“MONA! Amenshi; cinshi cilendesha ukubatishiwa?” E fyo umulaashi wa ku Etiopia aipwishe mu mwanda wa myaka uwa kubalilapo. Umwina Kristu waleitwa Filipi alimulondolwela bwino sana ukuti Yesu e Mesia wali no kwisa. Ilyo ifyo asambilile mu Malembo fyamufikile pa mutima, umwina Etiopia alicitilepo cimo. Atile alefwaya ukubatishiwa!—Imilimo 8:26-36.

² Nga mwalisambilila bwino bwino ne Nte ya kwa Yehova ukufuma pa Cipandwa 1 ukufika pano, napamo kuti mwatemwa ukuipusha amuti, ‘Cinshi cilendesha ukubatishiwa?’ Ukufika apa namusambilila ukuti Baibolo yalilaya ukutila tukekala umuyayaya muli Paradaise. (Luka 23:43; Ukusokolola 21:3, 4) Mwalisambilila ne fyo abafwa baba no kuti kukaba ukubuuka. (Lukala Milandu 9:5; Yohane 5:28, 29) Nakalimo mulalongana ne Nte sha kwa Yehova pa kulongana kwa cilonganino kabili mwali-imwena ukuti ukupepa kwabo kwa cine. (Yohane 13:35) Ne cikalamba sana ca kuti, mufwile mwalitendeka ukuba cibusa wa kwa Yehova Lesa.

³ Kuti mwalanga shani ukuti mulefwaya ukubombela Lesa? Yesu aebele abakonshi bakwe ukuti: ‘Kabiyeni, kalengeni aba nko shonse ukuba abasambi, mulebabatisha.’ (Mateo 28:19) Yesu umwine alibalangile ifya kucita ilyo abatishiwe mu menshi. Tabamusanshile fye amenshi, kabili tabamwitiile fye amenshi pa mutwe. (Mateo 3:16) Ishiwi lya kuti “ukubatisha” lyafuma kwi shiwi lya ciGriki ilyalola mu kuti “ukutumpika.” Kanshi pa kubatishiwa, Umwina Kristu alatumpikwa umubili onse mu menshi.

⁴ Bonse abafwaya ukuba ifibusa fya kwa Yehova Lesa bafwile ukubatishiwa. Ulubatisho lulanga apabuuta ukuti mulefwaya ukubombela Lesa. Lulanga ukuti mwalitemwa ukucita ukufwaya kwa kwa Yehova. (Amalumbo 40:7, 8) Lelo, pa kuti mulinge ukubatishiwa, mufwile ukucita ifintu fimo.

UKWISHIBA NE CITETEKELO FILAFWAIKWA

⁵ Mwalitendeka kale ukucita ica kubalilapo icifwaikwa. Cinshi ico? Kwishiba Yehova Lesa na Yesu Kristu. Napamo icalenga kusambilila Baibolo lyonse. (Yohane 17:3) Lelo fingi tufwile ukusambilila. Abena Kristu bafwaya ‘ukwisulamo ukwishiba kwine kwine ukwa kufwaya kwa kwa Lesa.’ (Abena Kolose 1:9) Ukusangwa ku kulongana kwa Nte sha kwa Yehova kukamwafwa sana ukwishiba Lesa. Calicindama ukusangwa kuli uko kulongana. (AbaHebere 10:24, 25) Ukusangwa lyonse ku kulongana kukalenga mukeshibe sana Lesa.

⁶ Kwena te fyonse ifyaba mu Baibolo mufwile ukwishiba pa kuti mubatishiwe. Umulaashi wa ku Etiopia alishibeko fimo, lelo alekabila ubwafwilisho pa kuti omfwikishe fimo fimo mu Malembo. (Imilimo 8:30, 31) Na imwe bene fingi ifyo mushilasambilila. Na kuba, tamwakaleke ukusambilila pali Lesa. (Lukala Milandu 3:11) Lelo, pali fimo fimo ifyo Baibolo isambilisha ifyo mufwile ukwishiba no kusumina ilyo mushilabatishiwa. (AbaHebere 5:12) Ne fi, fintu pamo nga ifyo abafwa baba, ne co ishina lya kwa Lesa no Bufumu bwakwe fyacindamina.

⁷ Lelo, te kwishiba fye kufwaikwa, pantu “ukwabula icitetekelo [Lesa] te kuti ateemunwe.” (AbaHebere 11:6) Baibolo itwebo ukuti ilyo abantu bamo mu musumba wa ku kale uwa Korinti baumfwile ubukombe ubo Abena Kristu balebila, “balisumine no kubatishiwa.” (Imilimo 18:8) Kanshi ukusambilila Baibolo kufwile ukumulenga ukucetekela ukuti Baibolo Cebo capuutwamo ica kwa Lesa. Ukusambilila Baibolo kufwile ukumwafwa ukucetekela amalayo ya kwa Lesa no kucetekela ukuti ilambo lya kwa Yesu kuti lyamupususha.—Yoshua 23:14; Imilimo 4:12; 2 Timote 3:16, 17.

