Bushe Abanakashi Bafwile Ukulasambilishako mu Cilonganino?
Ifyo Baibolo Isambilisha
Bushe Abanakashi Bafwile Ukulasambilishako mu Cilonganino?
UMWANAKASHI umo uupepa ku Katolika alembele mu nyunshipepala ya USA Today ati: “Ala cilampesha amano no kunkalipa pa kumona ukuti takwaba nangu fimo ifyacitika ku kuwamina abanakashi, pamo nga ukubasuminisha ukulasambilishako mu cilonganino.” Abengi e fyo na bo batontonkanya. Na kuba, mu macalici yambi abanakashi balasambilishako, balabasonta pali bunamapepo, bushikofu, nangu fye buRabi.
Ifilonganino fya mapepo ifisuminisha abanakashi ukusambilisha icilonganino ne fitila tabafwile ukubombako umulimo uli onse mu cilonganino, fyonse fitila fikonka ifyaba mu Baibolo. Lelo Baibolo taisuminishapo nangu cimo pali ifi. Mulandu nshi? Pa kwasuka ici cipusho, intanshi tufwile ukulanda pa fyo Baibolo ibomfya ishiwi lya kuti uubombela (mu ciGriki e kutila di·aʹko·nos) ililanda pa muntu uulebomba imilimo ya mu cilonganino.
Abalebomba Imilimo ya mu Cilonganino mu Nshita ya Batumwa
Bushe nga mwaumfwa ukuti imilimo ya mu cilonganino mutontonkanya pa milimo nshi? Abengi batontonkanya pa mulimo wa kusambilisha icilonganino uo abaume nelyo abanakashi babomba. Lelo Baibolo ilanda pa bupilibula na bumbi ubwa ilyo ishiwi. Tontonkanyeni pa mwanakashi uwe shina lya Febi, uo Paulo alondolwele ati “ni nkashi yesu, uubombela [di·aʹko·nos] mu cilonganino ica mu Kenkerea.”—Abena Roma 16:1.
Bushe batini Febi ewaleiminina ku ntanshi no kusambilisha icilonganino ca mu Kenkerea? Iyo. Nga kanshi mulimo nshi Febi alebomba? Muli kalata Paulo alembeele abena Filipi, atile abanakashi bamo ‘balebombesha nga nshi pamo nankwe mu kusalanganya Imbila Nsuma.’—Abena Filipi 4:2, 3, Baibolo ya Icipangano Cipya iya mu 2003.
Inshila ikalamba iyo Abena Kristu ba kubalilapo basalanganishishemo imbila nsuma yali kushimikila ku “bantu” abengi “na ku ng’anda ne ng’anda.” (Imilimo 20:20) Bonse ababombeleko uyu mulimo balebomba umulimo wa di·aʹko·nos. Pali aba pali na banakashi pamo nga Prisila, uyo pamo no mwina mwakwe, ‘balondolwelele bwino bwino amafunde ya kwa Lesa’ ku muntu uwaletiina Lesa lelo uushali Mwina Kristu wabatishiwa. (Imilimo 18:25, 26) Ukupala Febi, Prisila na o ali ni kabomba wafikapo, nga fintu abanakashi bambi bali.
Umulimo Wacindama
Bushe umulimo wa kushimikila walemonwa ngo wa pa nshi, uwapeelwe fye ku banakashi ilyo abaume bena balebomba umulimo wacindama uwa kutungulula icilonganino? Te fyo cali iyo, pa mulandu wa fishinka fibili. Icishinka ca kubalilapo ca kuti, Baibolo itila Abena Kristu bonse, ukubikako na baume abakwata imilimo ikalamba mu cilonganino, balebombako umulimo wa kushimikila. (Luka 9:1, 2) Icishinka ca bubili ca kuti, umulimo wa kushimikila wali e mulimo wacindama kabili ucili e mulimo wacindama uo Abena Kristu bonse abaume na banakashi bakonkelamo icipope ca kuti, “kalengeni aba nko shonse ukuba abasambi, . . . mulebasambilisha.”—Mateo 28:19, 20.
Kwaliba umulimo na umbi uwacindama uo abanakashi bamo babomba mu cilonganino. Paulo alembele ukuti: “Eba na banakashi abakalamba ukuti . . . balesambilisha ifisuma; pa kuti balesambilisha abakashana ukutemwa abalume babo, ukutemwa abana babo.” (Tito 2:3, 4) Kanshi, abanakashi abakosoka kabili ababelesha mu Bwina Kristu, balikwata ishuko lya kwafwa abakashana abashabelesha pa kuti bakosoke. Uyu na o, mulimo wacindama kabili uukankaala.
Ukusambilisha mu Cilonganino
Takwaba apali ponse mu Baibolo apo abanakashi baebwa ukwiminina ku cilonganino no kusambilisha. Lelo umutumwa Paulo abebele ‘ukwikala tondolo mu filonganino.’ Mulandu nshi? Umulandu umo abalembeele ni pa kuti ifintu filecitwa “bwino bwino kabili ukwabula icimfulunganya.” (1 Abena Korinti 14:34, 40) Pa kuti ifilonganino filetungululwa bwino, Lesa asuminisha ibumba limo fye ukusambilisha. Lelo moneni ukuti, umuntu tapeelwa umulimo wa kutungulula mu cilonganino pantu fye mwaume; lelo umulimo upeelwa fye ku baume abafikapo icine cine. *—1 Timote 3:1-7; Tito 1:5-9.
Bushe umulimo Lesa apeela abanakashi wa pa nshi? Awe nakalya. Ibukisheni ukuti Yehova alibasonta ukubomba umulimo wacindama, uwa kushimikila abantu pali ena. (Amalumbo 68:11) Inte sha kwa Yehova pali lelo, abaume na banakashi balyafwa abantu abengi nga nshi ukulapila no kupusuka. (Imilimo 2:21; 2 Petro 3:9) Ala balibombesha icine cine!
Ifi Lesa apeela abaume na banakashi imilimo yapusanapusana, calenga pabe umutende kabili e nshila abacindikilamo bonse. Natulangilile: Amenso na matwi filabombela pamo ku kwafwa umuntu ukuciluka umusebo umupita bamotoka abengi. E fyo caba na ku baume na banakashi. Ilyo balebomba imilimo babapeela, Lesa alalenga mu cilonganino mwaba umutende.—1 Abena Korinti 14:33; Abena Filipi 4:9. *
[Amafutunoti]
^ para. 13 Ibukisheni no kutila amaka umwaume akwata mu cilonganino yalikwata umwa kupelela. Alanakila Kristu kabili afwile ukubomba mu kumfwana ne fipope fya mu Baibolo. (1 Abena Korinti 11:3) Bonse abatungulula mu cilonganino na bo bafwile ‘ukulanakilana,’ ukuba abaicefya no kulabombela pamo na bambi.—Abena Efese 5:21.
^ para. 15 Ilyo abanakashi bacindika umulimo uo Lesa apeela abaume mu cilonganino, baba ca kumwenako kuli bamalaika ku muulu.—1 Abena Korinti 11:10.
BUSHE MWALIPUSHAPO UKUTI . . .
● Bushe abanakashi mu cilonganino ca kubalilapo ica Bwina Kristu balesambilisha shani?—Imilimo 18:26.
● Ni bani basontwa ukwangalila icilonganino?—1 Timote 3:1, 2.
● Bushe Lesa amona shani umulimo abanakashi babomba pali lelo?—Amalumbo 68:11.
[Amashiwi pe bula 15]
“Yehova asosa icebo; abanakashi abalesabankanya imbila nsuma libumba ilikalamba.”—AMALUMBO 68:11