ISAMBILILO 8
Abrahamu na Sara Balyumfwilile Lesa
Umusumba wa Babele tawali apatali sana na pali umusumba uo baleita ati Uri. Abantu abengi mu musumba wa Uri tabalepepa Yehova, lelo balepepa balesa bambi abengi. Nomba mu Uri mwali umwaume uwalepepa fye Yehova. Ishina lyakwe ni Abrahamu.
Yehova aebele Abrahamu ati: ‘Ndefwaya ushe ing’anda yobe na balupwa obe uleya ku calo ico nkakweba ukuyako.’ Lyena Lesa amulaile ati: ‘Ukaba uluko ulukalamba kabili ukalenga nkacitile abantu abengi ifintu ifisuma.’
Abrahamu taishibe uko Yehova alefwaya ukuti aye, lelo alicetekele Yehova. E ico Abrahamu, umwina mwakwe Sara, Tera wishi, no mwipwa wakwe Lote balilongele ifipe fyabo kabili balimine ubulendo ubutali.
Abrahamu ali ne myaka 75 ilyo ena no lupwa lwakwe bafikile mu calo ico Yehova alefwaya ukubalanga. Ici calo balecita ati icalo ca Kanaani. Ilyo bali muli ici calo, Lesa aebele Abrahamu ati: ‘Ici icalo conse nkacipeela ku bana bobe.’ Lelo pali ilya nshita ninshi Abrahamu na Sara bakote kabili ninshi tabakwatapo no mwana. Bushe Yehova ali no kucita shani pa kuti ifyo abalaile fikacitike?
“Citetekelo calengele ukuti Abrahamu . . . omfwe no kuya ku cifulo ico ali no kupokelela no kupyana; kabili afumine uko aleikala, nangu taishibe uko aleya.”—AbaHebere 11:8
Nalimo Kuti Mwatemwako ne fi
IFIKOPE
Finshi Twingasambilila Kuli Abrahamu?
Bushe Abrahamu ali shani ne cikuuku ku bantu? Kopololeni ici cikope no kubelenga ilyashi lya mu Baibolo pa kuti mumone ifyo Abrahamu ali ne cikuuku.
AMAKARDI
Kardi pali Abrahamu
Sambilila icalengele Abrahamu ukuba cibusa wa kwa Yehova. Pulinta, putula, no kusunga iyi kardi.
