Yesebele alikwete umwana umwanakashi uo bainike ati Atalia, na o ali no mutima uubi kwati fye ni nyina. Atalia aupilwe ku mfumu ya Yuda. Ilyo umulume wakwe afwile, umwana wakwe umwaume e watendeke ukuteka. Nomba ilyo umwana wakwe afwile, Atalia aliibikile pa bufumu mu Yuda. Lyene aipeye abana ba mfumu bonse abali no kupyana pa bufumu ukubikako fye na beshikulu bakwe. Abantu bonse balemutiina.

Shimapepo Mukalamba Yehoyada no mwina mwakwe Yehosheba, balishibe ukuti ifyo Atalia alecita fyalibipile. E ico balifishile Yoashi umwishikulu wa kwa Atalia ninshi ali fye akanya, kabili balemusungila mwi tempele. Atalia nga alishibe ifyo bacitile, nga alibepeye.

Ilyo Yoashi ali ne myaka 7, Yehoyada aitile abakalamba na bena Lebi e lyo abeba ati: ‘Mulelonda ifiibi fye tempele, kabili mwilasuminisha umuntu nangu umo ukwingilamo.’ Lyena Yehoyada abikile Yoashi pa bufumu mu Yuda, amufwika ne cisote ca bufumu. Abantu ba mu Yuda babilikishe abati: ‘Kalebalika mwe mfumu!’

Ilyo Namfumu Atalia aumfwile icongo abantu balepanga, aile bwangu bwangu kwi tempele. Ilyo amwene imfumu iipya, apundile ati: “Nabampondokela! Nabampondokela!” Abakalamba baikete namfumu uwalecita ifyabipa, no kumusenda bamwipaya no kumwipaya. Bushe abantu balitwalilile fye ukucita ifyabipa?

Yehoyada alyafwile abantu ukupangana icipangano na Yehova, kabili balaile Yehova ukuti e o bakulapepa fye eka. Yehoyada abebele  ukuyatobaula itempele lya kwa Baali ne filubi fyonse. Asontele bashimapepo na bena Lebi ukulabomba pe tempele pa kuti abantu batendeke na kabili ukupepa Yehova. Alisontele na bakulinda pa mwinshi we tempele pa kuti umuntu onse uwakowela elaingilamo. Lyena Yehoyada na bakalamba batwele Yoashi kwi sano, bamubika na pa cipuna ca bufumu. Abantu mu Yuda balitemenwe icine cine. Apo Atalia uwali no mutima uubi alifwile, e lyo takwali na balepepa Baali, abaYuda balitendeke ukubombela Yehova na kabili. Bushe wamona ukuti filya Yehoyada ali uwashipa fyalyafwile abantu abengi?