Natubweleleko panono ku numa. Nehemia umwina Israele ali mubomfi wa Mfumu Artakishashete, aleikala mu musumba wa Shushani uwa bena Persia. Ndume nankwe wa kwa Nehemia atwele ilyashi ilibi ukufuma ku Yuda, atile: ‘Abantu ababweleelemo ku Yerusalemu tabaleikala bwino. Ifibumba fya musumba ne mpongolo ifyo abena Babiloni baonawile tafyakuulwa na kabili.’ Nehemia alyumfwile sana ububi. Alefwaya ukuya ku Yerusalemu mu kukuula ifibumba, e ico alipepele kuli Yehova ukuti imfumu imusuminishe ukuya.

Pa numa, imfumu yalimwene ukuti Nehemia ali no bulanda. Yamwebele ati: ‘Nshakumonapo ulemoneka ifi. Cinshi ubelele uwa bulanda?’ Nehemia alandile ati: ‘Cinshi ico nshingabela no bulanda, e lyo ninshi umusumba wa Yerusalemu walyonaulwa?’ Imfumu yamwipwishe ati: ‘Cinshi ulefwaya nkucitile?’ Apo pene Nehemia alipepele ipepo lya mu mutima. Lyena aebele imfumu ati: ‘Napaapaata nsuminisheni ukuya ku Yerusalemu mu kukuula cipya cipya ifibumba.’ Imfumu Artakishashete yalisuminishe Nehemia ukuya ku Yerusalemu, kabili yalipekenye ukuti Nehemia akende bwino ubu bulendo ubutali. Na kabili, imfumu yasontele Nehemia ukuba umulashi wa Yuda, kabili yalimupeele ne mbao sha kuyapangila ifiibi fya pa mpongolo ya musumba.

Ilyo Nehemia afikile ku Yerusalemu, alishingulwike umusumba pa kuti amone ifyo ifibumba fyalemoneka. Lyena alitile bashimapepo na balashi, kabili abebele ati: ‘Ifibumba fyalyonaika. Tulingile ukutendeka ukukuula ifibumba.’ Abantu balisumine, kabili balitendeke ukukuula cipya cipya ifibumba.

Lelo abalwani bamo aba bena Israele balebaseka, kabili balebeba ati: ‘Mumbwe nga anina pa cibumba mulekuula kuti cawa.’ Lelo abalekuula tababikile amano ku fyo balebasaalula, batwalilile fye ukukuula. Balikuulile icibumba icitali kabili icakosa.

Abalwani bapangene ukuti bakafume mu ncende ishapusanapusana no kusansa Yerusalemu ukwabula abantu ba mu musumba ukwishiba. Ilyo abaYuda baumfwile ifyo abalwani babo balefwaya ukucita, balyumfwile umwenso. Lelo Nehemia abebele ati: ‘Mwitiina. Yehova ali na ifwe.’ E ico abikileko aba kucingilila abalebomba umulimo, kabili abalwani tababasanshile.

 Mu nshiku fye 52, balipwile ukukuula ifibumba no kupanga ifiibi fya pa mpongolo. Lyena Nehemia alonganike abena Lebi bonse mu Yerusalemu mu kupeela umusumba kuli Yehova. Alibaakenye mu mabumba yabili kabili baleimba inyimbo. Abaleimba inyimbo baninine icibumba ukubomfya amatabo nelyo amastepusi ya pa Mpongolo ya Kamfukumfuku, kabili ibumba limo lyaleya ku lubali lumo, e lyo limbi nalyo lyaleya ulubali lumbi. Balelisha amapenga, amalimba, ne nsango kabili baleimbila Yehova. Esra aile ne bumba limo, na Nehemia na o aile ne bumba limbi, mpaka fye bakumana pe tempele. Abantu bonse, abaume, abanakashi na bana, balipeele amalambo kuli Yehova kabili balisefeshe. Iciunda ca mashiwi yabo caleumfwika no kutali sana.