MONA ifyo isonde lilemoneka! Fyonse ifilipo filemoneka bwino sana! Lolesha ifyani ne fimuti, amaluba ne nama shonse. Sonta apali insofu ne nkalamo.

Nani wapangile icifulo cawama ifi? Natumone ifyo Lesa acitile pa kuti atupekanishishe isonde.

Ica ntanshi, Lesa alengele ifyani ukumena pa mushili. Kabili apangile amaluba ne fimuti ifyalekanalekana, e lyo ne fimenwa fimbi. Ifi fintu filalenga isonde ukulamoneka bwino. Lelo fyalikwata ubusuma na bumbi. Kuli ifi ifimenwa ifingi, tulafumyako ifya kulya ifisuma nga nshi.

Pa numa, Lesa apangile isabi no kulibika mu menshi, apanga ne fyuni ukuti filepupuka mu muulu. Apangile imbwa na tupushi na bakabalwe; inama ishikalamba ne shinono. Ni nama nshi ishaba uko wikala? Bushe tatufwile ukutasha Lesa pa kutupangila ifi fyonse?

Pa numa ya kupanga ifi fyonse, Lesa asalile incende imo no kuiwamya. Ainike iyi ncende ati Edeni. Mu Edeni mwalemoneka bwino sana. Fyonse ifyalimo fyali ifisuma icine cine. Kabili Lesa alefwaya ukuti isonde lyonse likawame nga mu Edeni.

Nomba lolesha na kabili pali ici cikope. Bushe nawishiba ico Lesa amwene ukuti nacibulila mu Edeni? Natumone.