Bushiku bumo kafundisha wa kwa Emily, umukashana uwa myaka 12 uwikala ku Australia alelanda na bana be sukulu ifyo cawamina ukukwata ifibusa fisuma. Apo kafundisha alebeba ifya kukwata ifibusa fisuma, Emily alilangile kafundisha wakwe kavidio akaba pa webu saiti ya jw.org ako beta ukuti What’s a Real Friend? (Bushe Cibusa Musuma Nani?) Ilyo kafundisha atambishe abana be sukulu aka  kavidio, bonse baikele fye tondolo balekutika. Lintu bapwishishe ukutamba balilanshenye pa fyo basambilile muli aka kavidio pe awala limo. Uyu kafundisha alitambishe abana be sukulu na bambi iyi vidio. Lyena Emily alangile kafundisha wakwe na banankwe webu saiti ya jw.org. Emily atile, “Yehova alingamfwile ukushipa pa kuti nange abana be besukulu banandi webu saiti ya jw.org. Cine cine Yehova alingamfwile.”

Ilyo amakapani yalelanga ifipe fyabo ku cintubwingi nelyo Trade Fair ku Suai, mu Timor-Leste, bakasabankanya 5 balile pa kuti nabo baye balangeko impapulo pali kastandi. Pa kuya uku balyendele amaawala 9 mu mpili. Abantu abaleya mu kumona impapulo pali kastandi balepapa sana ukumona impapulo ishilanda pali Baibolo mu ndimi 12 ishapusanapusana isha muli ici calo. Icalengele ukuti bapape ni co mu ndimi ishingi pali ishi tamwali ifitabo. Ilyo umwanakashi umo abelengele umutwe wa broshuwa atile, “Citundu candi ici!” Uyu e wali umuku wakubalilapo uo uyu mwanakashi amwenepo ulupapulo ulwapulintwa mu citundu cakwe iciBunak. Mu nshiku fye shine, bakasabankaya balipeele abantu impapulo 4,571 kabili abantu abengi balefwaya ukulabasambilisha Baibolo pa mayanda. Abengi abalefwaya ukulasambilila uyu e wali umuku wakubalilapo ukumonapo Inte sha kwa Yehova. Abana balitambile kavidio akatila, Beni Cibusa wa kwa Yehova pa maawala ayengi mu ciTetun Dili. Bamo pali aba bana  balisungile inyimbo shaba muli aka kavidio kabili baleimba ne nsansa.

Ba Brian na ba Roxanne bamishonari, balipokele ulusa ukuti baleiminika kastandi kakubikapo impapulo pa koleji iya pa cishi ca Palau. Bailelanshanya no mukalamba wa pa koleji no kumutambishako kavidio ka pa jw.org akalanda pa kubila imbila nsuma ku cintubwingi. Balimushilile ne  mpapulo shimo isho balefwaya ukubika pali kastandi. Uyu mukalamba we sukulu aebele ba Brian na ba Roxanne ukuti balingile ukulanshanya no mukalamba we sukulu na umbi. Ilyo balanshenye no yu mukalamba, abebele ukuti nomba bakayelanshanya no mukalamba wa ncito pali bonse.

Ba Brian batile, “Twalilanshenye bwino no uyu mukalamba wa ncito, lelo atwebele ukubwelela kuli ulya umukalamba we sukulu uo twabalilepo ukumona. Ilyo twailemumona atwebele ukuti tulembe kalata iya kupokelapo ulusa lwa kulaiminika kastandi kesu pali iyi koleji. Twamwene kwati tabatupeele insambu pantu baikalilile fye ukutupishanya mu bantu bamo bene, na lyo line twalilembe kalata.”

 Nangu ca kuti ba Brian na ba Roxanne balemona kwati uyu umukalamba wa koleji takabasuminishe ukubika kastandi pa koleji, na lyo line balile mu kumumona. Ba Brian batile, “Twalipapile ilyo uyu mukalamba we sukulu atwebele ukuti alibelengele ifitabo twamupeele kabili alifitemenwe sana. Atwebele no kuti ifitabo fyesu e fyo abana be sukulu balingile ukulabelenga.” Lyena alitusuminishe ukulabika kastandi pa koleji.

