MUNTU wa musango nshi mwingatemwa aba cibusa wenu? Te ca kutwishika ukuti, ni ulya uutontonkanya nga imwe, uwatemwa ifyo mufwaya kabili uwacindamika ifyo mwacindamika. Kabili kuti mwatemwa uwa mibele isuma, iya cishinka ne cikuuku.

² Ukutula fye na ku kale, Lesa alisala abantunse bamo ukuba bacibusa bakwe abatemwikwa sana. Ku ca kumwenako, Yehova aitile Abrahamu ati ni cibusa wakwe. (Esaya 41:8; Yakobo 2:23) Lesa atile Davidi “umuntu uwapokelelwa no mutima wandi” pantu Yehova alimutemenwe. (Imilimo 13:22) Kabili kasesema Daniele ali “uwatemwikwa” kuli Yehova.—Daniele 9:23.

³ Cinshi Yehova asaliile Abrahamu, Davidi, na Daniele ukuba bacibusa bakwe? Aebele Abrahamu ati: “Nuumfwe shiwi lyandi.” (Ukutendeka 22:18) E ico, Yehova atemwa abaicefya kabili abacita ico afwaya bene ukucita. Aebele abena Israele ukuti, “Umfweni kwi shiwi lyandi, e lyo nkaba Lesa wenu, na imwe mukaba abantu bandi.” (Yeremia 7:23) Na imwe nga muleumfwila Yehova, mukaba cibusa wakwe!

YEHOVA ALAKOSHA IFIBUSA FYAKWE

⁴ Moneni ifyo ukuba cibusa wa kwa Lesa kwawama. Baibolo itila Yehova alabebeta abantu “ku kuilango kuti wa maka ku kwafwa ababa ne mitima ya mpomfu kuli wene.” (2 Imilandu 16:9) Bushe Yehova kuti ailanga shani ukuti wa maka ku kumwaafwa? Cimo ico engacita ni cilya Amalumbo 32:8, yalandapo. Yatila: “[Ne Yehova] ndekushilimuna, kabili ndekulange nshila iyo ufwile ukwendamo; ndekupanda amano na menso yandi pali iwe.”

⁵ Mwandini ayo mashiwi, yalanga bwino bwino ukusakamana kwa kwa Yehova! Akamutungulula no kumubaka ilyo mwaumfwila aya mashiwi. Lesa afwaya ukumwafwa ukushipikisha amesho na matunko. (Amalumbo 55:22) E ico, nga mulebombela Yehova no mutima wa mpomfu, kuti mwamucetekela nga filya fine kemba wa malumbo amucetekele uwatile: “Nabika Yehova ku ntanshi yandi pe; apo aba ku kulyo kwandi nshakatelentenshiwe.” (Amalumbo 16:8; 63:8) Ca cine, Yehova kuti amwafwa ukulacita ico afwaya. Lelo, nge fyo mwaishiba, kwaliba umulwani wa kwa Lesa uwingatemwa imwe ukukanacite co.

UMULANDU WA BUMULOPWE UO SATANA AIMISHE

⁶Icipandwa 11 muli cino citabo, calondolola ifyo Satana Kaseebanya asuushishe bumulopwe bwa kwa Lesa. Satana atile Lesa wa bufi no mo aloseshe ni mu kuti, Yehova tacitile bwino pa kukanaleka Adamu na Efa baipingwila icali icisuma ne cabipa. Ilyo Adamu na Efa babembwike, na bana babo batampa ukufula pe sonde, Satana na kabili atwishike bucishinka bwa bantu bonse. Satana atile: “Te kutemwa kulenga abantu ukubombela Lesa. Ndekeni ncite fimo mumone ifyo nalafumya bonse kuli Lesa.” Ilyashi lya muntu waleitwa Yobo lilanga ukuti ifi e fyo Satana alemona. Bushe Yobo ali ni ani, kabili ukusuusha kwa kwa Satana kwamukumine shani?

⁷ Yobo ali pano calo mupepi ne myaka 3,600 iyapita. Ali muntu umusuma, pantu Yehova atile: “Tapaba pe sonde uwaba nga wene, umuntu wa mpomfu kabili uwatambalala, uutiina Lesa kabili uwatalukako ku bubi.” (Yobo 1:8) Yobo alecita ifyo Lesa afwaya.

