Mu myaka yonse ilyo kwali icibindo mu Indonesia, aba bwananyina balekonka ifyo Yesu alandile ati “mufwile ukuba abacenjela nge nsoka lelo aba kaele nge nkunda.” (Mat. 10:16) Ilyo ubuteko bwafumishepo icibindo, aba bwananyina abengi balingile ukusambilila ifya kulanda “no kushipa.”—Imil. 4:31.

Ku ca kumwenko, aba bwananyina bamo baletiina ukushimikila abantu ku ng’anda ne ng’anda lelo babikile sana amano ku kutungulula amasambililo no kuya ku fipempu fya kubwelelamo. Bambi tabalefwaya ukubila imbila nsuma ku baShilamu. Ilyo aba bwananyina abengi baleshimikila tabaleeba abantu ukuti ni ba Nte lelo balelanda fye ukuti bena Kristu e lyo tabalebomfya Baibolo ya Amalembo ya Calo Cipya iya mu ciIndonesian lelo balebomfya fye amaBaibolo ayapilibulwa na ma Calici yambi. * Bambi nabo tabalefwaya fye no kulapeela abantu impapulo ishilanda pali Baibolo.

Fimo ifyo aba bwananyina balecita, fintu ifyo balecita lintu bababindile. Fimbi fyafumine ku ntambi isho bakonka pamo nga filya balanda mu cibemba ukuti tondolo musuma. Cinshi cali no kwafwa aba bwananyina ukulabila bwino imbila nsuma?

Yehova alibafwile ukupitila mu baume abafikapo mu fya kwa Lesa. (Efes. 4:11, 12) Ku ca kumwenako, mu 2010 munyinefwe Stephen Lett uwa mwi Bumba Litungulula alibatandalile kabili alibakoseleshe ukulabomfya Baibolo ya Amalembo ya Calo Cipya pa kuti balecindika ishina lya kwa Lesa. Ba Misja Beerens batile “Ifyo munyinefwe Lett alandile fyalikoseshe bakasabankanya abengi. Fyalibafwile ukwishiba ukuti  balingile ukulayishibisha ukuti ni Nte sha kwa Yehova no kulalanda ifyaba mu Cebo ca kwa Lesa.”

Apo abaShilamu mu Indonesia abengi bamona kwati ba Nte tabapusana na ba mu macalici yambi, bamunyinefwe balibakoseleshe mu Ubutumikishi Bwesu Ubwa Bufumu ukuti: “Lilya line fye mwayamba ukubila imbila nsuma ku muntu, mufwile ukumweba ukuti muli Nte ya kwa Yehova. . . . Tulatemwa sana ukwimininako Yehova kabili tulafwaya ukuti abantu abo tubilako imbila nsuma baishiba ishina lyakwe ne fyo afwaya!” Munyinefwe Shinsuke Kawamoto, uubombela pe ofeshi lya Musambo mu Indonesia atile: “Ifyo batwebele mu Butumikishi Bwesu Ubwa Bufumu fyalitwafwile ukulabila bwino. AbaShilamu abengi balafwaisha ukwishiba ifingi pali ba Nte ne calenga tupusaneko na aba mu macalici yambi. Apo bafwaisha ukwishiba ifingi pali ba Nte, tulabashimikilako imbila nsuma.”

Na kabili, bakasabankanya balibakoseleshe ukulapeela sana abantu Ulupungu lwa kwa Kalinda na Loleni! Ba Lothar Mihank bakampanya ba Komiti ya Musambo batile, “Pa kuti abantu batwishibe, balingile ukulabelenga magazini yesu. Magazini ilalenga abantu balafwaisha ukusambilila icine. Nga ca kuti tulepeela abantu abengi magazini, ninshi tulebafwa ukusambilila pali Yehova.”

Mu 2013 aba kwi ofeshi lya musambo mu Indonesia balipekenye ukuti kube ukulashimikila abantu imbila nsuma ukubomfya inshila shibili isho Ibumba Lintungulula lyasuminishe, e kutila inshila yaibela iya kushimikila ku cintubwingi mu matauni ayakalamba e lyo ne nshila ya kushimikila ku cintubwingi iya pa cilonganino. Ishi nshila sha kubililamo imbila nsuma nashilenga abantu abengi mu Indonesia ukulakutika ku mbila nsuma.