Na kabili ba Brian batile: “Umukalamba we sukulu uo twamwene pa muku wa cibili atwebele ukuti abana be sukulu abekala pa koleji kuti balaya ku calici uko batemenwe abene, nga balefwaya ukulaisa ku calici ku mwenu kuti tulebaleta.’ Ine na ba Roxanne twalipapile sana. Kanshi mu nshita ya kuti isukulu likaane ukutupeela insambu, lyalitusuminishe ica kuti lyaliipeleshe no kulatwala abana be sukulu ku Ng’anda ya Bufumu.”

Pa bushiku bwa kubalilapo ba Brian na ba Roxanne bailebika kastandi pa koleji kabili balipeele abantu ifitabo 65, magazini 8 na mabroshuwa 11. Na kabili balilanshenye bwino na bana be sukulu. Abakalamba be sukulu bonse babili balibakoseleshe ukubwelelako mu kubila imbila nsuma.

Ilyo ba Lipson ababombela pa Musambo uwaba pa cishi ca Solomon Islands, balebwela mu kubila imbila nsuma, baumfwile Ulwimbo lwa Bufumu lulelila mwi tuuka, e ico baileingila mu kati. Ba Lipson balipapile ukumona uko abantu abengi abaice na bakalamba baletamba vidio iya kuti Beni Cibusa Wa Kwa Yehova umwaba ulwimbo 55 ulutila Umweo Wa Muyayaya Wasuka Waisa! Ilyo ulwimbo lwapwile ukulila, umwine we tuuka aebele abali mwi tuuku ukuti, “Ninkwata vidio na imbi iyo ndefwaya mutambe.” Lyena abatambishe kavidio akatila Ukwiba Kwalibipa. Ilyo abantu bapwile ukutamba aka kavidio, aebele bonse ukuti belamwibila ifipe mwi tuuka.

 Apo na bambi balishile mwi tuuka lyakwe ilyo aka kavidio kaletambika, abebele ati, “Ndefwaya mumfweko ulwimbo ulo natemwa sana.” Alibalishishe ulwimbo 55 na kabili. Lyena alibatambishe na vidio ya Mulandu shi Mulingile Ukusambilila Baibolo? ne ya kuti Bushe Isambililo lya Baibolo Liba Shani? mu lulimi lwa ciPidgin ulwa ku Solomon Islands.

Abantu abengi aba pa cishi ca Solomon Islands tabomfya intaneti, pantu yalikosa umutengo kabili yaba fye mu ncende ishinono. Na lyo line, uyu umwine we tuuka, uushili Inte ya kwa Yehova, alebyala imbunto sha cine ku bantu abo atambisha amavidio yesu mwi tuuka lyakwe.

Lyonse pali Cimo, abaupana babili balatemwa ukushimikila abantu imbila nsuma pali kastandi babikapo impapulo mu Nouméa umusumba ukalamba uwa mu calo ca New Caledonia. Bushiku bumo umwanakashi umo aile apo babikile kastandi no kuyasendapo icitabo icitila Bushe Cinshi  Baibolo Isambilisha? Ilyo papitile fye amamineti 30 uyu mwanakashi alibweleele kuli kastandi ninshi nakwata ne citabo mu minwe. Aipwishe abaupana ati, “Bushe mwalimona ifyaba muli ici citabo?” Lyena akupukwile icitabo asonta na paali ishina Yehova. E lyo atila, “Ili e shina lya kwa Lesa! Napapita imilungu iingi ukutula apo natampila ukuya mu laibrare pa kuti fye njishibe icine pali Lesa. Nomba ilyo nacisenda icitabo, naikala na muli motoka, ico nacibalilapo ukumona ilyo fye nacikupukula, lishina lya kwa Lesa, Yehova. Lyena nacitontonkanya ukuti mfwile fye ukubweluluka no kwisamutasha.” Aba abaupana balilanshenye bwino no yu mwanakashi kabili balimulangilile apaba ifyebo na fimbi muli ici cine citabo apatila “Ishina Lya Kwa Lesa—Ifya Kulibomfya No Mo Lyalola.” Uyu mwanakashi alilandile ukuti alefwaya ishina lya kwa Lesa mu fitabo fya mu laibrare, lelo nomba alishibe ukwakusanga kastandi lyonse pali Cimo!