IFIMENWA filapanga ifya kulya ukubomfya akasuba. Ifyo bafwailishe pa fimenwa fimo filanga ukuti ifimenwa filapima ifya kulya ifyo fyalabomfya ubushiku bonse.

Tontonkanyeni pali ici: Nga bwaca, ifimenwa filabomfya umwela beta ati carbon dioxide pa kupanga ifya kulya. Nga bwaila, ifimenwa ifingi filatendeka ukubomfya ifya kulya ifyo fyacipanga akasuba, ne ci cilalenga fyakwata ifya kulya fya kubomfya ubushiku bonse pa kuti filekula bwino. Filabomfya ifya kulya mu kulinga pa kuti fingashako ifinono ilyo bushilaca, pantu nga bwaca filatendeka ukupanga fimbi.

Abafwailisha pa fintu balifwailishe pa kamenwa akamoneka nga lubanga ako beta ati Arabidopsis thaliana. Basangile ukuti aka akamenwa kalapima ifya kulya ifyo kalabomfya ukulingana ne fyo ubushiku bwalalepa. Batile kalabala kapima ifyo ubushiku bulepele e lyo kayakanya ifyo kakulabomfya ifya kulya mpaka buce.

Bushe ifimenwa fishiba shani ifya kulya ifyo fikwete? Bushe fipima shani ifyo ubushiku bwalalepa? Bushe fipima shani ifya kulya ifyo fyalabomfya mpaka buce? Nga bafwailishapo na fimbi, e lyo twingeshiba amasuko kuli aya mepusho.

Muletipo shani? Bushe ifyo ifimenwa fipima ifya kulya filanga ukuti fyasangwike fye nelyo kwali uwafipangile?