (Kol. 3:​19, 21; Tito 2:4) Apo baeluda ni bakacema ba mpaanga sha kwa Yehova, nabo bene balingile ukulasansamusha aba bwananyina. (Esa. 32:​1, 2; Gal. 6:1) Ipinda lya muli Baibo litwibukishako ukuti: “Amashiwi ayalandwa pa nshita yalefwaikwa, yalawama sana.”—Amapi. 15:23.

“TULETEMWANA MU FYO TUCITA NA MU CINE”

17. Kuti twalanga shani ukuti twalitemwa bamunyinefwe na bankashi ukufuma panshi ya mutima?

¹⁷ Umutumwa Yohane atukoseleshe ukuti ‘twilatemwana fye ku mashiwi nangu ku lulimi, lelo tuletemwana mu fyo tucita na mu cine.’ (1 Yoh. 3:18) Tulingile ukutemwa aba bwananyina ukufuma panshi ya mutima. Kuti twabatemwa shani ifi? Nga tuleba na ba bwananyina pa nshita iitali tukalabatemenwako kabili bucibusa bwesu nabo bukakoselako. E ico tulekwatako inshita ya kuba pamo na ba bwananyina nga tulelongana nelyo tulebila imbila nsuma. Muletandalilako na ba bwananyina. Nga tulecita ifi, ninshi tulelanga ukuti Lesa ‘alatusambilisha ukutemwana.’ (1 Tes. 4:9) Na kabili, tukalaimwena ifyo Baibo ilanda pa Amalumbo 133:​1, itila: “Moneni! Aba bwananyina nga bali pamo kabili baleumfwana, cilawama nga nshi kabili balaba ne nsansa!”