MONA Yesu uyu ekele apa. Ali pa lupili lwa Galili alesambilisha aba abantu bonse. Abekele mupepi sana na ena, basambi bakwe. Asalile abasambi 12 ukuti babe abatumwa bakwe. Abatumwa, basambi ba kwa Yesu abaibela. Bushe walibeshiba amashina?

Pa batumwa bakwe pali Simone Petro na munyina Andrea. Bambi ni Yakobo na Yohane, aba bwananyina. Umutumwa umbi na o ali ni Yakobo, e lyo umbi ali ni Simone. Abatumwa bambi babili baleitwa ati Yuda. Umo ali ni Yuda Iskariote e lyo Yuda umbi balemwita no kuti Tadeo. Pali na Filipi na Natanaele (uo baleita no kuti Bartolomeo), na Mateo na Toma.

Ilyo Yesu abwelele ukufuma ku Samaria, e lyo atendeke ukushimikila. Alebila ati: ‘Ubufumu bwa mu muulu nabupalama.’ Bushe walibwishiba ubu ubufumu? Buteko bwa cine ubwa kwa Lesa. Yesu e mfumu. Akalatekela ku muulu kabili akaleta umutende pe sonde. Ubufumu bwa kwa Lesa bukalenga icalo conse cikabe paradaise iisuma.

Apa pa cikope, Yesu alesambilisha abantu pa bufumu. Alebeba ati bafwile ukulapepa abati: ‘Shifwe wa mu muulu, ishina lyenu licindikwe. Ubufumu bwenu bwise. Ukufwaya kwenu kucitwe pano isonde, nga mu muulu.’ Abantu abengi beta ili ipepo abati ‘Ipepo lya kwa Shikulu.’ Bambi batila ‘Ipepo lya We Shifwe.’ Bushe walilishiba ili ipepo lyonse?

Yesu alisambilishe abantu na pa fya kwikala na bantu banabo. Atile: ‘Ifyo mufwaya bambi ukucita kuli imwe e fyo na imwe mulecita kuli bena.’ Bushe taumfwa bwino umuntu nga akucitila ifisuma? Kanshi ico Yesu ale-eba abantu ca kuti, tufwile ukulacitila abanensu ifisuma. Mu paradaise mukawama sana pantu abantu bonse bakalacitila abanabo ifisuma!