Tontonkanya pali ici: Ilyo Chongo aleteya na banankwe umupila, asukusa umupila ica kuti watoba ne windo.

Nga cali niwe kuti wacita shani?

KULI IFINTU FITATU IFYO WINGACITA:

1. Ukubutuka.

2. Ukubepesha umunobe.

3. Ukweba abene be windo ifyo ucitile no kubeba ukuti walabashitila limbi.

Nalimo kuti wafwaya ukusala Ica Kubalilapo. Lelo caliwama ukusumina ukuti niwe ucitile umulandu, nampo nga kutoba iwindo nelyo mulandu fye umbi ucitile.

1. Cisuma ukusumina nga walufyanya.

   Baibolo itila: “Tufwaya ukuba aba cishinka muli fyonse.”—AbaHebere 13:18.

2. Abantu cilabangukila ukwelela umuntu nga asumina ukuti nalufyanya.

   Baibolo itila: “Uufimba pa fibi ifyo acitile takashuke, lelo uufisokolola no kufileka akabelelwa uluse.”—Amapinda 28:13.

3. Icacindamisha ca kuti, Lesa alatemwa nga wasumina ukuti naulufyanya.

   Baibolo itila: “Uwa bucenjeshi wa bunani kuli Yehova, lelo abalungama e baba bacibusa bakwe.”—Amapinda 3:32.

Karina uuli ne myaka 20, taebele bawishi ukuti alipangile umulandu ilyo aleensha motoka. Na lyo line, balisukile baishiba. Atile: “Pa numa ya mwaka umo ilyo batata balemona mu fipepala fya inshuwalansi, basangile icipepala bampeelelepo umulandu wa kubutusha motoka. Balinkalipile sana!”

Cinshi asambilileko? Karina atile: “Ukufisa umulandu kulenga fye ifintu ukubipilako, pantu umulandu taubola!”

Baibolo itila, “Bonse tulaipununa imiku iingi.” (Yakobo 3:2) Nga fintu twamona, ukusumina umulandu ilyo line fye walufyanya kulanga ukuti waliiceefya kabili ulakonka ifyo Lesa atweba.

Cimbi ico ufwile ukucita kusambililako ku filubo wapanga. Vera atile: “Ndesha ukutontonkanya pa cilubo mpangile no kusambililako pa kuti nshibwekeshepo ico icilubo.” Inga iwe kuti wacita shani?

Tutile wayashima incinga ya bawiso e lyo waonaula. Finshi ufwile ukucita?

• Kwikalafye tondolo pa kuti bawiso beishiba.

• Kweba bawiso ifyacicitika pa kuti incinga yonaike.

• Kweba bawiso ifyacicitika no kubepesha umunobe.

Tutile wapona amashindano ku sukulu pantu tawalebelenga. Finshi ufwile ukucita?

• Ukulanda ukuti amashindano yalikosele.

• Ukulanda ukuti ico uponene ni co tawalebelenga.

• Ukulanda ukuti bakafundisha balikupata.

 Nomba mona pa fya kumwenako ifi twalandapo, kabili elenganya ukuti niwe (1) umufyashi na (2) kafundisha. Bushe bawiso na bakafundisha kuti bakumona shani nga ca kuti wasumina ukuti naulufyanya?Kuti bakumona shani nga ca kuti walafwaya umwakubepekesha pa kuti fye uipokolole?

Nomba tontonkanya pa filubo fimo ifyo wacitile mu mwaka wafumineko e lyo wasuke amepusho yakonkelepo.

Cinshi walufyenye? Finshi wacitile pa kuti uyo mulandu upwe?

• Nalifishile.

• Nalibepeshe umuntu umbi.

• Nalisumine ukuti nalilufyenye.

Bushe waumfwile shani ilyo wakeene ukuti te iwe walufyenye?

• Nalyumfwile bwino pantu nalifishile umulandu!

• Nalyumfwile ububi pantu nshalandile icishinka.

Finshi walingile ukucita pa kuti ifintu fibe bwino?

Finshi wasambilile ku fyo walufyenye?

Cinshi abantu bamo bashifwaila ukusumina ukuti nabalufyanya?

Bushe abantu bakulakumona shani nga ca kuti lyonse ulafishilisha ifilubo ucita? Nomba bushe bakulakumona shani nga ca kuti taukaana umulandu nga naulufyanya?—Luka 16:10.