IFYO MWINGATENDEKA UKULANSHANYA
ISAMBILILO 5
Ukucenjela
Ishinte lye funde: “Imilandile yenu yonse ibe iisuma.”—Kol. 4:6.
Ifyo Paulo Acitile
1. Tambeni VIDIO, nelyo belengeni Imilimo 17:22, 23. Lyena lanshanyeni amepusho yakonkapo:
-
Bushe Paulo aumfwile shani pa fisambilisho fya bufi ifyo abantu balekonka mu Atena?—Moneni Imilimo 17:16.
-
Mu cifulo ca kusuusha abaleikala mu Atena, bushe Paulo alangile shani ukucenjela pa kuti abomfye ifyo basuminemo pa kubila imbila nsuma kuli bena?
Finshi Tulesambilila Kuli Paulo?
2. Abantu balatemwa ukukutika kuli ifwe nga ca kuti tulesala bwino amashiwi ya kulanda e lyo ne nshila ya kuyalandilamo.
Mulepashanya Paulo
3. Mulesala bwino amashiwi. Ku ca kumwenako nga mulelanda no muntu uushili Mwina Kristu, nalimo kuti mwa-alulako ifyo mwingatendeka ukulanshanya nankwe pa fya mu Baibo nelyo pali Yesu.
4. Mwila-angufyanya ukulungika umuntu. Muleleka alanda ifili mu mutima. Nga ca kuti alanda fimo ifipusene ne fyo Baibo ilanda, mwila-angufyanya ukumulungika. (Yako. 1:19) Nga mulekutikisha mukeshiba ifyo asuminamo e lyo ne calenga.—Amapi. 20:5.
5. Mulesuminishako ku fyo alanda no kumutasha apo calinga. Nalimo aishiba ukuti ifyo asuminamo e fya cine. Mulebalilapo ukulanda pa fyo bonse mwingasuminishanya, lyena panono panono kuti mwatendeka ukumusambilisha pa kuti eshibe ifyo Baibo ilanda.