⁸ Satana atwishike icalengele Yobo ukubombela Lesa. Kaseebanya aebele Yehova ukuti: “Bushe imwe tamwapindilila pali wene, na pa ng’anda yakwe, na pali conse ico akwata? Umulimo wa minwe yakwe mwalipaala, ne fitekwa fyakwe fyalifumfumuka mu calo. Lelo, shi tambikeni ukuboko kwenu, mukumyemo na muli conse ico akwata, mumone nga takamutuke pa cinso cenu.”—Yobo 1:10, 11.

⁹ E ico, Satana aloseshe mu kuti, Yobo alebombela fye Lesa pa mulandu wa fisuma ifyo amupeele. Kaseebanya na kabili atile nga ca kutila Yobo alyeshiwe, ali no kufuma kuli Lesa. Bushe Yehova acitile shani ilyo Satana atwishike Yobo? Apo umulandu waimine wakumine icalengele Yobo ukubombela Lesa, Yehova asuminishe Satana ukwesha Yobo. E ico, cali no kumoneka bwino bwino nga ca kutila Yobo alitemenwe Lesa nelyo iyo.

YOBO AESHIWA

¹⁰ Bwangu bwangu, Satana aeseshe Yobo mu nshila shalekanalekana. Ica kubalilapo, Yobo balimwibiile inama shimo, elyo shimbi balishipeye. Ababomfi bakwe abengi balipaiwe. Ici calengele ubwafya mu mikalile. Akayofi na kambi kalicitike, abana ba kwa Yobo 10 balifwile ku cipuupu ca mwela. Lelo, nangu ca kutila ifintu fyabipishe fyalimucitikile, “Yobo tabembwike, kabili talingile Lesa ukulufyanya.”—Yobo 1:22.

¹¹ Satana talekele apo pene. Afwile atontonkenye ati nangu ca kutila Yobo alishipikishe ilyo ashele ukwabula ifikwatwa, ababomfi e lyo na bana, nga alwala alasuula Lesa. Yehova alekele Satana ukulwalika Yobo ubulwele bwabipisha, ubwalekalipa sana. Awe, no kulwala kwine, takwalengele Yobo ukuleka ukucetekela Lesa. Lelo, alishipile no kusosa ukuti: “Nsuke ndeke umweo te kuti ndeke bumpomfu bwandi.”—Yobo 27:5.

¹² Yobo taishibe ukuti ni Satana alengele wena ukucula. Apo Yobo taishibe ukuti Kaseebanya alesuusha bumulopwe bwa kwa Yehova, amwene kwati Lesa e walengele ukuti acule. (Yobo 6:4; 16:11-14) Na lyo line ali uwa cishinka kuli Lesa. Ukukananenuka kwa kwa Yobo kwashinine Satana ukuti filya asosele ati Yobo abombela Lesa pa mulandu wa fisuma ifyo Lesa amucitila, bufi!

¹³ Filya Yobo ashanenwike alengele Yehova ukushinina Satana bwino sana pa kusuusha kwakwe ukwa miponto. Cine cine Yobo ali ni cibusa wa kwa Yehova kabili Lesa alimulambwile pa kukananenuka.—Yobo 42:12-17.

IFYO UYU MULANDU WAMUKUMA

¹⁴ Te bucishinka bwa kwa Yobo fye kuli Lesa ubo Satana asuushishe. Alisuusha na bucishinka bwenu. Ici calimoneka bwino bwino mu Amapinda 27:11, umo Icebo ca kwa Yehova citila: “We mwana wandi, ube uwa mano, ulenge umutima wandi ukusamwa, ukuti njasuke ku ulenseebanya.” Aya mashiwi, ayalembelwe imyaka iingi sana ukutula apo Yobo afwilile, yalangilila ukuti Satana acili aleseebanya Lesa no kutwishika ababomfi bakwe. Nga tulecita ifyo Yehova afwaya, ninshi tulelenga wena ukushinina Satana pa bufi abepa, kabili ico cilenga umutima wa kwa Lesa ukusekelela. Bushe mutontonkanyapo shani pali ico? Bushe na imwe teti mutemwe ukucita ifingalenga Lesa ukushinina Kaseebanya ukuti wa bufi, nangu ca kuti pa kucite fyo kano mwayaluka muli fimo fimo?

