IYE! Finshi abantu balecita? Balepepa umwana wa ng’ombe! Cinshi balecitila ifi?

Ilyo abantu bamwene ukuti Mose akokola ukubwela ukufuma pa lupili, batile: ‘Tatwishibe icicitike kuli Mose. E ico natupange lesa uwa kututungulula ukufuma muli cino calo.’

Aarone, munyina Mose atile: ‘Cisuma, fuuleni amasikiyo yenu aya golde, no kuyaleta kuli ine.’ Ilyo abantu bacitile ifyo, Aarone aliyasungulwile no kupangamo umwana wa ng’ombe. Na bantu batile: ‘Uyu e Lesa wesu uwatufumishe mu Egupti!’ Lyena abena Israele bapangile umutebeto uukalamba, no kutendeka ukupepa umwana wa ng’ombe.

Ilyo Yehova amwene ifyo bacitile, alikalipe sana. Aebele Mose ati: ‘Kabiye, tentemuka bwangu pantu abantu nabacita icintu icibi sana. Basuula amafunde yandi kabili balepepa umwana wa ng’ombe.’

Mose aile mwi samba lya lupili bwangu bwangu. Kabili ilyo afikile mupepi, amwene abantu baleimba no kushana ninshi nabashinguluka umwana wa ng’ombe! Mose alikalipe ica kuti apoosele ifipaapaatu fibili ifya mabwe apaali amafunde e lyo fyatobaika. Lyena asungulwile umwana wa ng’ombe uwa golde mu mulilo, e lyo pa numa amushonaula mpaka aba ulukungu.

Ico abantu bacitile calibipile sana. E ico Mose aebele abaume bamo ukuti cila muntu abuule ulupanga lwakwe. Atile: ‘Bonse abalepepa umwana wa ng’ombe balingile ukufwa. Balya abaume baipeye abantu 3000! Bushe ici tacilelanga ukuti tatufwile ukulapepa balesa ba bufi, no kuti tufwile ukulapepa Yehova e ka fye?