ILYASHI LIKALAMBA
Ico Mushifwile Ukulafwaila Ukuipaya
DIANA, * mukashana uwacenjela icine cine kabili uwatemwa abantu, e lyo lyonse amoneka fye uwa nsansa. Lelo ifyo amoneka ku nse te fyo aba nakalya. Ilingi Diana alayumfwa uwa bulanda sana. Ici cilenga atendeke ukulaimona ukuti tacindama nangu panono. Diana atile: “Cila bushiku ndatontonkanya pa kufwa. Imona kwati nshakwata incito iili yonse pano calo.”
“Umuntu umo nga ayipaya, ninshi kuli abantu bambi 200 abesesheko ukuipaya e lyo na bambi 400 abatontonkenyepo.”—THE GAZETTE, MONTREAL, CANADA
Diana atile tafwaya ukuipaya. Na lyo line, limo limo atontonkanya ukutila kuti cawama ukufwa ukucila ukutwalilila uwa mweo. Alandile no kuti: “Ico mfwaya sana ca kuti kukacitike ubusanso bumo e mo nkafwile. Ndafwaya sana ukufwa ica kuti nalileka ukutiina imfwa.”
Kwena, te Diana fye uumfwa ifi, kwaba abantu abengi abakwata ubu ubwafwa. Bamo balintontonkanyapo na pa kuipaya e lyo bambi bena balyeshapo no kuipaya. Abasoma pa fyo umuntu atontonkanya batila, abantu abengi abafwaya ukuipaya tabafwaya ukufwa, ico bafwaya kupwisha amacushi. Batontonkanya ukuti bafwile fye ukufwa pantu tabakwata incito iili yonse pa calo. Kanshi icingafwa abantu ba musango uyu kwishiba umulandu balingile ukutwalilila ukuba abomi.
Mulandu nshi mushilingile ukulatontonkanishisha ukuti ukufwa kwawama? Tontonkanyeni pa milandu itatu iyo mushilingile ukufwaila ukufwa.
^ para. 3 Te shina lyakwe ilya cine.
