Yonatani umwana umukalamba uwa Mfumu Shauli ali mushilika uwashipa. Davidi atile Yonatani ali uwa lubilo ukucila kapumpe kabili ali na maka ukucila inkalamo. Bushiku bumo, Yonatani amwene abashilika abaPelishiti 20 pa lupili. E ico aebele uwalemusendela ifyanso fya nkondo ati: ‘Twalalwa nabo Yehova nga atusuminisha. Nga ca kuti abaPelishiti batweba ukuya uko bali ninshi Yehova atusuminisha ukulwa nabo.’ E ico abaPelishiti balibilikishe abati: ‘Iseni tulwe!’ Yonatani no mwaume uwalemusendela ifya kulwilako balininine ulupili kabili balicimfishe abashilika abaPelishiti.

Apo Yonatani ali mwana umukalamba uwa kwa Shauli, e wali no kupyana pa bufumu. Lelo Yonatani alishibe ukuti Yehova asalile Davidi ukuba imfumu ya bena Israele Shauli nga afwa. Na lyo line, Yonatani  tapatile Davidi. Yonatani na Davidi baishileba ifibusa sana. Yonatani alaile Davidi ati akulamucingilila no kumupokolola, kabili ifi fine e fyo na Davidi alaile Yonatani. Yonatani apeele Davidi ica kufwala cakwe, ifumo lyakwe, ubuta e lyo no mushipi pa kulanga ukuti ali munankwe.

Ilyo Davidi alebutuka Shauli, Yonatani alile mu kumumona, kabili amwebele ati: ‘Kosa, kabili wiumfwa umwenso. Yehova alikusala ukuba imfumu. Na batata balishiba.’ Bushe kuti watemwa ukukwata umunobe uwaba nga Yonatani?

Pa miku iingi, Yonatani nga balimwipeye ilyo alefwaya ukwafwa umunankwe. Alishibe ukuti Imfumu Shauli yalefwaya ukwipaya Davidi, e ico aebele wishi ati: ‘Nga mwaipaya Davidi mukalufyanya sana pantu tapali ico acita.’ Shauli alifulilwe sana pa fyo Yonatani alandile. Ilyo papitileko imyaka, Shauli na Yonatani balifwile ilyo baile ku nkondo.

Ilyo Yonatani afwile, Davidi atampile ukufwaya umwana wa kwa Yonatani Mefiboshete. Ilyo amusangile amwebele ati: ‘Apo bawiso bali banandi, nakulakusunga mpaka ukafwe. Ukalaikala mwi sano lyandi kabili ukalalya na ine.’ Davidi talabile umunankwe Yonatani.