Pa kutwafwa, Yehova alitupeela aba bwananyina aba mwi sonde lyonse. (1 Pet. 5:9) Aba bamunyinefwe na bankashi balatwafwa ukucimfya amafya ayo tuba nayo ilyo tulebila imbila nsuma. Ku ca kumwenako, umutumwa Paulo balimwafwile sana kuli Akula na Prisila, kuli Sila, Timote, e lyo na ku ba bwananyina bambi.—Imil. 18:1-5.

Bushe abo mulebomba nabo mu mulimo wa kubila imbila nsuma kuti bamwafwa shani? Kuti bamupandako amano pa fyo mwingacimfya amafya mukwete ilyo mulebila imbila nsuma, pa fya kucita ifipempu fya ku bwelelamo, nelyo pa fya kutendeka no kutungulula amasambililo ya Baibolo. Tontonkanyeni pa wa bwananyina mwaba nankwe mu cilonganino uwingamwafwa ukupwisha ubwafya mukwete, lyena mwebeni ukuti amwafwe. Ca cine ukuti nga tuleafwana, bonse tukalanonkelamo kabili tukalasekelela.—Fil. 1:25.

TAMBENI VIDIO ITILA KUTI MWABA NE NSANSA NGA MULELEKA YEHOVA ALEMWAFWA UKWISHIBA IFYA KUPANGA ABASAMBI—MULELEKA ABA BWANANYINA BALEMWAFWA, LYENA ASUKENI AMEPUSHO YAKONKAPO:

• Bushe ba Neeta bacesha shani ukukoselesha ba Jade ukulasangwa mu kulongana?

• Mulandu nshi tulingiile ukulaya na bakasabankanya balekanalekana mu kutungulula isambililo lya Baibolo?

• Finshi ifyo ba Jade bacitemwa ifyacipalana ne fyo ba Abigail batemwa?

• Finshi fimo ifyo abo tulebomba nabo mu mulimo bengatusambilishako?