ISAMBILILO 6
Abantu 8 E Bapuswike no Kwingila mu Calo Icipya
Noa no lupwa lwakwe balingiile mu cibwato pamo ne nama. Yehova alisele iciibi ne mfula yalitendeke ukuloka. Imfula yalilokele sana ica kuti icibwato calitendeke ukweleela. Imfula yaleloka fye mpaka mu calo monse mwaba fye amenshi. Abantu abashaninine mu cibwato balifwile. Lelo Noa no lupwa lwakwe tabafwile pantu bali mu cibwato. Ala balitemenwe ukuti balicitile ifyo Yehova abebele!
Imfula yalokele pa nshiku 40 akasuba no bushiku no kuleka yaleka. Panono panono amenshi yaile yalepwa mpaka icibwato caikala pa mpili. Lelo amenshi tayapwile yonse pa calo, kanshi Noa no lupwa lwakwe tabafumine mu cibwato ilyo line.
Panono panono amenshi yasukile yapwa. Noa no lupwa lwakwe baikele mu cibwato ukucila pa mwaka umo. Lyena Yehova abebele ukutila kuti bafuma mu cibwato no kwikala mu calo icali kwati calo icipya. Balitashishe sana Yehova pa fyo abapuswishe, kabili balituulile ilambo kuli Yehova pa kulanga ukuti balitashishe.
Yehova alitemenwe ilambo bamupeele. Abalaile ukuti takonaule na kabili ifintu mu calo ku lyeshi. Alibikileko no mukolamfula pa kulanga ukuti akacita ifyo alaile. Bushe walimonapo umukolamfula?
Lyena Yehova aebele Noa no lupwa lwakwe ukuti bakwate abana pa kuti mu calo conse mukabe abantu.
“Noa aingile mu cibwato; kabili [abantu] tabapooseleko amano nakalya mpaka ilyeshi lyaisa no kubasenda bonse.”—Mateo 24:38, 39
Nalimo Kuti Mwatemwako ne fi
IFIKOPE
Finshi Twingasambilila Kuli Noa?
Kopololeni nelyo ukupulinta ici cikope pa kuti mumone ifyo mwingapashanya icumfwila ca kwa Noa.
PASHANYENI ICITETEKELO CABO
Noa “Ale-enda na Lesa wa Cine”
Bushe mafya nshi Noa no mukashi wakwe bakwete ilyo balekusha abana babo? Bushe balangile shani ukuti bali ne citetekelo ilyo balekuula icibwato?
AMAKARDI
Kardi pali Noa
Bushe walishiba amashina ya bana ba kwa Noa batatu? Sambilileni na fimbi pali Noa no lupwa lwakwe.
