Yoshua alitungulwile abantu ba kwa Yehova pa myaka iingi, kabili afwile ninshi ali ne myaka 110. Ilyo ashilafwa abena Israele balepepa fye Yehova. Nomba ilyo Yoshua afwile, batendeke ukupepa ifilubi nga filya abena Kanaani balecita. Apo abena Israele balilekele ukumfwila Yehova, alekele Yabini, imfumu ya bena Kanaani ukulabacusha. Abena Israele balilombele Yehova ukuti abafwe. E ico Yehova asontele Baraki ukuti alebatungulula. Baraki ali no kwafwa abantu ukubwelela kuli Yehova.

Kasesema umwanakashi Debora, atumine abakuyaita Baraki. Ico Debora aitile Baraki nico alefwaya ukumweba amashiwi ayafumine kuli Yehova. Amwebele ati: ‘Senda abaume 10,000 kabili kabiye kakumane na bashilika ba kwa Yabini pa mumana wa Kishone. Walayacimfya Sisera umukalamba wa bashilika ba kwa Yabini.’ Lyena Baraki aebele Debora ati: ‘Nga ukaya na ine ninshi nkaya.’ Debora amwebele ati: ‘Nkaya na iwe. Lelo wishibe ukuti te iwe ukepaya Sisera. Yehova alandile ukuti umwanakashi e ukamwipaya.’

Debora aile na Baraki na bashilika bakwe ku Lupili lwa Tabore ku kupekanya ifyo balayalwa. Ilyo Sisera aumfwile ifi, alilonganike amaceleta yakwe na bashilika mupepi no mumana. E lyo Debora  aebele Baraki ati: ‘Buno e bushiku Yehova alalenga ucimfye.’ Baraki na baume bakwe 10,000 batendeke ukubutuka ukutentemuka ulupili ukuya mu kulwa na Sisera na bashilika bakwe aba maka.

Lyena Yehova alengele amenshi mu mumana wa Kishone ukufula sana. Amaceleta ya kwa Sisera yalifililwe ukwenda mu matipa. E ico Sisera alifumine mwi celeta lyakwe kabili alibutwike. Baraki na bashilika bakwe balicimfishe abashilika ba kwa Sisera, lelo Sisera alibutwike! Ilyo abutwike, ailefisama mwi tenti lya kwa Yaele. Uyu mwanakashi apeele Sisera umukaka kabili alimufimbile ubulangeti. Apo alinakile sana, alileele. Lyena Yaele aile aleenda panono panono afika na apo aleele, kabili apoopele ulupoopo mu mutwe wa kwa Sisera, e fyo afwile.

Baraki alile mu kufwaya Sisera. E lyo Yaele afumine pa nse no kweba Baraki ati: ‘Ingileni mwi tenti. Nalamulanga umwaume uo mulefwaya.’ Ilyo Baraki aingile mwi tenti, amwene Sisera ali pa nshi ninshi nafwa. Baraki na Debora balimbile ulwimbo lwa kulumbanya Yehova pa fyo ayafwile abena Israele ukucimfya abalwani babo. E ico pa myaka 40 iyakonkelepo abena Israele baleikala fye umutende.