Amatebulo ya kubalilapo aya kubomfya pa kushimikila ku cintubwingi mu matauni ayakalamba bayabikile pa ncende iikalamba apaba amatuuka ayengi mu West Jakarta. Aba  mu filonganino bena batampile ukubila imbila nsuma ku cintubwingi ukubomfya utumastandi e lyo na amatebulo mu ncende umo babila imbila nsuma. Mu mwaka fye umo, bakasabankanya mu misumba iingi mu Indonesia balibomfeshe utumastandi twa mawilo na matebulo ukucila pali 400 pa kubila imbila nsuma ku cintubwingi. Fisuma nshi fyafumamo mu kubomfya ishi nshila sha kubililamo imbila nsuma?

Ba Yusak Uniplaita, baeluda mu Jakarta batile: “Ilyo tushilatendeka ukushimikila ku cintubwingi, icilonganino cesu caleorda magazini 1,200 cila mweshi. Pa numa ya myeshi 6, twatampile ukuorda magazini 6,000. Pali ino nshita tuorda magazini 8000 cila mweshi kabili tulapeela abantu ifitabo ifingi e lyo na mabroshuwa.” Ibumba ilinono ilya bapainiya mu Medan, ku North Sumatra balebika utumastandi twa mawilo pa ncende shitatu. Mu mweshi wa kubalilapo, balipeele abantu ifitabo 115 na magazini nalimo 1,800. Ilyo papitile imyeshi ibili, bapainiya 60 mu ncende 7 nabo balipeele abantu ifitabo ukucila pali 1,200 na magazini 12,400. Ba Jesse Clark, bamishonari batile: “Ishi nshila ishipya isha kubombelamo umulimo shisuma kabili shalitwafwa ukwishiba ukuti abantu abengi mu Indonesia balitemwa ifya kwa Lesa. Ala tukatwalilila fye ukulabomfya ishi nshila!”

Icalo ca Indonesia caba pa fyalo ifingi umwaba abantu abalanda indimi ishalekanalekana. * Nangu ca kuti abantu abengi balanda iciIndonesian, abengi balalanda ne ndimi isho balanda ku ncende bekalila mu Indonesia.

Mu 2012, aba kwi ofeshi lya musambo batendeke ukumona ifyo bengacita pa kuti impapulo shileba na mu ndimi ishinono. Ba Tom Van Leemputten batile, “Twatendekelepo ukupilibula impapulo mu ndimi 12 isho abantu nalimo 120 milioni balanda. Ilyo bakapilibula aba Javanese bamwene trakiti ya  kubalilapo mu lulimi lwabo ulwa ciJavanese, balilukwishe ifilamba ku nsansa. Ala balitemenwe pa kukwata ulupapulo mu lulimi lwabo!”

Na lyo line, aba mu filonganino ifingi balitwalilile ukulalongana mu ciIndonesian nangu fye abaali mu ncende umo bakwata indimi isho balanda uko bekalila. Ba Lothar Mihank batile: “Mu 2013 ine no mwina mwandi Carmen twalile ku kulongana kukalamba ukwa nshiku shibili ukwali ku Nias Island mu North Sumatra. Abalongene baali 400 kabili abengi pali aba balelanda iciNias, lelo amalyashi yonse yali fye mu ciIndonesian. E ico ilyo nalanshenye na balelanda amalyashi, twalibilishe kwi bumba ukuti ubushiku bwakonkelepo programu yali no kuba mu ciNias. Ubushiku bwakonkelepo abantu 600 e balongene. Ba Carmen nabo batile: “Abantu balekutikisha pali ubu bushiku ukucila ne fyo balekutika ilyo bamunyinefwe balelanda amalyashi mu ciIndonesian.  Balitemenwe nga nshi ukumfwa icine ca mu Baibolo mu lulimi lwabo.”

Pali lelo bankomamatwi mu Indonesia nabo balasambilila icine mu lulimi lwabo. Ukutula mu 2010 bakapilibula ba lulimi lwa bankomamatwi ulwa Indonesian Sign Language, balipilibula amabroshuwa 7 na matrakiti 8 muli ulu lulimi. Na kabili, aba kwi ofeshi lya musambo balipekanya amakalashi 24 kabili bakapilibula ukucila 750 balisambilila ululimi lwa bankomamatwi. Pali ino nshita mu Indonesia mwaba ifilonganino fya bankomamatwi 23 kabili filafwilisha no kukoselesha bankomamatwi nalimo amamilioni yatatu abekala muli ici calo.

Pali lelo Dipartimenti ya bakapilibula mu Indonesia yakwata bakapilibula 117 e lyo na abafwilisha muli iyi dipartimenti abali 50. Bakapilibula baba mu ncende 19 kabili bapilibwila mu ndimi 37.