UKWEBAKO BAMBI ICINE CA MU BAIBOLO

⁸ Ilyo icitetekelo cilekula mu mutima wenu, mukalafilwa ukwikala fye ukwabula ukwebako bambi ifyo mulesambilila. (Yeremia 20:9) Mukalafwaya sana ukwebako bambi pali Lesa ne fyo afwaya.—2 Abena Korinti 4:13.

⁹ Kuti mwalaebako bambi icine ca mu Baibolo ukwabula ukubakalifya. Na bo mwingatendekelapo ni ba lupwa, ifibusa, abena mupalamano, na bo mubomba nabo. Mu kupita kwa nshita, mukafwaya ukulashimikila pamo ne Nte sha kwa Yehova. Nga mwafwaya ukutendeka ukucite co, lanshanyeni na Nte uumusambilisha Baibolo. Nga camoneka ukuti namulinga ukutendeka ukushimikila icintubwingi, kukaba amapekanyo ya kuti imwe no umusambilisha mukalanshanye na baeluda ba mu cilonganino babili.

¹⁰ Ici cikalenga mukabeshibe sana baeluda ba Bwina Kristu bamo bamo, abacema umukumi wa kwa Lesa. (Imilimo 20:28; 1 Petro 5:2, 3) Nga ca kutila aba baeluda basanga ukuti namwishiba amasambilisho ya mu Baibolo ayo mufwile ukubalilapo ukwishiba, no kutila mulecita ifilingene ne fishinte fya mafunde ya kwa Lesa, e lyo kabili mulefwaya sana ukuba Inte ya kwa Yehova, bakamweba ukuti namufikapo ukushimikila ku cintubwingi. Lyene, mukaba kasabankanya wa mbila nsuma uushabatishiwa.

¹¹ Kabili, napamo kuti mwakabila ukwalula imyendele yenu ne misango pa kuti mufikepo ukushimikila icintubwingi. Nakalimo kuti caba kuleka ukucita fimo ifyo mucita mu bumfisolo. E ico, ilyo mushilalanda ukuti mulefwaya ukuba kasabankanya ushabatishiwa, mufwile ukuleka ukucita imembu, pamo nga ubulalelale, ukukolwa, no kubomfya imiti ikola.—1 Abena Korinti 6:9, 10; Abena Galatia 5:19-21.

UKULAPILA NO KUPILIBUKA

¹² Kuli na fimbi ifyo mufwile ukucita pa kuti mubatishiwe. Umutumwa Petro asosele ukuti: “Lapileni, kabili pilibukeni pa kuti imembu shenu shifuutwe.” (Imilimo 3:19) Ukulapila kumfwa ububi pali fimo ifyo mwacita. Ukulapila kulafwaikwa maka maka umuntu nga alacita ifyabipa, lelo kulafwaikwa nangu fye umuntu tacita ifyabipa. Mulandu nshi? Pantu bonse tuli babembu kabili tulafwaya Lesa atubelelo luse. (Abena Roma 3:23; 5:12) Ilyo mushilatendeka ukusambilila Baibolo tamwaishibe ico Lesa afwaya. Bushe nga mwalecita shani ukufwaya kwakwe? E ico kanshi, mufwile ukulapila.

¹³ Umuntu nga alapila, lyena afwile ukupilibuka. Tamufwile ukupelela fye pa kumfwa ububi pa fyo mwalecita. Mufwile ukuleka ukucita icabipa no kupampamina pa kutwalilila ukucita icalungama. Mufwile ukulapila no kupilibuka ilyo tamulabatishiwa.

UKUIPEELA

¹⁴ Kwaba na cimbi icacindama ico mufwile ukucita ilyo mushilabatishiwa. Mufwile ukuipeela kuli Yehova Lesa.

¹⁵ Nga mwaipeela kuli Yehova Lesa mwi pepo ukufuma pa nshi ya mutima, ninshi mwalaya ukuti e o mwakulabombela fye umuyayaya. (Amalango 6:15) Lelo, cinshi umuntu afwile ukucitila ico? Cisuma, tutile, umwaume atendeka ukwishishanya no mwanakashi. Ilyo aishiba sana umwanakashi kabili amona ne mibele yakwe iisuma, e lyo umwaume atemwa sana uyu mwanakashi. Mu kupita kwa nshita, akasuka akamwebe ukuti awe nomba nabopane. Nga amuupa akakwate imilimo na imbi. Lelo, apa panono sana nga ca kutila natemwa uyo mukashana.

¹⁶ Nga mwaishiba Yehova no kumutemwa, mukafwaisha ukumubombela no mweo onse kabili ukufika apo mwingapesha. Onse uufwaya ukukonka Umwana wa kwa Lesa, Yesu Kristu, afwile ‘ukuikaana.’ (Marko 8:34) Nga ca kutila ifyo tufwaya tafiletucilikila ukumfwila Lesa, ninshi twaliikaana. Pa kuti mubatishiwe, ico mufwile ukucindamika sana, kucita ukufwaya kwa kwa Yehova Lesa.—1 Petro 4:2.