¹⁵ Moneni ukuti, Satana atile: “Conse ico umuntu akwata kuti apeelela pa mweo wakwe.” (Yobo 2:4) Ilyo Satana alandile ukuti “umuntu,” alangile apabuuta ukuti te Yobo fye atwishike lelo, bantu fye bonse. Uyu mulandu naucindama sana. Satana alisuusha ukuti te kuti mube ne cishinka kuli Lesa. Kaseebanya kuti atemwa mwakaana ukumfwila Lesa no kushe nshila yalungama ilyo mwaba mu bwafya. Bushe Satana kuti acita shani ico?

¹⁶ Nga filya Icipandwa 10 cisosa, Satana abomfya inshila shalekanalekana ku kufumya abantu kuli Lesa. Inshila imo abomfya, kusansa “nge nkalamo iilebuluma, iilefwaya untu ingalya.” (1 Petro 5:8) E ico, ukusansa kwa kwa Satana kuti kwamoneka ilyo ifibusa, balupwa, nelyo abantu bambi bamukaanya ukusambilila Baibolo no kukonka ifyo musambilila.* (Yohane 15:19, 20) E lyo kabili, Satana “alayalula umwine ku kuba malaika wa lubuuto.” (2 Abena Korinti 11:14) Kaseebanya kuti abomfya inshila sha bumfisolo ku kumulufya no kumubeleleka ukuti muleke ukucita ico Lesa afwaya. Kabili kuti amufuupula, nakalimo ukulenga mwalamona kwati te kuti mukumemo ukucita ifyo Lesa afwaya. (Amapinda 24:10) Satana nangu engesa “nge nkalamo iilebuluma” nelyo nga “malaika wa lubuuto,” ukusuusha kwakwe ni kulya kwine ukwa pa kubala: Atontonkanya ati nga mwaeshiwa nelyo mwatunkwa, mukaleka ukubombela Lesa. Kuti mwalanga shani ukuti ukusuusha kwakwe kwa bufi no kutwalilila ukuba kuli Lesa nga filya Yobo acitile?

UKUMFWILA AMAFUNDE YA KWA YEHOVA

¹⁷ Kuti mwashinina Satana nga mulecita ifyo Lesa afwaya. Kuti mwacita shani ico? Baibolo yayasuka aiti: “Muletemwa Yehova Lesa wenu no mutima wenu onse no mweo wenu onse na maka yenu yonse.” (Amalango 6:5) Nga mwamutemwa sana Lesa, e lyo mukafwaya sana ukucita ico afwaya imwe ukucita. Umutumwa Yohane alembele ukuti: “Uku e kutemwa Lesa, ukuti tubake amafunde yakwe.” Nga mwalitemwa Yehova no mutima wenu onse, mukaimwena ukuti “amafunde yakwe tayaba cisendo.”—1 Yohane 5:3.

¹⁸ Bushe amafunde ya kwa Lesa ni yali kwi? Yamo yalanda pa fyo tushifwile kucita. Ku ca kumwenako, moneni umukululo uuleti “Talukeni Ifyo Yehova Apata.” Palya mwalasangapo imisango iyo Baibolo yalesha. Nga tamutontonkenyepo, kuti mwamona kwati imisango imo iili palya tayabipa sana. Nomba, nga mwatontonkanya pa malembo yalipo, mufwile mwalamona ukuti mu mafunde ya kwa Yehova mwaliba amano. Ukwalula imyendele yenu kuti kwayafya icine cine. Lelo, mu kucita ifyo Lesa afwaya mwaba ubusuma ne nsansa. (Esaya 48:17, 18) Kabili ico, cintu mwingacita. Twaishiba shani?

