Amashiwi ya Kutendekelako mu Cipande 7
Cino cipande cilelanda pa Mfumu Shauli ne Mfumu Davidi. Ili lyashi lilelanda pa fyalecitika mu myaka nalimo 80. Pa kubala Shauli ali uwaicefya, kabili aletiina Lesa. Lelo tapakokwele alyalwike kabili alikeene ukulakonka ubutungulushi bwa kwa Yehova. Yehova alimukeene, kabili mu kupita kwa nshita, aebele Samwele ukuyasuba Davidi ukuti e o akabe imfumu ya bena Israele. Shauli alifimbiile Davidi, kabili pa miku iingi alefwaya ukumwipaya, lelo Davidi talefwaya ukulandula. Yonatani umwana wa kwa Shauli alishibe ukuti Davidi e o Yehova asalile, e ico ali ne cishinka kuli Davidi. Davidi alicitile imembu ishikalamba, lelo takeene ukuti Yehova amusalapule. Nga muli bafyashi, afweni umwana wenu ukwishiba ifyo cacindamina ukulaumfwila Yehova no kuba aba cishinka kuli ena e lyo na ku bantu abo asonta ukututungulula.
MULI ICI CIPANDE
ISAMBILILO 39
Imfumu ya Kubalilapo iya Bena Israele
Lesa aebele abapingushi ukulatungulula abena Israele, lelo balefwaya ukukwata imfumu. Samwele asubile Shauli ukuba imfumu ya kubalilapo, lelo pa numa Yehova alikeene Shauli. Mulandu nshi?
ISAMBILILO 40
Davidi na Galyati
Yehova asalile Davidi ukuba imfumu yalenga bubili iya Israele, kabili Davidi alecita ifyalelanga ukuti Yehova talufyenye ukumusala.
ISAMBILILO 41
Davidi na Shauli
Cinshi umo pali aba abaume apatile umunankwe, kabili finshi uo bapatile acitile?
ISAMBILILO 42
Yonatani ali Uwashipa Kabili uwa Cishinka
Umwana mwaume wa mfumu alishileba cibusa umusuma uwa kwa Davidi.
ISAMBILILO 43
Ulubembu Imfumu Davidi Yacitile
Ifyabipa ifyo apingwilepo ukucita fyaliletele amafya ayengi.