UKUKANATIINA UKUFILWA

¹⁷ Bamo tabafwaya ukuipeela kuli Yehova pa mulandu wa kuti balatiina. Napamo batila nga baipeela bakalubulula kuli Lesa apo nomba Bena Kristu. Batila, cawama ukukanaipeela kuli Yehova pantu nakalimo kuti waipeela e lyo wafilwa ukucita ico Yehova afwaya.

¹⁸ Nga mwasambilila ukutemwa Yehova, mukafwaya sana ukuipeela kuli ena no kwikala umwabela ukuipeela kwenu. (Lukala Milandu 5:4) Ilyo mwaipeela, kwena mukafwaya “ukwenda umwawamina Yehova ku kuleka ateemunwe ukufikapo.” (Abena Kolose 1:10) Nga namumutemwa sana Lesa, tamwakamone kwati calyafya ukucita ukufwaya kwakwe. Ukwabula no kutwishika, mukasuminisha ifyalandile umutumwa Yohane uwalembele ukuti: “Uku e kutemwa Lesa, ukuti tubake amafunde yakwe; kabili amafunde yakwe tayaba cisendo.”—1 Yohane 5:3.

¹⁹ Te kutila pa kuti muipeele kuli Lesa kano mwaba abapwililika. Yehova alishiba ifyo mushingacita kabili tenekela imwe ukucita ifyo mushingakumamo. (Amalumbo 103:14) Afwaya imwe ukucita ifintu bwino kabili akamutungilila no kumwafwa. (Esaya 41:10) Mukamona ukuti nga mwacetekela Yehova no mutima wenu onse “akatambalike nshila shenu.”—Amapinda 3:5, 6.

UKUBATISHIWA CILANGILILO CA KUIPEELA KWENU

²⁰ Ukutontonkanya pa fyo twalandapo kuti kwamwafwa ukuipeela kuli Yehova mwi pepo. Onse uwatemwa Lesa afwile “alumbula no kupusuka.” (Abena Roma 10:10) Kuti mwalumbula shani?

²¹ Ebeni kampanya we bumba lya baeluda mu cilonganino mwaba ukuti mulefwaya ukubatishiwa. Akateyanya ukuti baeluda bakapituluke nenu mu mepusho ayalanda pa fyo Baibolo isambilisha ifyo mufwile ukubalilapo ukwishiba. Nga ca kutila aba baeluda basanga ukuti namulinga, bakamweba ukutila kuti mwabatishiwa pa kulongana kukalamba ukukakonkapo.* Ilyashi ililanda pa fyo ulubatisho lwacindama ilingi line lilalandwa pali uku kulongana. Lyene kalanda aleba bonse abaleya mu kubatishiwa ukwasuka amepusho yabili ayayanguka pa kuti ‘balumbule’ pa cintubwingi icitetekelo cabo.

²² Ukubatishiwa e kulenga mwaishibikwa ukuti mwaliipeela kuli Lesa no kuti nomba muli Nte ya kwa Yehova. Abalebatishiwa babatumpika umubili onse mu menshi pa kuti balange icintubwingi ukuti nabaipeela kuli Yehova.

UMWALOLA ULUBATISHO LWENU

²³ Yesu atile abasambi bakwe babatishiwa “mwi shina lya kwa Tata ne lya Mwana ne lya Mupashi wa mushilo.” (Mateo 28:19) E kutila uulebatishiwa afwile ukwishiba no kucindika icifulo ca kwa Yehova Lesa ne ca kwa Yesu Kristu. (Amalumbo 83:18; Mateo 28:18) Kabili afwile ukwishiba ifyo umupashi wa mushilo nelyo amaka ya kwa Lesa yabomba.—Abena Galatia 5:22, 23; 2 Petro 1:21.

²⁴ Lelo, ukubatishiwa te kutumpikwa fye mu menshi. Ulubatisho lwimininako icintu cimo icacindama sana. Ukutumpikwa mu menshi, kulangilila ukuti mwafwa ku fyo mwalecita kale. Nga mwatumpulwa ninshi mwabukila ku kucita ukufwaya kwa kwa Lesa. Ibukisheni no kuti muipeele kuli Yehova Lesa, te ku mulimo, nangu ku cintu ico mufwaya sana ukuti cicitike, kabili te ku bantunse bambi, nelyo ku kabungwe. Ukuipeela kwenu no kubatishiwa fyaba ni ntendekelo ya bucibusa bwakosa na Lesa, ukupalama sana kuli wena.—Amalumbo 25:14.

²⁵ Te kutila nga mwabatishiwa ninshi calala capwa mukapusuka. Umutumwa Paulo alembele ukuti: “Mulebombela ipusukilo lyenu no mwenso no kututuma.” (Abena Filipi 2:12) Ukubatishiwa ni ntendekelo fye. Lelo icipusho twingepusha ca kutila, Kuti naikalilila shani mu kutemwa kwa kwa Lesa? Icipande ca kulekelesha cikasuka ici cipusho.

*  Cila mwaka pa kulongana kukalamba ukwa Nte sha kwa Yehova, balapekanya ukuti pabe ulubatisho.