TALUKENI IFYO YEHOVA APATA

• Ukwipaya abantu.—Ukufuma 20:13; 21:22, 23.
• Ubulalelale.—Ubwina Lebi 20:10, 13, 15, 16; Abena Roma 1:24, 26, 27, 32; 1 Abena Korinti 6:9, 10.
• Ukumfwana ne mipashi yabipa.—Amalango 18:9-13; 1 Abena Korinti 10:21, 22; Abena Galatia 5:20, 21.
• Ukupepa utulubi.—1 Abena Korinti 10:14.
• Bucakolwa. —1 Abena Korinti 5:11.
• Ukwiba.—Ubwina Lebi 6:2, 4; Abena Efese 4:28.
• Ubufi.—Amapinda 6:16, 19; Abena Kolose 3:9; Ukusokolola 22:15.
• Ubufunushi.—1 Abena Korinti 5:11.
• Ulukaakala.—Amalumbo 11:5; Amapinda 22:24, 25; Abena Galatia 5:20.
• Ukulanda ifyabipa.—Ubwina Lebi 19:16; Abena Efese 5:4; Abena Kolose 3:8.
• Ukubomfyo mulopa bubi bubi.—Ukutendeka 9:4; Imilimo 15:20, 28, 29.
• Ukukanapeela aba mu ng’anda yenu ifyo bakabila.—1 Timote 5:8.
• Ukuitumpa mu nkondo na mu fikansa fya cino calo ifya mitekele.—Esaya 2:4; Yohane 6:15; 17:16.
• Ukupeepa fwaka no kubomfya imiti ikola. —Marko 15:23; 2 Abena Korinti 7:1.

¹⁹ Yehova tatweba ukucita ico tushingakumanisha. (Amalango 30:11-14) Alishiba ifyo twingacita ne fyo twingafilwa ukucita ukucila ne fyo twaishiba. (Amalumbo 103:14) Na kabili, Yehova kuti atupeela inkosho ya kumumfwila. Umutumwa Paulo alembele ati: “Wa cishinka Lesa, kabili takamuleke ukweshiwa ukucila pa fyo mwingashipikisha, lelo pamo ne ca kwesha akacita na pa kufuminamo ukuti mube na maka ya kucishipikisha.” (1 Abena Korinti 10:13) Pa kumwafwa ukushipikisha, Yehova kuti amupeela “amaka yacila aya lyonse.” (2 Abena Korinti 4:7) Pa numa ya kushipikisha amesho ayengi, Paulo atile: “Muli fyonse ndi no bukose mu ulenkosha.”—Abena Filipi 4:13.

UKUKWATA IMIBELE IYO LESA ATEMWA

²⁰ Pa kutemuna Yehova kwaba na fimbi ififwaikwa, te kukanacita fye ifyo apata. Mufwile no kutemwa ifyo atemwa. (Abena Roma 12:9) Bushe abo mufwaya ukuba ifibusa fyenu te balya abatontonkanya nga imwe, abatemwa ifyo mufwaya na bacindika ifyo mwacindika? E fyo caba na kuli Yehova. E ico sambilileni ukutemwa ifyo Yehova atemwa. Fimo pali ifi bafilondolola pa Amalumbo 15:1-5, apo tubelenga pa bo Yehova asala ukuba ifibusa fyakwe. Ifibusa fya kwa Yehova filakwata ifyo Baibolo ita aiti: “ifisabo fya mupashi.” Ne fi, “kutemwa, ukusekelela, umutende, ukushishimisha, icikuuku, ubusuma, icitetekelo, ukufuuka, ukuilama.”—Abena Galatia 5:22, 23.

²¹ Ukubelenga no kusambilila Baibolo lyonse kukamwafwa ukukwata iyi mibele itemuna Lesa. Kabili ukusambilila ifyo Yehova afwaya kukamwafwa ukulacita ifyo Lesa afwaya. (Esaya 30:20, 21) Nga mwamutemwa icibi Yehova, e lyo mukafwaya sana ukucita ififwaya Lesa.

²² Mufwile ukubombesha pa kuti mulecita ifyo Yehova afwaya. Baibolo ipashanya ukwalula imikalile yenu ku kufuula ubuntu bwa kale no kufwala ubupya. (Abena Kolose 3:9, 10) Nomba, kemba wa malumbo alembele pa mafunde ya kwa Yehova, ati: “Mu kufibaka e mukonke cilambu icikalamba.” (Amalumbo 19:11) Na imwe mukasanga ukuti ukucita ifyo Lesa afwaya, kulaleta ubusuma ubwingi sana. Nga mulecite fyo Lesa afwaya, mukashinina Satana ukuti wa bufi kabili mukalenga umutima wa kwa Yehova ukusekelela!

*  Ici tacilolele mu kuti abakaanya imwe ninshi batungululwa na Satana. Lelo, Satana e lesa wa buno bwikashi, kabili icalo conse calaala mu maka yakwe. (2 Abena Korinti 4:4; 1 Yohane 5:19) E ico, kuti twaenekela ukupatwa, na bamo bamo ukutucusha ilyo tulecita ifyo Lesa afwaya.