Abantu nga baupana ninshi bapanga ulupwa. Nangu ca kuti balingile ukutwalilila ukutemwa no kucindika abafyashi babo, abena mwabo e baba abacindama sana kuli bena. Balupwa wenu bamo te kuti bomfwikishe ukuti abena mwenu e bacindama sana. Lelo ifyo Baibolo yalanda kuti fyamwafwa ukulaumfwana na balupwa wenu ilyo mule-esha ukukosha icupo cenu.

IFYO BAIBOLO ILANDA: “Ulecindika wiso na noko.” (Abena Efese 6:2) Nangu mukule shani, mulingile ukucindika abafyashi benu. Mwilalaba ukuti abena mwenu nabo, balingile ukulabika amano ku bafyashi babo. “Mu kutemwa tamwaba ubufuba,” kanshi tamufwile ukumfwa ububi abena mwenu nga balomfwana sana na bafyashi babo.—1 Abena Korinti 13:4; Abena Galatia 5:26.

IFYO MWINGACITA:

• Mwilatemwa ukweba abena mwenu ukuti “Balupwa wenu balinsuula” nelyo ukuti “Banyinenwe tabatemwa ifyo ncita”

• Esheni ukwishiba ifyo abena mwenu balemona ifintu

IFYO BAIBOLO ILANDA: ‘Umwaume akasha wishi na nyina no kulambatila ku mukashi wakwe, na bo bakaba umubili umo.’ (Ukutendeka 2:24) Nga mwaupa nelyo mwaupwa, abafyashi benu kuti balemona kwati bacili na maka pali imwe, kabili kuti balafwaya ukulaibikamo mu filecitika mu lupwa lwenu.

Kanshi imwe na bena mwenu mulingile ukulanshanya ifyo abafyashi benu bafwile ukucita ne fyo bashifwile ukucita no kubeshibisha. Kuti mwabeba ukwabula ukupita mu mbali, lelo mu mucinshi. (Amapinda 15:1) Ubupete, ukufuuka, no kushishimisha fikalenga muleumfwana na balupwa wenu no kutwalilila “ukushipikishanya mu kutemwa.”—Abena Efese 4:2.

IFYO MWINGACITA:

• Nga ca kuti balupwa baleibikamo sana mu filecitika mu cupo cenu, lanshanyeni na bena mwenu ilyo mushifulilwe

• Umfwaneni ifya kucita pa kupwisha ubo bwafya